一位 朋友 愛 寫字 ，
佮 伊 罔舍 好兄弟 ，
蹛 佇 台南 關廟里 ，
欲 寫 對聯 想 著 伊 。
|
Tsi̍t-uī pîng-iú ài siá-lī ,
kah i Bòng-sià hó-hiann-tī ,
Tuà tī Tâi-lâm Kuan-biō-lí ,
Beh siá tuì-liân siūnn tio̍h i .
|
邱家 墨盤 真 貴氣 ，
磨墨 幼膩 好 寫字 ，
就 寫 幾迣 的 借字 ，
派 伊 長工 帶 批 去 。
|
Khu--ka ba̍k-puânn tsin kuì-khì ,
Buâ-ba̍k iù-jī hó siá-jī ,
To̍h siá kuí-tsuā ê tsioh-jī ,
Phài i tn̂g-kang tuà phue khì .
|
這位 長工 真 臭屁 ，
無禮貌 閣 毋捌字 ，
靠 伊 主人 有 地位 ，
親像 狐狸 傍 虎威 。
|
Tsit-uī tn̂g-kang tsin tshàu-phuì ,
Bô-lé-māu koh m̄-ba̍t-lī ,
Khò i tsú-lâng ū tē-uī ,
Tshin-tshiūnn hôo-lî pn̄g hóo-ui .
|
來 到 邱家 的 門埕 ，
老邱 老邱 邱 罔舍 ， 大聲 細聲 叫 伊 名 ，
厝邊頭尾 攏 有 聽 。
|
Lâi kàu Khu--ka ê mn̂g-tiânn ,
Lāu-Khu lāu-Khu Khu Bòng-sià Tuā-siann sè-siann kiò i miâ ,
Tshù-pi-thâu-bué lóng ū thiann .
|
罔舍 開門 一下 看 ，
看 著 長工 徛 門外 ，
一時 風火 三丈半 ，
決定 欲 來 加 折磨 。
|
Bòng-sià khui-mn̂g tsi̍t-ē khuànn ,
Khuànn tio̍h tn̂g-kang khiā mn̂g-guā ,
Tsi̍t-sî hong-hué sann-tn̄g-puànn ,
Kuat-tīng beh lâi kai tsiat-buâ .
|
罔舍 就欲 來 創治 ，
徛 蹛 門口 我 問 你 ，
你 來 揣 我 啥 代誌 ，
怎樣 直呼 我 名字 ？
|
Bòng-sià tio̍h-beh lâi tshòng-tī ,
Khiā tuà mn̂g-kháu guá mn̄g lī ,
Lí lâi tshuē guá siánn tāi-tsì ,
Tsuánn-iūnn ti̍t-hoo guá miâ-jī ?
|
阮兜 老爺 有 交代 ，
欲 借 啥乜 我 毋知 ，
帶 有 老爺 批信 來 ，
看 這 批信 你 就 知 。
|
Guán-tau lāu-iâ ū kau-tāi ,
Beh tsioh siánn-mi̍h guá m̄-tsai ,
Tuà ū lāu-iâ phue-sìn lâi ,
Khuànn tse phue-sìn lí tio̍h tsai .
|
罔舍 拆 批 一下 看 ，
知影 按怎 來 加 磨 ，
問 伊 長工 力 偌 大 ，
敢 有 法度 家己 搬 。
|
Bòng-sià thiah pue tsi̍t-ē kuànn ,
Tsai-iánn án-tsuánn lâi kai buâ ,
Mn̄g i tn̂g-kang la̍t luā tuā ,
Kám ū huat-tōo ka-kī puann .
|
恁兜 老爺 真正 老 ，
欲 借 一粒 大 石頭 ，
囥 佇 便所 的 內頭 ，
家己 去 搬 莫 嫌 臭 。
|
Lín-tau lāu-iâ tsin-tsiànn lāu ,
Beh tsioh tsi̍t-lia̍p tuā tsio̍h-thâu ,
Khǹg tī piān-sóo ê lāi-thâu ,
Ka-kī khì puann mài hiâm tshàu .
|
長工 便所 一下 看 ，
尿缸 硩咧 是 按怎 ，
借 這 石頭 無 因端 ，
閣 重 閣 臭 怎樣 搬 。
|
Tn̂g-kang piān-sóo tsi̍t-ē khuànn ,
Jiō-kng teh--leh sī àn-tsuánn ,
Tsioh tse tsio̍h-thâu bô in-tuann ,
Koh tāng koh tshàu tsuánn-iūnn puann .
|
長工 忄 堯疑 來 問 伊 ，
明知 長工 毋捌字 ，
罔舍 共 批 提 予 伊 ，
叫 伊 家己 看 文字 |
Tn̂g-kang giâu-gî lâi mn̄g i ,
Bîng-tsai tn̂g-kang m̄-bat-jī ,
Bòng-sià kā phue the̍h hōo i ,
Kiò i ka-kī khuànn bûn-jī |
長工 確實 毋捌 字 ，
路途 遙遠 歹 問 起 ，
若是 往回 真 費時 ，
石頭 只好 來 扛 起 。
|
Tn̂g-lang khah-si̍t m̄-ba̍t jī ,
Lōo-tôo iâu-uán phái mn̄g khí ,
Nā-sī óng-huê tsin huì-sî ,
Tsio̍h-thâu tsí-hóo lâi kng khí .
|
這粒 石頭 真正 重 ，
三四十斤 無 輕鬆 ，
台南 關廟 沿路 放 ，
十外里路 歇 無 閬 。
|
Tsi̍t-lia̍p tsio̍h-thâu tsin-tsiànn tāng ,
Sann-sì-tsa̍p-kin bô khin-sang ,
Tâi-lâm Kuan-biō iân-lōo pàng ,
Tsa̍p-guā-lí-lōo hioh bô làng .
|
透早 出門 到 天暗 ，
老爺 等 甲 雙手 攬 ，
看 著 石頭 雙跤 蹔 ，
罵 伊 憖頭 兼 臭薟 。
|
Thàu-tsá tshut-mn̂g kàu thinn-àm ,
Lâu-iâ tán kah siang-tshiú lám ,
Khuànn tio̍h tsio̍h-thâu siang-kha tsàm ,
Mē i giàn-thâu kiam tshàu-hiam .
|
是 伊 罔舍 烏白 濺 ，
講 是 老爺 叫 我 搬 ，
害 我 流 甲 規身 汗 ，
規身 骨頭 強欲 散 。
|
Sī i Bòng-sià oo-pe̍h tsuànn ,
Kóng sī lâu-iâ kiò guá puann ,
Hāi guá lâu kah kui-sin kuānn ,
Kui-sin kut-thâu kiông-beh suànn .
|
想 伊 長工 的 作風 ，
靠 伊 主人 展 威風 ，
得罪 著 人 猶 懵懂 ，
敢是 開喙 烏白 講 。
|
Siunn i tn̂g-kang ê tsok-hong ,
Khò i tsú-lâng tián ui-hong ,
Tit-tsuē tio̍h lâng iáu bóng-tóng ,
Kám-sī khui-tshuì oo-pe̍h kóng .
|
長工 聽著 叫 無辜 ，
我 佇 門口 喝 規晡 ，
無 人 開門 心 糊塗 ，
才 叫 老邱 大聲 呼 。
|
Tn̂g-kang thiann--tioh kiò bû-koo ,
Guá tī mn̂g-kháu huah kui-poo ,
Bô lâng khui-mn̂g sim hôo-tôo ,
Tsiah kiò lāu-Khu tuā-siann hoo .
|
老爺 聽著 開 聲 笑 ，
是 你 無禮 大聲 叫 ，
得罪 罔舍 無毋著 ，
予 伊 創治 搬 大石 。
|
Lâu-iâ thiann--tioh khui siann tshiò ,
Sī lí bô-lé tuā-siann kiò ,
Tit-tsuē Bòng-sià bô-m̄-tio̍h ,
Hōo i tshòng-tī puann tuā-tsio̍h .
|
老爺 叫 伊 緊 轉踅 ，
去 向 罔舍 會 失禮 ，
長工 一下 來 到 塊 ，
一聲 失禮 頭 犁犁 。
|
Lâu-iâ kiò i kín tńg-se̍h ,
Khì hiòng Bòng-sià huē sit-lé ,
Tn̂g-kang tsi̍t-ē lâi kàu tè ,
Tsi̍t-siann sit-lé thâu lê-lê .
|
罔 舍 坐 椅 面 笑笑 ，
借 伊 墨盤 回 關廟 ， 一路 緊走 跤 無歇 ， 日頭 已經 東爿 照 。
|
Bòng sià tsē í bīn tshiò-tshiò ,
Tsioh i ba̍k-puânn huê Kuan-biō Tsi̍t-lōo kín-tsáu kha bô-hioh Ji̍t-thâu í-king tang-pîng tsiò .
|
|
