恁 逐家啊 ！
聽 我 唱 ，
就 聽 我 唱 ，
唱 甲 這幾年 ，
造化 來 毋是 。
|
Lín ta̍k-ke--a ,
Thiann guá tshiùnn ,
To̍h thiann guá tshiùnn ,
Tshiùnn kah tsit-kuí-nî ,
Tsō-huà lâi m̄-sī .
|
交 朋友 ，
無 情義 ，
做 生理 閣 無 趁錢 ，
又兼 歹某 娶 來 添 ，
一日 食 一下 飽 ，
謝 齋公 ，
喝 後生 ，
牽亡魂 ，
佮 人 去 問 紅姨 。
轉來 到 阮厝 ，
阮某 大喙 翹上天 ，
摒甌 共 摔箸 。
|
Kau pîng-iú ,
Bô tsîng-gī ,
Tsò sing-lí koh bô thàn-tsînn ,
Iū-kiam pháinn-bóo tshuā lâi thinn ,
Tsi̍t-li̍t tsia̍h tsi̍t-ē pá ,
Siā tsai-kong ,
Huah hāu-sinn ,
Khan-bông-hûn ,
Kah lâng khì mn̄g âng-î .
Tńg--lâi kàu gún-tshù ,
Gún-bóo tuā-tshuì khiàu-tsiūnn-thinn ,
Piànn-au kāng siak-tī .
|
阮 牽手 ，
真 愛媠 ，
鐵交頭 閣 點 胭脂 ，
耳鈎 兩爿 ting7-tong7-hinn3 ， 喙 哺 檳榔 哺 甲 紅記記 ，
目渶油 踅踅滴 ，
目屎膏 不時 都 糊 目墘 。
|
Gún khan-tshiú ,
Tsin ài-suí ,
Thit-kau-thâu koh tiám ian-tsi ,
Hīnn-kau liáng-pîng tīng-tōng-hìnn Tshuì pōo pin-nn̂g pōo kah âng-kì-kì ,
Ba̍k-iann-iû se̍h-se̍h-ti̍h ,
Ba̍k-sái-ko put-sî to kôo ba̍k-kînn .
|
阮某 一雙跤 那 煎匙 ，
色褲 顛倒 襒 ，
跤帛 若 落去 ，
行 着 路 親像 死狗 拖 鹹魚 。
|
Gún-bóo tsi̍t-siang-kha ná tsian-sî ,
Sik-khòo tian-tò pi̍h ,
Kha-pe̍h nā lo̍h-khì ,
Kiânn tio̍h lōo tshin-tshiūnn sí-káu thua kiâm-sî .
|
阮某 真 愛食 ，
彼一日 偷 hiannh 我 一領 綿績被 ，
欲去 共人 換 果子 ，
厝邊 伯仔 ，
九叔公仔 ，
看 一下 見 ，
搖頭 佮 拌耳 ，
搖頭 佮 拌耳 。
|
Guán-bóo tsin ài-tsia̍h ,
Hit-tsi̍t-li̍t thau hiannh guá tsi̍t-niá mî-tsioh-phē ,
Beh-khì kā-lâng uānn kué-tsí ,
Tshù-pinn peh-á ,
Káu-tsik-kong-á ,
Khuànn tsi̍t-ē kìnn ,
Iô-thâu kap puānn-hīnn ,
Iô-thâu kap puānn-hīnn .
|
老歲仔 出來 無啥代 ，
卜 吟 一寡 十二生相 予 恁 知 。
這个 十二生相 有 名聲 ，
也 真出名 。
我 對 鳥鼠仔 唱 起 ，
唱 甲 大豬 為止 ，
按呢 叫 做 十二生相 。
|
Lāu-huè-á tshut--lâi bô-siánn-tāi ,
Beh gîm tsi̍t-kuá tsa̍p-jī-sinn-siùnn hōo lín tsai ,
Tsi̍t-ê tsa̍p-jī-sinn-siùnn ū miâ-siann ,
Iā tsin-tshut-miâ .
Guá tuì niáu-tshí-á tshiùnn khí ,
Tshiùnn kah tuā-ti uî-tsí ,
Àn-ni kiò tsò tsa̍p-jī-sinn-siùnn .
|
彼个 鳥鼠仔 出世 在 壁櫳 ，
大鬧 花燈 出 這个 薛 剛 ，
扑死 太子 驚 聖駕 ，
一時 逃走 九龍山 。
|
Hit-ê niáu-tshí-á tshut-sì tsāi piah-long ,
Tāi-nāu hue-ting tshut tsit-ê Si̍h Kong .
Phah-sí Thài-tsú kiann sìng-kà ,
Tsi̍t-sî tô-tsáu Kiú-liông-san .
|
牛囝 出世 按呢 就 犁田 ，
一時 有孝 是 這个 丁 蘭 ，
丁 蘭 刻木 為 父母 ，
二十四孝 才來 傳 世間 。
|
Gû-kiánn tshut-sì àn-ni tio̍h luê-tshân ,
Tsi̍t-sî iú-hàu sī tsit-ê Ting Lân ,
Ting Lân khik-bo̍k uī hū-bió ,
Jī-tsa̍p-sì-hàu tsiah-lâi thuân sè-kan .
|
虎囝 出世 阿 都 人人驚 ，
文廣 是 被 困 柳州城 ，
金龍公子 來 救駕 ，
才 救 文廣 出 金城 。
|
Hóo-kiánn tshut-sì a to lâng-lâng-kiann ,
Bûn-kóng sī pī khunn3 Liú-tsiu-siânn ,
Kim-lông-kong-tsú lâi kiù-kà ,
Tsiah kiù Bûn-kóng tshut Kim-siânn .
|
兔囝 出世 目 紅紅 ，
羅 通 掃北 戰 銅人 ，
戰 遍 蘇 英 連 蘇 鳳 ，
虧 得 羅 仁 去 陣亡 。
|
Thòo-kiánn tshut-sì ba̍k âng-âng ,
Lô Thong sàu-pak tsiàn tâng-lâng ,
Tsiàn phiàn Soo Ing liâm Soo Hōng ,
Khui tit Lô Lîn khì tīn-bông .
|
龍囝 出世 在 半雲 ，
潘 葛 用計 斬 鑾倫 ，
潘 葛 用計 誠 厲害 ，
才 掠 蘇 英 上 絞台 。
|
Lîng-kiánn tshut-sì tsāi puàn-hûn ,
Phuann Kat īng-kè tsám Luân-lûn ,
Phuann Kat īng-kè tsiânn lī-hāi ,
Tsiah lia̍h Soo Ing tsiūnn ká-tâi .
|
溜囝 出世 身 長長 ，
包 拯 盡忠 睏 落 玉床 ，
喙 含 一點 孔雀血 ，
三條 身魂 上 天堂 。
|
Liu-kiánn tshut-sì sin tn̂g-tn̂g ,
Pau Tsín tsīn-tiong khùn lo̍h gi̍k-tshn̂g ,
Tshuì kâm tsi̍t-tiám khóng-tshiok-hui̍h ,
Sann-tiâu sin-hûn tsiūnn thian-tn̂g .
|
馬囝 出世 被人 騎 ，
孟 宗 哭 竹 湳淚啼 ，
太白神仙 有 看見 ，
才 發 冬筍 來 予 伊 。
|
Bé-kiánn tshut-sì pī-lîn khî ,
Bīng Tsong khàu tik lâm-luī-thî ,
Thài-pi̍k-sîn-sian ū khuànn-kìnn ,
Tsiah haut4 tang-sún lâi hōo i .
|
羊囝 出世 雙跤 先 ，
孫 臏 落難 假 悾癲 ，
一時 行入 去 迷魂陣 ，
七國 來 神珠 去 做仙 。
|
Iûnn-kiánn tshut-sì siang-kha sian ,
Sun Pīn lo̍h-lān ké khong-tian ,
Tsi̍t-sî kiânn-li̍p bê-hûn-tīn ,
Tshit-kok lâi sîn-tsu khì tsò-sian .
|
猴囝 出世 在 深山 ，
奸臣 文禧 去 辭官 ，
奸臣 全 用 彼 奸臣計 ，
迫害 商輅 in 全家 。
|
Kâu-kiánn tshut-sì tsāi tshim-suann ,
Kan-sîn Bûn-hi khì sî-kuann ,
Kan-sîn tsuân īng he kan-sîn-ké ,
Phik-hāi Song-lōo in tsuân-ke .
|
雞囝 出世 親像 鳳 ，
壽豐 昌 揣母 去 打洞 ，
一洞 打 了 過 一洞 ，
葫蘆 才來 發火 燒 猴王 。
|
Kue-kiánn tshut-sì tshin-tshiūnn hōng ,
Siū-hong tshuē-bú khì tánn-tōng ,
Tsi̍t-tōng tánn liáu kuè tsi̍t-tōng ,
Hôo-lôo tsiah-lâi huat-hué sio kâu-ông .
|
狗囝 出世 這个 目 無 開 ，
鳳嬌 佮 李 旦 來 佇咧 相隨 ，
雙人 比合 硃砂記 ，
蔡 端 佮 朱 piu 來 救 伊 。
|
Káu-kiánn tshut-sì tsit-ê ba̍k bô khui ,
Hōng-kiau kah Lí Tàn lâi tī-leh sann-suî ,
Siang-lâng pí-ha̍p tsu-se-kì ,
Tshuà Tuann kah5 Tsu Piu lâi kiù i .
|
豬囝 出世 按呢 吱吱吼 ，
子龍 盡忠 救 阿斗 ，
單身 扑出 萬層圍 ，
才 救 阿斗 去 西天 。
|
Ti-kiánn tshut-sì àn-ne ki-ki-háu ,
Tsú-liông tsīn-tiong kiù A-táu ,
Tan-sin phah-tshut bān-tîng-uî ,
Tsiah kiù A-táu khì se-thinn .
|
羊囝 出世 喉 勼勼 ，
劉府 的 小姐 拋 繡球 ，
繡球 拋 予 呂 蒙正 ，
爹爹 打散 毋 收留 。
|
Iûnn-kiánn tshut-sì âu kiu-kiu ,
Lâu-hú ê sió-tsiá phau siù-kiû ,
Siù-kiû phau hōo Lí Bông-tsìng ,
Tia-tia phah-suànn m̄ siu-liû .
|
老人 聽 我 唸歌 閣 又 不動 ，
做工仔 若 聽 我 唸歌 變 又 精通 ，
做 生理 人 聽 我 唸歌 買賣 大 興旺 ，
逐項 事業 萬事 通 。
|
Lāu-lâng thiann guá liām-kua iū put-tōng ,
Tsò-kang-á nā thiann guá liām-kua piàn iū tsing-thong ,
Tsò sing-lí lâng thiann guá liām-kua bué-buē tuā hing-ōng ,
Ta̍k-hāng sū-gia̍p bān-sū thong .
|
做官人 若 聽 我 唸歌 ___ 按呢 祿位 又 高升 ，
又閣 發財 佮 添丁 ，
抑若 愛簽 六合樂 的 予 你 擺擺 勝 ，
予 你 三星 、 四星 的 着 無停 。
|
Tsò-kuann-lâng nā thiann guá liām-kua , Àn-ne lo̍k-uī iū ko-sing ,
Iū-koh huat-tsâi kah thiam-ting ,
Ah-nā ài-tshiam lio̍k-ha̍p-lo̍h ê hōo lí pái-pái sìng ,
Hōo lí sann-tshinn sì-tshinn ê tio̍h bô-thîng .
|
鄰長 聽 我 唸歌 轉去 升 保正 ，
風塵查某 聽 我 唸歌 轉去 逐暗 有 阿兄 。
|
Lîn-tiúnn thiann guá liām-kua tńg--khì sing pó-tsiànn ,
Hong-tîn-tsa-bóo thiann guá liām-kua tńg--khì ta̍k-àm ū a-hiann .
|
予 恁 逐家 好 名聲 ，
唸歌 勸世 予 恁 聽 ，
聽歌 也有 彼个 作田人 ，
予 恁 年年 好 收 冬 。
有 人 坐船 出 外港 ，
滿載 月 歸 心 輕鬆 ，
聽歌 逐家 都 平安 。
|
Hōo lín ta̍k-ke hó miâ-siann ,
Liām-kua khuàn-sè hōo lín thiann ,
Thiann-kua iā-ū hit-ê tsoh-tshân-lâng ,
Hōo lín nî-nî hó siu tang ,
Ū lâng tsē-tsûn tshut guā-káng ,
Muán-tsài gue̍h kui sim khin-sang ,
Thiann-kua ta̍k-ke to pîng-an .
|
|
