烏暗 時代 無 電火 ，
街路 專是 爛膏糜 。
大溝 無橋 袂得 過 ，
雨 來 四界 嘗 例例 。
|
Oo-àm sî-tāi bô tiān-hé ,
Kue-lōo tsuan-sī nuā-koo-bê .
Tuā-kau bô-kiô buē-tit kè ,
Hōo lâi sì-kuè siûnn lē-lē .
|
原早 精神 無 帶重 ，
起厝 光廳 隔 暗房 。
厝內 逐宮 有 屎桶 ，
六月 暑天 非常 香 。
|
Guân-tsá tsing-sîng bô tuà-tāng ,
Khí-tshù kng-thiann keh àm-pâng .
Tshù-lāi ta̍k-king ū sái-tháng ,
La̍k--gue̍h sú-thinn hui-siông hiang .
|
以前 頭殼 是 真 定 ，
社會 非常 無 衛生 。
囝仔 鼻 流 袂曉 銃 ，
愛哭 嘴 食 無時 停 。
|
Í-tsîng thâu-khak sī tsin tīng ,
Siā-huē hui-siông bô uē-sing .
Gín-á phīnn lâu buē-hiáu tshìng ,
Ài-khàu tshuì tsia̍h bô-sî thîng .
|
囝仔 銃鼻 衫 手 。
街頭 巷尾 專 隘門 。
暗時 佮 鬼 行 相撞 ，
世界 無火 即 袂光 。
|
Gín-á tshìng-phīnn sann tshiú-ńg .
Kue-thâu hāng-bué tsuan ài-mn̂g .
Àm-sî kah kuí kiânn sio-tn̄g ,
Sì-kè bô-hué tsiah buē-kng .
|
古早 大厝 第一 水 ，
起 好 另外 插 竹圍 。
歹運 不時 撞着 鬼 ，
竹脚 皇金 歸 大堆 。
|
Kóo-tsá tuā-tshù tuē-it suí ,
Khí hó līng-guā tshah tik-uî .
Phái-ūn put-sî tn̄g-tio̍h kuí ,
Tik-kha hông-kim kui tuā-tui .
|
前時 交通 足 歹路 ，
大溪 無橋 舖 竹箍 。
上山 落嶺 真 艱苦 ，
專是 竹脚 芒仔埔 。
|
Tsiân-sî kau-thong tsiok phái-lōo ,
Tuā-khue bô-kiô phoo tik-khoo .
Tsiūnn-suann lo̍h-niá tsin kan-khóo ,
Tsuan-sī tik-kha bâng-á-poo .
|
早時 大路 造 無透 ，
專是 大埤 甲 圳溝 。
瘦田 拋荒 發 菅草 ，
路墘 全部 種 林投 。
|
Tsá-sî tuā-lōo tsō bô-thàu ,
Tsuan-sī tuā-pi kah tsùn-kau .
Sán-tshân pha-hng huat kuann-tsháu ,
Lōo-kînn tsuân-pōo tsìng nâ-tâu .
|
本成 無車 通 運送 ，
坐船 過水 真 踐工 。
專 行 竹脚 莿仔 巷 ，
黃昏 着 無 過路人 。
|
Pún-tsiânn bô-tshia thang ūn-sàng ,
Tsē-tsûn kuè-tsuí tsin tshiân-kang .
Tsuan kiânn tik-kha tshì-á hāng ,
Hông-hun tio̍h bô kuè-lōo-lâng .
|
早時 市街 袂 建設 ，
人 都 也 袂 即哖 孽 。
街頭 巷尾 真 挹貼 ，
壁邊 屎壺 排 歸列 。
|
Tsá-sî tshī-kue buē kiàn-siat ,
Lâng too iā buē tsiah--nî gia̍t .
Kue-thâu hāng-bué tsin iap-thiap ,
Piah-pinn sái-ôo pâi kui-lia̍t .
|
衛生 袂曉 通 摒盪 ，
屎 尿 放 囥 路 中央 。
胡蠅 蠓蟲 店 塊 狀 ，
囥 塊 生孤 煞 發毛 。
|
Uē-sing buē-hiáu thang piànn-tn̄g ,
Sái jiō pàng khǹg lōo tiong-ng .
Hôo-sîn báng-thâng tiàm teh tsn̄g ,
Khǹg teh sinn-koo suah huat-mn̂g .
|
地方 全部 無 整理 ，
交通 不便 真 希微 。
台北 許時 無 都市 ，
街頭 巷尾 專 大埤 。
|
Tē-hng tsuân-pōo bô tsíng-lí ,
Kau-thong put-piān tsin hi-bî .
Tâi-pak hí-sî bô too-tshī ,
Kue-thâu hāng-bué tsuan tuā-pi .
|
前時 市區 真 荒廢 ，
彎街 斡巷 路 真 狹 。
亦 無 市場 通 買賣 ，
考校 着 去 府城街 。
|
Tsîng-sî tshī-khu tsin hong-huè ,
Uan-kue uat-hāng lōo tsin ue̍h .
Ia̍h bô tshī-tiûnn thang bué-buē ,
Khó-kàu tio̍h khì Hú-siânn-kue .
|
滿清 時代 無 整頓 ，
交通 不便 用 帆船 。
做官 食飽 倒 塊 睏 ，
精神 專想 鴉片煙 。
|
Buán-tshing sî-tāi bô tsíng-tùn ,
Kau-thong put-piān īng phâng-tsûn .
Tsuè-kuann tsia̍h-pá tó teh khùn ,
Tsing-sîng tsuan-siūnn a-phiàn-hun .
|
|
