| 冊名 | 哪吒鬧東海歌 |
| 編者 | 未知 |
| 出版社 | 台北黃塗活版所 |
| 出版年 | 1928 |
| 篇名 | 上本 |
| 李靖 帶在 陳塘關 ， 有 學 仙法 粗 未 完 ， 杜 惠 呌 伊 去 下凡 ， 去 加 紂王 伊 霸關 。 |
Lí-tsīng tuà-tī Tîn-tông-kuan , Ū o̍h sian-huat tshoo buē uân , Tōo Huī kiò i khí hā-huân , Khì kā Tiū-ông i pá-kuan . |
| 李 靖 師父 杜 惠 師 ， 亦 有 教 伊 五行符 ， 閣 能 騰雲 甲 駕霧 ， 武藝 學 甲 歸身軀 。 |
Lí Tsīng sai-hū Tōo Huī su , Ia̍h ū kà i ngóo-hîng-hû , Koh ē thîng-hûn kah kà-bū , Bú-gē o̍h kah kui-sin-khu . |
| 李 靖 鎮守 作 總鎮 ， 因某 呌作 殷夫人 ， 即 去 致未 有 身孕 ， 哪叱 投胎 伊 個 身 。 |
Lí Tsīng tìn-siú tsò tsóng-tìn , In-bóo kiò-tsò un-hu-lîn , Tsiah khì ti̍h-beh ū sin-īn , Lô-tshia tâu-thai i ê sin . |
| 卜 講 哪吒 來 出世 ， 即是 玉帝 靈珠兒 ， 因母 今 就 機 花喜 ， 三年 六月 即 生 伊 。 |
Beh kóng Lô-tshia lâi tshut-sì , Tsiah-sī Gio̍k-tè lîng-tsu-lî , In-bú tann to̍h ku hue-hí , Sann-nî la̍k-ge̍h tsiah sinn i . |
| 哪吒 坐胎 三年半 ， 害 因 老母 割 心肝 ， 出世 落土 正 好看 ， 一粒 肉球 那 蛋單 。 |
Lô-tshia tsē-thai sann-nî-puànn , Hāi in lāu-bó kuah sim-kuann , Tshut-sì lo̍h-thôo tsiànn hó-khàunn , Tsi̍t-lia̍p bah-kiû ná nn̄g-tuann . |
| 哪吒 出世 就 能行 ， 肉球 內面 致 應聲 ， 破開 一個 囝仔子 ， 李 靖 嫌疑 是 妖精 。 |
Lô-tshia tshut-sì to̍h ē-kiânn , Bah-kiû lāi-bīn ti̍h ìn-siann , Phuà-khui tsi̍t-ê gín-á-kiánn , Lí Tsīng hiâm-gî sī iau-tsiann . |
| 算是 玉帝 个 至寶 ， 破開 一個 囝仔哥 ， 二項 寶貝 生 真好 ， 一準 毫光 透 天河 。 |
Sǹg-sī Gio̍k-tè ê tsì-pó , Phuà-khui tsi̍t-ê gín-á-ko , Nn̄g-hāng pó-puè sinn tsin-hó , Tsi̍t-tūn hô-kong thàu thian-hô . |
| 肉球 來 包 囝仔身 ， 內面 一條 坤天綾 ， 二項 寶貝 在 內面 ， 玉虛 賞賜 事 是 真 。 |
Bah-kiû lâi pau gín-á-sin , Lāi-bīn tsi̍t-tiâu khun-thian-lîn , Nn̄g-hāng pó-puè tī lāi-bīn , Gio̍k-tè siúnn-sù sū sī tsin . |
| 一个 金箍 正 巧路 ， 起生 勸致 八卦爐 ， 天兵 天將 致 保護 ， 元始天尊 送 金箍 。 |
Tsi̍t-ê kim-khoo tsiànn khiáu-lōo , Khí-sing khǹg-tì pat-kuà-lôo , Thian-ping thian-tsiòng ti̍h pó-hōo , Guân-sú-thian-tsun sàng kim-khoo . |
| 哪吒 出世 就 能 走 ， 閣能 講話 即 有 賢 ， 一條 紅綾 朽 三朽 ， 勸 在 哪吒 輕甲頭 。 |
Lô-tshia tshut-sì to̍h ē tsáu , Koh-ē kóng-uē tsiah ū gâu , Tsi̍t-tiâu âng-lîn áu sann-áu , Khǹg tī Lô-tshia king-kah-thâu . |
| 李 靖 生 趙 哪吒 子 ， 一半 歡喜 一半 驚 ， 落土 即 有 三日 正 ， 太乙真人 來 賀 名 。 |
Lí tsīng sinn tio̍h Lô-tshia kiánn , Tsi̍t-puànn huann-hí tsi̍t-puànn kiann , Lo̍h-thôo tsiah ū sann-li̍t tsiànn , Thài-it-tsin-lîn lâi hō miâ . |
| 乾元 山頂 金光洞 ， 就是 太乙 个 仙宗 ， 十二門人 作 副統 ， 來 收 徒弟 正 開光 。 |
Khiân-guân suann-tíng Kim-kong-tōng , To̍h-sī thài-it ê sian-tsong , Si̍p-lī-bûn-lîn tsoh hù-thóng , Lâi siu tôo-tē tsiànn khai-kong . |
| 哪吒 師父 太乙仙 ， 伊 甲 太乙 有 仙綠 ， 教 伊 武藝 全 能 變 ， 七歲囝仔 甲 賢 仙 。 |
Lô-tshia su-hū Thài-it-sian , I kah Thài-it ū sian-iân , Kà i bú-gē tsuân ē piàn , Tshit-hè-gín-á khah gâu sian . |
| 哪吒 大兄 是 金吒 ， 木吒 排 致 第二名 ， 三個 全是 李 靖 子 ， 哪吒 第一 有 名聲 。 |
Lô-tshia tuā-hiann sī Kim-tshia , Bo̍k-tshia pâi tì tē-lī-miâ , Sann-ê tsuân-sī Lí Tshīng kiánn , Lô-tshia tuē-it ū miâ-siann . |
| 哪吒 帶在 陳塘府 ， 因為 大暑 洗 身軀 ， 去 鬧 東海 即 起事 ， 好 致 玉帝 个 靈珠 。 |
Lô-tshia tuà-tī Tîn-tông-hú , In-uī tāi-sú sué sin-khu , Khì nāu Tang-hái tsiah khí-sū , Hó tì Gio̍k-tè ê lîng-tsu . |
| 哪吒 去 到 東海港 ， 紅綾 落水 水 全 紅 ， 魚蝦 水卒 如滄滄 ， 兵馬 害 死 數萬人 。 |
Lô-tshia khì kàu Tang-hái-káng , Âng-lîn lo̍h-tsuí tsuí tuân âng , Hî-hê tsuí-tsut lû-tsháng-tsháng , Píng-má hāi sí sòo-bān-lâng . |
| 哪吒 去 到 東海面 ， 走 去 東海 洗 紅綾 ， 魚蝦 水卒 死 歸陣 ， 伊 用 虛條 做 手巾 。 |
Lô-tshia khì kàu Tang-hái-bīn , Tsáu khì Tang-hái sé âng-lîn , Hî-hê tsuí-tsut sí kui-tīn , I iōng hit-tiâu tsuè tshiú-kin . |
| 哪吒 寶綾 棄 落海 ， 水底 下面 滾起來 ， 龍王 宮殿 強卜 敗 ， 親像 山頂 做 風颱 。 |
Lô-tshia pó-lîn hìnn lo̍h-hái , Tsuí-tué ē-bīn kún--khì--lâi , Lîng-ông kiong-tiān kiông-beh pāi , Tshin-tshiūnn suann-tíng tsuè hong-thai . |
| 哪吒 水底 即下 滾 ， 魚蝦 親像 卜 曹溫 ， 算是 龍王 呆字運 ， 隨時 點兵 出來 巡 。 |
Lô-tshia tsuí-tué tsi̍t-ē kún , Hî-hê tshin-tshiūnn beh tso-un , Sǹg-sī Lîng-ông phiánn-lī-ūn , Suî-sî tiám-ping tshut-lâi sûn . |
| 乎以 紅綾 一下 拋 ， 魚蝦 死 甲 浮 歸乾 ， 眾人 卻 去 食 甲 飽 ， 龍王 呌 兵 出來 差 。 |
Hōo-i âng-lîn tsi̍t-ē pha , Hî-hê sí kah phû kui-ta , Tsìng-lâng khioh khì tsia̍h kah pá , Lîng-ông kiò ping tshut-lâi tshâ . |
| 龍王 就 呌 水夜叉 ， 去 看 水面 甚麼貨 ， 魚蝦 水卒 死 即多 ， 去 看 逆畜 到一个 ？ |
Lîng-ông to̍h kiò tsuí-iā-tshe , Khì khuànn tsuí-bīn siánn-mi̍h-hè , Hî-hê tsuí-tsut sí tsiah-tsē , Khì khuànn gi̍k-thiok tó-tsi̍t-ê ? |
| 夜叉 犯趙 龍王令 ， 隨時 起行 不敢 停 ， 即時 來 到 水面頂 ， 去 乎 哪吒 拿 致 爭 。 |
Iā-tshe hōng-tio̍h lîng-ông-līng , Suî-sî khí-kiânn m̄-kánn thîng , Tsik-sî lâi kàu tsuí-bīn-tíng , Khì hōo Lô-tshia lia̍h ti̍h tsing . |
| 哪吒 七歲 囝仔性 ， 去 鬧 東海 水晶宮 ， 實在 有影 正 本頂 ， 打 甲 夜叉 尿 那 藤 。 |
Lô-tshia tshit-hè gín-á-sìng , Khì nāu Tang-hái Tsuí-tsinn-king , Si̍t-tsāi ū-iánn tsiànn pún-tíng , Phah kah iā-tshe liō ná thîn . |
| 夜叉 打 了 一个 痛 ， 一个 閃 走 煞 消臂 ， 走 入 龍宮 討 救命 ， 虛久 龍王 即 知 驚 。 |
Iā-tshe phah liáu tsi̍t-ē thiànn , Tsi̍t-ē siám tsáu suah siau-phiann , Tsáu li̍p lîng-kiong thó kiù-miā , Hí-kú Lîng-ông tsiah tsai kiann . |
| 龍王 呌 伊 三太子 ， 去 拿 哪吒 來 迎灰 ， 大膽 來 鬧 咱 水府 ， 赶緊 起兵 甲 伊 誅 。 |
Lîng-ông kiò i Sam-thài-tsú , Khì lia̍h Lô-tshia lâi gíng-hu , Tuā-tánn lâi nāu lán tsuí-hú , Kuánn-kín khí-ping kah i tu . |
| 太子 隨時 去 點兵 ， 龜精 好膽 做 頭前 ， 沙魚 相打 展 伊 猛 ， 蛤仔 靠 殼 伊 二平 。 |
Thài-tsú suî-sî khì tiám-ping , Ku-tsiann hó-tánn tsuè thâu-tsîng , Sua-hî sio-phah tián i bíng , Kap-á khò khak i nn̄g-pîng . |
| 小卷 伊 能 板 火狼 ， 歸魚 展 伊 賢 吹風 ， 蟶仔 一个 那 蟳廣 ， 海翁 致 做 總兵王 。 |
Sió-kńg i ē pàng hé-lông , Kui-hî tián i gâu pûn-hong , Than-á tsi̍t-ê ná tsîm-kóng , Hái-ang ti̍h tsuè tsóng-ping-ông . |
| 白魚 小刀 白雪雪 ， 龍蝦 出戰 駁 鐵叉 ， 蟳仔 靠 伊 腳手 多 ， 別人 用 行 伊 用 把 。 |
Peh-hî sió-to pe̍h-seh-seh , Liông-hê tshut-tsiàn gū thi̍h-tshe , Tsîm-á khò i kha-tshiú tsē , Pa̍t-lâng iōng kiânn i iōng pê . |
| 丁鮸 一枝 透 甲 串 ， 水鮎 金鎗 第一 長 ， 飛鳥 展 趙 賢 飛 遠 ， 海提 一 模 那 籠捐 。 |
Ting-bián tsi̍t-ki thàu kah tshǹg , Tsuí-tsam kim-tshiunn tē-it tn̂g , Pe-oo tián tio̍h gâu pe hn̄g , Hái-thē tsi̍t bôo ná lâng-sn̂g . |
| 要 閣 一陣 海加走 ， 水底 是 伊 上 斲猴 ， 飛廉 走壁 隨時 到 ， 品 文 品 武 展 拳頭 。 |
Iáu koh tsi̍t-tīn hái-ka-tsáu , Tsuí-tué sī i siōng tshi̍k-kâu , Pe-liâm tsáu-piah suî-sî kàu , Pín bûn pín bú tián kûn-thâu . |
| 海校 第一 不正子 ， 尫某 相娶 即 袂行 ， 一个 見 死 双條 命 ， 乎 人 拿 去 開 校靴 。 |
Hái-hāu tē-it m̄-tsiânn-kiánn , Ang-bóo sio-tshuā tsiah buē-kiânn , Tsi̍t-ê kiàn sì siang-tiâu miā , Hōo lâng lia̍h khì khui hāu-hia . |
| 粗皮 厚殼 是 石降 ， 二蕊 目睭 紅紅紅 ， 看 人 腳 手 那 鎮動 ， 驚死 串 入 石頭空 。 |
Tshoo-phuê kāu-khah sī tsio̍h-kàng , Nn̄g-luí ba̍k-tsiu âng-âng-âng , Khuànn lâng kha tshiú ná tín-tāng , Kiann-sí tsǹg li̍p tsio̍h-thâu-khang . |
| 鰹仔 第一 大圓代 ， 又 惜 生命 驚 人 刣 ， 生成 大圓 甲 鎮海 ， 太子 無愛 呌 伊 來 。 |
Kian-á tē-it tuā-khoo-tai , Iū sioh sìnn-miā kiann lâng thâi , Sinn-sîng tuā-khoo kah tìn-hái , Thài-tsú bô-ài kiò i lâi . |
| 暗串 第一 大圓把 ， 出 有 三班 上 皎家 ， 通 海 一項 上 狗祭 ， 朋友 無 交 甲 半个 。 |
Àm-tshǹg tē-it tuā-khoo-pé , Tshut ū sann-pan siōng kiáu-ke , Thong hái tsit-hāng siōng káu-tsè , Pîng-iú bô kau kah puànn-ê . |
| 海鵝 上界 大圓件 ， 就是 爪仔 上 青驚 ， 通 海 勿仔 上 暖且 ， 曹溫 死 着 歸 海平 。 |
Hái-gô siōng-kài tuā-khoo-kiānn , To̍h-sī tsiáu-á siōng tshenn-kiann , Thong hái but-á siōng nńg-tsiánn , Tso-un sí tio̍h kui hái-phiânn . |
| 許蚵 第一 無路用 ， 太子 甲 伊 算 半丁 ， 罕 着 歸海 通 聲應 ， 那準 北國 吳羅兵 。 |
Khóo-ô tē-it bô-lōo-īng , Thài-tsú kā i sǹg puànn-ting , Hán tio̍h kui-hái thong siann-ìng , Nā-tsún Pak-kok gôo-lô-ping . |
| 海鰻 第一 上 無變 ， 一尾 不時 暖連連 ， 乎 人 拿着 袂 滾堅 ， 水卒 一个 上 假仙 。 |
Hái-muâ tē-it siōng bô-piàn , It-bé put-sî nńg-liân-liân , Hōo lâng lia̍h-tio̍h buē kún-kian , Tsuí-tsut tsi̍t-ê siōng ké-sian . |
| 烏喉 報定 有 壁皷 ， 即 能 食 甲 變 身 烏 ， 烏煙 敢 食 歸 北腹 ， 嘴內 烏 來 甲 嘴圓 。 |
Oo-āu pò-tiānn ū piah-kóo , Tsiah ē tsia̍h kah piàn sin oo , Oo-ian kánn tsia̍h kui pak-tóo , Tshuì-lāi oo lâi kah tshuì-khoo . |
| 脫西 第一 無路用 ， 出戰 不敢 行 頭前 ， 呆運 犯着 鄭 國聖 ， 肉 去 乎 伊 食 一平 。 |
Thuah-se tē-it bô-lōo-īng , Tshut-tsiàn m̄-kánn kiânn thâu-tsîng , Pháinn-ūn huān-tio̍h Tēnn Kok-sìng , Bah khì hōo i tsia̍h tsi̍t-pîng . |
| 芋仔 賢 跳 甲 賢 潮 ， 大沙 親像 犁頭縹 ， 魴仔 一尾 那 內葉 ， 海參 一條 那 芎蕉 。 |
Ōo-á gâu thiàu kah gâu tiô , Tuā-sua tshin-tshiūnn lê-thâu-pio , Hóng-á tsi̍t-bué ná lāi-hio̍h , Hái-sam tsi̍t-tiâu ná king-tsio . |
| 赤宗 帶着 上 外 永 ， 近 致 龍王 水晶宮 ， 受 着 上書 個 命令 ， 身 穿 紅襖 出 封亭 。 |
Tshiah-tsang tuà-tī siōng guā íng , Kūn tì Lîng-ông Tsuí-tsinn-king , Siū tio̍h siōng-si ê bīng-līng , Sin tshīng âng-ó tshut hong-tîng . |
| 東鏡 著塊 做 巡掃 ， 水卒 一个 第一 賢 ， 不知 呌是 區區掃 ， 听真 是 著 吹 號頭 。 |
Tang-kiánn tī-teh tsuè sûn-sàu , Tsuí-tsut tsi̍t-ê tē-it gâu , M̄-tsai kiò-sī khù-khù-sàu , Thiann-tsin sī ti̍h pûn hō-thâu . |
| 第一 奸臣 大目廣 ， 三分 大奏 舌 龍王 ， 無影無即 亦 敢 講 ， 太子 呌 伊 領 先鋒 。 |
Tē-it kan-sîn tuā-ba̍k-kòng , Sann-hun tuā-tsàu tsi̍h Lîng-ông , Bô-iánn-bô-tsiah ia̍h kánn kóng , Thài-tsú kiò i niá sian-hong . |
| 角仔 著塊 做 保長 ， 下斗 有 留 二支 鬚 ， 禿仔 著塊 作 剪柳 ， 通海 一項 第一彪 。 |
Kak-á tī-teh tsuè pó-tiúnn , Ē-táu ū lâu nn̄g-ki tshiu , Thut-á tī-teh tsuè tsián-liú , Thong-hái tsit-hāng tē-it-piu . |
| 龍王 三個 查某子 ， 正 是 金色 鯉魚精 ， 卜 甲 哪吒 伊 壁命 ， 不知 下 須 也 卜 營 。 |
Lîng-ông sann-ê Tsa-bóo-kiánn , Tsiànn sī kim-sik lí-hî-tsiann , Beh kah Lô-tshia i piànn-miā , M̄-tsai ē su iā beh iânn . |
| 大個 即有 二一二 ， 頭 西 双鬃 賴 倒眉 ， 身 穿 珠衣 白薜薜 ， 日月双刀 把 二枝 。 |
Tuā--ê tsiah-ū lī-it-lī , Thâu se siang-tsang lua̍h tó-bî , Sin tshīng tsu-i pe̍h-si̍h-si̍h , Li̍t-gua̍t-siang-to pé nn̄g-ki . |
| 第二 即 有 二十歲 ， 頭 西 屈菊 插 金花 ， 又 插 二枝 騎鷄尾 ， 身 穿 珠衣 甲 晌皮 。 |
Tē-lī tsiah ū lī-tsa̍p-huè , Thâu se khut-kiok tshah kim-hue , Iū tshah nn̄g-ki khiâ-kue-bué , Sin tshīng tsu-i kah hiáng-phuê . |
| 第三 即 有 十七八 ， 頭鬃 現 有 也 未 篦 ， 又 續 一部 頭鬃尾 ， 手 把 三股 閁天叉 。 |
Tē-sann tsiah ū tsa̍p-tshit-peh , Thâu-tsang hiān ū iá bē pé , Iū sok tsi̍t-phō thâu-tsang-bé , Tshiú pé sann-kóo tu̍h-thian-tshe . |
| 太子 兵馬 點 原在 ， 卜 甲 哪吒 大 相刣 ， 二人 愛未 刺 看覓 ， 送 須 送 營 也 未 知 。 |
Thài-tsú ping-má tiám guân-tsāi , Beh kah Lô-tshia tuā sio-thâi , Nn̄g-lâng ài-beh tshì khuànn-māi , Sáng su sáng iânn iá bē tsai . |
| 太子 兵馬 齊 到位 ， 魚蝦 水卒 兩面 圍 ， 哪吒 做 伊 致 損水 ， 看 伊 無着 展 雄威 。 |
Thài-tsú ping-má tsiâu kàu-uī , Hî-hê tsuí-tsut lióng-bīn uî , Lô-tshia tsuè i ti̍h sńg-tsuí , Khuànn i bô-tio̍h tián hiông-ui . |
| 哪吒 看着 三太子 ， 二个 大展 伊 工夫 ， 囝仔 真正 不驚事 ， 手 提 金箍 甲 伊 誅 。 |
Lô-tshia khuànn-tio̍h Sam-thài-tsú , Nn̄g-ê tāi-tián i kang-hu , Gín-á tsin-tsiànn m̄-kiann-sū , Tshiú the̍h kim-khoo kah i tu . |
| 哪吒 做 伊 立 在在 ， 手 提 金箍 甲 伊 刣 ， 太子 犯着 不知害 ， 死 著 目前 全 不知 。 |
Lô-tshia tsuè i khiā tsāi-tsāi , Tshiú the̍h kim-khoo kah i thâi , Thài-tsú huān--tio̍h m̄-tsāi-hāi , Sí tī bo̍k-tsîng tsuân m̄-tsai . |
| 太子 直 靠 海龍王 ， 手 弄 大刀 展威風 ， 哪吒 看着 不 妥當 ， 祭起 金科 加 耍弄 。 |
Thài-tsú ti̍t khò Hái-lîng-ông , Tshiú lāng tuā-to tián-ui-hong , Lô-tshia khuànn-tio̍h m̄ thò-tòng , Tsè-khí kim-khoo ka sńg-lōng . |
| 金科 祭起 半空中 ， 比 山 壓着 世 甲 雄 ， 壓着 太子 个 行相 ， 變出 原形 一尾 龍 。 |
Kim-khoo tsè-khí puànn-khong-tiong , Pí suann teh-tio̍h sè khah hiông , Teh-tio̍h thài-tsú ê hîng-siōng , Piàn-tshut guân-hîng tsi̍t-bé liông . |
| 太子 中 寶 大聲 哀 ， 魚蝦水卒 緊 圍來 ， 哪吒 一時 就 春 呆 ， 打死 一海 魚仔災 。 |
Thài-tsú tiòng pó tuā-siann ai , Hî-hê-tsuí-tsut kín uî--lâi , Lô-tshia tsi̍t-sî to̍h tshûn pháinn , Phah-sí tsi̍t-hái hî-á-tsai . |
| 哪吒 打死 魚 歸陣 ， 續 甲 太子 抽 龍筋 ， 抽 來 身軀 下 三厘 ， 虛久 甘願 即 起身 。 |
Lô-tshia phah-sí hî kui-tīn , Suà kā thài-tsú thiu liông-kin , Thiu lâi sin-khu hâ sann-lìn , Hí-kú kam-guān tsiah khí-sin . |
| 哪吒 七歲 鬧 東海 ， 龍筋 續 甲 帶 返來 ， 李 靖 不知 此條代 ， 水府 龍王 大先 知 。 |
Lô-tshia tshit-hè nāu Tang-hái , Liông-kin suà ka tuà tńg--lâi , Lí Tsīng m̄-tsai tsit-tiâu-tāi , Tsuí-hú Lîng-ông tāi-sing tsai . |
| 龍王 實在 正本等 ， 變做 白面 个 書生 ， 受氣 快來 尋 李 靖 ， 帶 劍 行 出 水晶宮 。 |
Lîng-ông si̍t-tsāi tsiànn-pún-tíng , Piàn-tsuè pe̍h-bīn ê su-sing , Siū-khì kín-lâi tshuē Lí Tsīng , Tuà kiàm kiânn tshut Tuí-tsinn-king . |
| 哪吒 返來 不敢 廣 ， 龍王 遁來 一準 風 ， 李 靖 到今 也 戇戇 ， 龍王 來到 跳 甲 踪 。 |
Lô-tshia tńg--lâi m̄-kánn kóng , Lîng-ông tūn--lâi tsi̍t-tūn hong , Lí Tsīng kàu-tann iá gōng-gōng , Lîng-ông lâi-kàu thiàu kah tsông . |
| 龍王 大氣 罵 李 靖 ， 無想 當初 朋友情 ， 子兒 不教 來 放蕩 ， 走 去 鬧 府 水晶宮 。 |
Lîng-ông tuā-khuì mā Lí Tsīng , Bô-siūnn tong-tshoo pîng-iú-tsîng , Kiánn-lî m̄-kà lâi hòng-tōng , Tsáu khì nāu hú Tsuí-tsinn-king . |
| 李 靖 思 久 也 不信 ， 不知 甚麼 起 原因 ， 緊 甲 龍王 下 笑面 ， 只事 乎 我 探听 真 。 |
Lí Tsīng siūnn kú iá m̄-sìn , M̄-tsai siánn-mi̍h khí guân-in , Kín kā Lîng-ông hē tshiò-bīn , Tsí-sū hōo guá thàm-thiann tsin . |
| 李 靖 甲 廣 不知影 ， 龍王 受氣 做 伊 行 ， 卜 呌 玉帝 做 公平 ， 告 卜 李 靖 頭一名 。 |
Lí Tsīng ka kóng m̄-tsai-iánn , Lîng-ông siū-khì tsuè i kiânn , Beh kiò Gio̍k-tè tsuè kong-phiânn , Khò beh Lí Tsīng thâu-tsi̍t-miâ . |
| 李 靖 起頭 即知 害 ， 走 去 通知 因某 知 ， 看見 哪吒 在 房內 ， 手 舉 寶劍 卜 甲 刣 。 |
Lí Tsīng khí-thâu tsiah-tsai hāi , Tsáu khì thong-ti in-bóo tsai , Khuànn-kìnn Lô-tshia tī pâng-lāi , Tshiú gia̍h pó-kiàm beh ka thâi . |
| 因某 惜子 大 要緊 ， 緊 走來 甲 做 公親 ， 哪吒 伊 緊 跪 前面 ， 呌 因 父母 且 安身 。 |
In-bóo sioh-kiánn tuā iàu-kín , Kín tsáu-lâi ka tsuè kong-tshin , Lô-tshia i kín kuī tsîng-bīn , Kiò in pē-bú tshiánn an-sin . |
| 哪吒 隨時 借 土遁 ， 乾元山頂 問 師尊 ， 呌 因 師父 看 命運 ， 着 死 即免 逆 父親 。 |
Lô-tshia suî-sî tsioh thôo-tūn , Khiân-guân-suann-tíng mn̄g su-tsun , Kiò in su-hū khuànn miā-ūn , Tio̍h sí tsiah-bián gi̍k hū-tshin . |
| 太乙 伊 廣 不知影 ， 哪吒 廣 起 乎伊 听 ， 打死 龍王 第三子 ， 卜 告 我父 做 頭名 。 |
Thài-it i iá m̄-tsai-iánn , Lô-tshia kóng khí hōo-i thiann , Phah-sí Lîng-ông tē-sann-kiánn , Beh kò guá-pē tsuè thâu-miâ . |
| 太乙真人 即 加 廣 ， 汝 去 上天 停 龍王 ， 看着 汝 即 加伊 貢 ， 大志 甲大 我 擔當 。 |
Thài-it-tsin-lîn tsiah ka kóng , Lí khì siōng-thian thìng Lîng-ông , Khuànn--tio̍h lí tsiah kā-i kòng , Tsāi-tsì khah-tuā guá tam-tong . |
| 听起 太乙 廣 免驚 ， 哪吒 一時 寡緊 行 ， 卜 甲 龍王 伊 坪命 ， 南天門外 收 龍精 。 |
Thiann-khí Thài-it kóng bián-kiann , Lô-tshia tsi̍t-sî khuánn-kín kiânn , Beh kah Lîng-ông i piànn-miā , Lâm-thian-mn̂g-guā siu lîng-tsiann . |
| 寶德門外 塊 等候 ， 哪吒 扒上 聚仙樓 ， 遇着 龍王 做 尾後 ， 手 提 金科 加 科頭 。 |
Pó-tik-mn̂g-guā teh tán-hāu , Lô-tshia peh-tsiūnn Tsū-sian-lâu , Gū-tio̍h Lîng-ông tsuè bé-āu , Tshiú the̍h kim-khoo ka khoo-thâu . |
| 金科 實在 正好 用 ， 圓 着 龍王 變 原形 ， 寶德門外 崑崙頂 ， 去 乎 哪吒 拿 塊 爭 。 |
Kim-khoo si̍t-tsāi tsiànn-hó īng , Khoo tio̍h Lîng-ông piàn guân-hîng , Pó-tik-mn̂g-guā Khun-lûn-tíng , Khì hōo Lô-tshia lia̍h teh tsing . |
| 哪吒 奉 師 个 字眼 ， 打倒 龍王 無 呌聲 ， 敖 光 隨在 伊 打辦 ， 救救 止春 尺二 難 。 |
Lô-tshia hōng su ê lī-gán , Phah-tó Lîng-ông bô kiò-siann , Gô Kong suî-tsāi i tánn-pān , Kiù-kiù tsí-tshun tshioh-lī lān . |
| 哪吒 本是 崑崙客 ， 第一 手銃 伊 一个 ， 打倒 龍王 變 細細 ， 置在 袋內 即 返回 。 |
Lô-tshia pún-sī Khun-lûn-kheh , Tē-it tshiú-tshìng i tsi̍t-ê , Phah-tó Lîng-ông pìnn suè-suè , Tì-tsāi tē-lāi tsiah tńg-huê . |
| 哪吒 本等 上 仙界 ， 手 拿 敖 光 回返來 ， 返內 放在 伊 廳內 ， 走去 通知 因父 知 。 |
Lô-tshia pún-tíng tsiūnn sian-kài , Tshiú lia̍h Gô Kong huê-tńg--lâi , Tńg-lāi pàng-tī i thiann-lāi , Tsáu-khì thong-ti in-pē tsai . |
| 哪吒 放 龍 在 廳頂 ， 真久 伊 即 變 原形 ， 貧 汝 囝仔 無路用 ， 看破 回家 水晶宮 。 |
Lô-tshia pàng Lîng tī thiann-tíng , Tsin-kú i tsiah piàn guân-hîng , Pîn lí gín-á bô-lōo-īng , Khuànn-phuà huê-ka Tsuí-tsinn-king . |
| 李 靖 一時 大受氣 ， 假意 柴仔 舉 一枝 ， 那不 專心 學 寫字 ， 打倒 腳魁 降 手折 。 |
Lí Tsīng tsi̍t-sî tuā-siū-khì , Ké-ì tshâ-á gia̍h tsi̍t-ki , Nā-m̄ tsuan-sim o̍h siá-lī , Phah-tó kha-khuê kāng tshiú-tsi̍h . |
| 哪吒 出門 愛 搶事 ， 好 致 乾元 太乙師 ， 返來 困 致 總兵府 ， 呌 伊 寫字 學 仁慈 。 |
Lô-tshia tshut-mn̂g ài tshiúnn-sū , Hò tì Khiân-guân Thài-it-su , Tńg--lâi khùn tì tsóng-ping-hú , Kiò i siá-lī o̍h lîn-tsû . |
| 哪吒 被 困 身 無 鎖 ， 走 上 城樓 去 勅桃 ， 看見 樓上 一件 寶 ， 賞賜 李 靖 入 功勞 。 |
Lô-tshia pī khùn sin bô só , Tsáu tsiūnn siânn-lâu khì thit-thô , Khuànn-kìnn lâu-tsiūnn tsi̍t-kiānn pó , Siúnn-sū Lí Tsīng li̍p kong-lô . |
| 樓頂 一枝 震天箭 ， 向 上 射 着 透 天廷 ， 卜 開 千斤 个 本等 ， 城內 無 人 靴 才情 。 |
Lâu-tíng tsi̍t-ki tsín-thian-tsìnn , Hiòng siōng tsiā Tio̍h thàu thian-tîng , Beh khui tshian-kun ê pún-tíng , Siânn-lāi bô lâng hiah tsâi-tsîng . |
