老歲仔 雄雄 走出來 ，
有話 講 予 咱 朋友 弟兄 逐家 知 。
頂來 勸 大兄 ，
下來 勸 小弟 ，
勸 咱 出門 毋通 佮 人 膏膏纏 ，
你 若 濫摻 來 做起 ，
連鞭 會 犯 詐欺 ，
外國 你 無才能 通好 去 。
|
Lāu-huè-á hiông-hiông tsáu-tshut-lâi ,
Ū-uē kóng hōo lán pîng-iú tī-hiann ta̍k-ke tsai ,
Tíng--lâi khǹg tuā-hiann ,
Ē--lâi khǹg sió-tī ,
Khǹg lán tshut-mn̂g m̄-thang kah lâng ko-ko-tînn ,
Lí nā lām-sám lâi tsò-khí ,
Liân-pīnn ē huān tsà-ki ,
Guā-kok lí bô-tsâi-lîng thang-hó khì .
|
予 你 上gau5走 ，
鳳山 高雄 屏東 基隆 基隆頭 ，
刑事 警官 葉葉 到 ，
索仔 蹛佇 褲底仔頭 ，
捎 咧 共 你 縛 ，
火車 送 你 到 台北 。
|
Hōo lí siōng-gâu-tsáu ,
Hōng-suann Ko-hiông Pîn-tong Kue-lâng Kue-lâng-thâu ,
Hîng-sū kìng-kuan ia̍p-ia̍p kàu ,
Soh-á tuà-tī khòo-té-á-thâu ,
Sa leh kā lí pa̍k ,
Hué-tshia sàng lí kàu Tâi-pak .
|
台北 雞寮 刑務所 ，
犯人 關甲 暗暗 烏 ，
犯人 食飯 串 配 蕹菜水 ，
餓 袂 死 ，
漲 袂 肥 。
|
Tâi-pak kue-liâu hîng-bū-sóo ,
Huān-lâng kuainn-kah àm-àm oo ,
Huān-lâng tsia̍h-pn̄g huàn phuè ìng-tshài-tsuí ,
Gō bē sí ,
Tiùnn bē puî .
|
犯人 食飯 格 五點 ，
衰出來 看守 偷 搣 鹽 ，
看守 看着 tsam3 真忝 。
紅衫 紅褲 hiannh 來 穿 ，
號頭 掛佇 面頭前 ，
鍊仔 鍊佇 腹肚頂 ，
宛然 親像 牽猴 上介 成 ，
閣咧 上介 成 。
|
Huān-lâng tsia̍h-pn̄g kik gōo-tiám ,
Sue--tshut--lâi khan-siú thau mi iâm ,
Khan-siú khuànn-tio̍h tsàm tsin-thiám .
Âng-sann âng-khòo hiannh lâi tshīng ,
Hō-thâu kuà-tī bīn-thâu-tsîng ,
Liān-á liān-tī pak-tóo-tíng ,
Uán-liân tshin-tshiūnn khan-kâu siōng-kài sîng ,
Koh-leh siōng-kài sîng .
|
老歲仔 卜 來 勸 咱 朋友 ，
勸 按怎 ？
勸 恁 跋繳 。
講 繳仔 若 毋煞 ，
任 你 仙趁 你 着 袂快活 。
人 講 繳仔 若 無 跋 ，
講 錢死 就 袂活 。
好 來 ，
我 來 唸 一个 勸跋繳歌 。
|
Lāu-huè-á beh lâi khǹg lán pîng-iú ,
Khǹg àn-tsuánn ?
Khǹg lín pua̍h-kiáu .
Kóng kiáu-á nā m̄-suah ,
Līm lí sian-thàn lí tio̍h m̄-khuìnn-ua̍h .
Lâng kóng kiáu-á nā bô pua̍h ,
Kóng tsînn-sí tio̍h bē-ua̍h ,
Hó lâi ,
Guá lâi liām tsi̍t-ê khǹg-pua̍h-kiáu-kua .
|
老歲仔 卜來 勸世 恁 跋繳 ，
有的 叫 伊 來去 做工 擋袂牢 ，
咱 兩鮮錢 去 十八仔 搦了了 ，
你 一个 腹肚 定定 攬 佇 枵 。
|
Lāu-huè-á beh-lâi khǹg-sè lín pua̍h-kiáu ,
Ū-ê kiò i lâi-khì tsò-kang tòng-buē-tiâu ,
Lán ln̄g-sián-tsînn khì si̍p-pat-á la̍k-liáu-liáu ,
Lí tsi̍t-ê pak-tóo tiānn-tiānn lám tī iau .
|
有人 愛跋 十胡牌 ，
牌 分 四色 通人 知 ，
十八仔 的 繳 最 厲害 ，
Peh-si3 的 繳 外國 傳來 。
|
Ū-lâng ài-pua̍h tsa̍p-hôo-pâi ,
Pâi hun sì-sik thong-lâng tsai ,
Si̍p-pat-á ê kiáu tsuè lī-hāi ,
Phè-si̍h ê kiáu guā-kok thuân--lâi .
|
繳 真 濟項 今着 講袂透 ，
中部 有人 咧 跋 輦骰 ，
有人 路邊 佇塊 叫 骰九 ，
墨賊仔 天貢 的 繳 上介 gau5 。
|
Kiáu tsin tsē-hāng tann-tio̍h kóng-buē-thàu ,
Tiong-pōo ū-lâng leh pua̍h lián-tâu ,
Ū-lâng lōo-pinn tī-teh kiò tâu-káu ,
Ba̍k-tsa̍t-á thian-kòng ê kiàu siōng-kài gâu .
|
這碼 有人 佇塊 拍麻雀 ，
路邊 有人 咧 搖 三六 ，
有 繳 無跋 的 人 就 斟酌 ，
跋繳 也 會 強 欺 弱 。
|
Tsit-má ū-lâng tī-teh phah-mâ-tshiok ,
Lōo-pinn ū-lâng leh iô sam-lio̍k ,
Ū kiáu bô-pua̍h ê lâng tio̍h tsim-tsiok ,
Pua̍h-kiáu iā ē kiông khi lio̍k .
|
繳 若 愛跋 攏 盡呼 ，
咱 台北 若咧 跋 六跤 ，
有人 佇咧 跋 八胡 ，
抑 若 跋 濁的 會用 倚 砍大肚 ，
抑 若 艋舺 跋 清的 對君 是 講 四胡 。
|
Kiáu nā ài-pua̍h lóng tsīn-hoo ,
Lán Tâi-pak nā-leh pua̍h la̍k-kha ,
Ū-lâng tī-leh pua̍h pueh-hôo ,
Ah nā pua̍h lô-ê ē-īng uá khám-tuā-tōo ,
Ah nā Báng-kah pua̍h tshing-ê tuì-kun sī kóng sì-hôo .
|
六跤 上捷 跋 五龍 ，
就 唯 遐 川跤 拴 頭先 ，
二跤 抾着 好手 ，
牌仔 撜咧 革 士清 ，
予 in 五个 總喝 ，
從 按呢 摃死 二跤 講 誠 可憐 。
|
La̍k-kha siōng-tsia̍p pua̍h ngóo-lîng ,
Tio̍h uì hia tshuan-kha tshuân thâu-sing ,
Lī-kha khioh-tio̍h hó-tshiú ,
Pâi-á tinn-leh kik sū-tshing ,
Hōo in gōo-kha tsóng-huah ,
Tsiông àn-ne kòng-sí lī-kha kóng tsiânn khó-lîn .
|
二跤 佇咧 說 ：
共 伊 講 免跋 矣 ，
抾 規暗 干焦 抾 這斗 ，
無彩 我 抾起來 起手 着咧 等 白炮 ，
起手等 哦 ，
予 in 硬 五个 總喝 來 摃死 二跤 ，
想起來 足 剋喉 。
|
Lī-kha tī-leh sueh :
Kā i kóng bián-pua̍h ā ,
Khioh kui-àm kan-ta khioh tsi̍t-táu ,
Bô-tshái guá khioh--khí--lâi khí-tshiú to̍h-leh tán pe̍h-phàu ,
Khí-tshiú-tán oo ,
Hōo in ngē gōo-ê tsóng-huah lâi kóng-sí lī-kha ,
Siūnn--khì--lâi tsiok khik-âu .
|
牌底 一下 看 ，
看着 講 第二跤 彼支 牌底 ，
掀起來 拄仔好 白炮 ，
按呢 伊 就 到 ，
閣 予人 摃跤 ，
看 一支 白炮 ，
目屎 煞 強卜 流 。
|
Pâi-té tsi̍t-ē khuànn ,
Khuànn-tio̍h kóng tē-lī-kha hit-ki pâi-té ,
Hian--khí--lâi tú-á-hó pe̍h-phàu ,
Án-ne i tio̍h kàu ,
Koh hōo-lâng kòng-kha ,
Khuànn tsi̍t-ki pe̍h-phàu ,
Ba̍k-sái suah kiông-beh lâu .
|
有 看 的 人 講 ：
共 恁 摃死 二跤 你 咧 suainn7 啥 ，
抑 無 你 嘛 有通 趁 兩底 。
咱 抾起來 好手 無 跋 ，
予人 加 摃跤 ，
按呢 上介 衰 。
|
Ū khuànn ê lâng kóng :
Kā lín kòng-sí lī-kha lí leh suāinn siánn ,
Ah bô lí mā ū-thang thàn ln̄g-tué .
Lán khioh--khì--lâi hó-tshiú bô pua̍h ,
Hōo-lâng ka kòng-kha ,
Àn-ne siōng-kài sue .
|
予 in 五个 從 按呢 加 跋 和去 ，
和去 連 一底 通 趁 嘛 無 ，
按呢 即 狼狽 ，
彼陣 從 按呢 輸繳 輸 甲 轉來 頭 犁犁 。
|
Hōo in gōo-ê tsiông àn-ne ka pua̍h hô--khì ,
Hô--khì liân tsi̍t-tué thang thàn mā bô ,
Àn-ne tsiah liông-puē ,
Hit-tsūn tsiông àn-ne su-kiáu su kah tńg--lâi thâu luê-luê .
|
有人 跋繳 按呢 那 阿舍 ，
出門 無嘛 佇咧 駛 轎車 。
毋過 你 若 輸繳 拄 磅壁 ，
連 卜 食 一支薰 你 都 毋敢 去 共人 賒 。
|
Ū-lâng pua̍h-kiáu àn-ne ná a-sià ,
Tshut-mn̂g bô-mā tī-leh sái kiau-tshia .
M̄-kò lí nā su-kiáu tú pōng-piah ,
Liân beh tsia̍h tsi̍t-ki-hun lí to m̄-kánn khì kā-lâng sia .
|
有人 跋甲 誠 凄慘 ，
責任 攏 放 予 in厝 的 某囝 塊 負擔 ，
僥倖哦 ，
In某 按呢 就 in厝 做 到 暗 ，
你 定定 跋繳 仙 就 毋通 。
|
Ū-lâng pua̍h-kah tsiânn tshi-tshám ,
Tsik-līm lóng pàng hōo in-tshù ê bóo-kiánn teh hū-tam ,
Hiau-hīng--oo ,
In-bóo àn-ne tsiū in-tshù tsò kàu àm ,
Lí tiānn-tiānn pua̍h-kiáu sian tio̍h m̄-thang .
|
繳 若 卜愛 按呢 跋 毋煞 ，
任 你 仙 趁 袂 快活 ，
厝內 就會 放外外 ，
煞 予 恁厝 的 某囝 佇塊 受 拖磨 。
|
Kiáu nā beh-ài àn-ne pua̍h m̄-suah ,
Līm lí sian thàn buē khuìnn-ua̍h ,
Tshù-lāi tio̍h-ē pàng-guā-guā ,
Suah hōo lín-tshù ê bóo-kiánn tī-teh siū thua-buâ .
|
有人 輸繳 按呢 袂 覺醒 ，
今仔日 輸繳 ，
明仔載 講 想卜 閣 來 去 平 ，
誠濟 這款 的 毛病 ，
有的 輸繳 即 共人 偷標 會仔錢 。
|
Ū-lâng su-kiáu àn-ne bē kak-tshínn ,
Kin-á-li̍t su-kiáu ,
Bîng-á-tsài kóng siūnn-beh koh lâi khì phînn ,
Tsiânn-tsuē tsit-khuán ê môo-pīnn ,
Ū-ê su-kiáu tsiah kā-lâng thau-pio huē-á-tsînn .
|
有人 輸甲 按呢 咒 重誓 ，
咒誓咯 ，
斲斷 我的 掌頭仔 ，
講 我 以後 對 繳仔 今 攏總 都 毋跋 。
實在 伊的 心肝 想 卜 看破 ，
彼號 繳鬼 若 來招 心 就 活 。
|
Ū-lâng su-kah àn-ne tsiù tāng-tsuā ,
Tsiù-tsuā--lòo ,
Tok-tn̄g guá-ê tsíng-thâu-á ,
Kóng guá í-āu tuì kiàu-á tann lóng-tsóng to m̄-pua̍h ,
Si̍t-tsāi i-ê sim-kuann siūnn beh khuànn-phuà ,
Hit-lō kiáu-kuí nā lâi-tsio sim tio̍h ua̍h .
|
有人 跋甲 按呢 店 煞 倒 ，
自殺 去 跳 淡水河 ，
放 in厝的 某囝 塊 煩惱 ，
你 繳 若 勿跋 事 就 無 。
|
Ū-lâng pua̍h-kah àn-ne tiàm suah tó ,
Tsū-sat khì thiàu Tiām-tsuí-hô ,
Pàng in-tshù-ê bóo-kiánn teh huân-ló ,
Lí kiáu nā mài-pua̍h sū to̍h bô .
|
一種 查某的 繳 若 愛跋 厚 債務 ，
十个 九个 聽講 去 跋輸 ，
有人 查甫的 輸繳 去 賣厝 ，
嘛有 彼 號 查某的 輸繳 無錢 偷走私 。
|
Tsi̍t-tsióng tsa-bóo-ê kiáu nā ài-pua̍h kāu tsè-bū ,
Tsa̍p-ê káu-ê thiann-kóng khì pua̍h-su ,
Ū-lâng tsa-poo-ê su-kiáu khì buē-tshù ,
Mā-ū hit lō tsa-bóo-ê su-kiáu bô-tsînn thau-tsáu-su .
|
何故 跋甲 即 歹命 ，
若 輸繳 去 走私 最 歹名 ，
繳 會 害人 放翁 佮 離囝 ，
拄着 的 人 即 知驚 。
|
Hô-kòo pua̍h-kah tsiah phái-miā ,
Nā su-kiáu khì tsàu-su tsuè pái-miâ ,
Kiáu ē hāi-lâng pàng-ang kah lî-kiánn ,
Tú--tio̍h ê lâng tsiah tsai-kiann .
|
有種 查某的 跋甲 按呢 那 繳鬼 ，
繳 若 輸落去一个 跤縫 擘開開 ，
即 佮 查甫的 坐 相對 ，
奉 加 看甲 兩蕊 目睭 微微微 。
|
Ū-tsióng tsa-bóo-ê pua̍h-kah àn-ne ná kiáu-kuí ,
Kiáu nā su-luè tsu̍t-ê kha-phāng peh-khui-khui ,
Tsiah kah tsa-poo-ê tsē sio-tuì ,
Hông ka khuànn-kah ln̄g-luí ba̍k-tsiu bui-bui-bui .
|
勸 恁 跋繳 改 較好 ，
毋通 講 我 言 迹多 ，
咱 若 認真 拍拚 來去 做 ，
若卜 成功 免驚無 。
|
Khǹg lín pua̍h-kiáu kái khah-hó ,
M̄-thang kóng guá giân tsiah-to ,
Lán nā tsīn-tsin phah-piànn lâi-khì tsò ,
Nā-beh sîng-kong bián-kiann-bô .
|
勸 恁 跋繳 繳 就 改 ，
有人 佇 這个 繳場 佮 人 惹 出 禍災 ，
跋繳 算真 誠 厲害 ，
了 人 真大 的 家財 。
|
Khǹg lín pua̍h-kiáu kiáu tio̍h kái ,
Ū-lâng tī tsit-ê kiáu-tiûnn kah lâng lia̍h tshut hiō-tsai ,
Pua̍h-kiáu sǹg-tsin tsiânn lī-hāi ,
Liáu lâng tsin-tuā ê ka-tsâi .
|
勸 恁 跋繳 按呢 着 結束 ，
用 紙 包起來 做 記錄 ，
勿 跋 家內 即會 幸福 ，
致蔭 爸母 佮 家族 。
|
Khǹg lín pua̍h-kiáu àn-ne tio̍h kiat-sok ,
Iōng tsuá pau--khí--lâi tsuè kì-lo̍k ,
Mài pua̍h ka-lāi tsiah-ē hīng-hok ,
Tì-ìm pē-bú kah ka-tso̍k .
|
唸甲 到遮 卜來 扯 ，
唸歌 後面 誠 濟个 ，
無嫌 請 恁 來 遮 坐 ，
卜閣 聽 紲落 無問題 。
|
Liām-kah kah-tsia beh-lâi tshé ,
Liām-kua āu-bīn tsiânn tsuē-ê ,
Bô-hiâm tshiánn lín lâi tsia tsē ,
Beh-koh thiann suà--lo̍h bô-būn-tuê .
|
阿伯仔 聽歌 老勇健 ，
跋繳人 若 聽歌 予 恁 場場 贏 ，
太太 聽 我 唸歌 轉去 生 好囝 ，
無嫌 bai2歌 罔 加 聽 。
|
A-peh-á thiann-kua lāu-ióng-kiānn ,
Pua̍h-kiáu-lâng nā thiann-kua hōo lín tiûnn-tiûnn iânn ,
Thài-thài thiann guá liām-kua tńg--khì sinn hó-kiánn ,
Bô-hiâm bái-kua bong ka thiann .
|
阿姆仔 聽 我 唸歌 老康健 ，
無煩 無惱 倒少年 ，
少年家仔 聽 我 唸歌 ___ 轉去 娶某 毋免 鮮 ，
娶着 小姐 有人緣 。
|
A-ḿ-á thiann guá liām-kua lāu-khong-kiān ,
Bô-huân bô-ló tò-siàu-liân ,
Siàu-liân-ke-á thiann guá liām-kua , Tńg--khì tshuā-bóo m̄-bián sián ,
Tshuā-tio̍h siáu-tsê ū-lâng-iân .
|
|
