不幸 爹娘 佮 我 辭 ，
拄着 泉州 歹時機 ，
周 成 台灣 做 生理 ，
家中 散赤 全 不知 。
|
Put-hīng tia-niû kah guá sî ,
Tú-tio̍h Tsuân-tsiu phái-sî-ki ,
Tsiu Sîng Tâi-uân tsò sing-lí ,
Ka-tiong sàn-tshiah tsuân put-ti .
|
月裡 在家 真 艱苦 ，
只有 表兄 鬥 勞碌 ，
想卜 台灣 做頭路 ，
淡薄 借 我 做 船租 。
|
Gua̍t-lí tsāi-ka tsín kan-khóo ,
Tsí-ū piáu-hiann tàu lô-lo̍k ,
Siūnn-beh Tâi-uân tsò-thâu-lōo ,
Tām-po̍h tsioh guá tsò tsûn-tsoo .
|
表兄 聽着 想 救 伊 ，
着 共 月裡 說 透機 ，
有聽 台灣 你 卜 去 ，
招呼 借 你 做 船錢 。
|
Piáu-hiann thiann-tio̍h siūnn kiù i ,
Tio̍h kā Gua̍t-lí sueh thàu-ki ,
Ū-thiann Tâi-uân lí bueh khì ,
Tsio-hoo tsioh lí tsò tsûn-tsînn .
|
月裡 聽着 笑咪咪 ，
感謝 表兄 有 情義 ，
佮 君 能得 通 相見 ，
表兄 功勞 較 大 天 。
|
Gua̍t-lí thiann-tio̍h tshiò-bi-bi ,
Kám-siā piáu-hiann ū tsîng-gī ,
Kah kun lîng-tit thang sann-kìnn ,
Piáu-hiann kong-lô khah tuā thinn .
|
金枝 那 想 那 不願 ，
調 借 船租 過 台灣 ，
短命 周 成 敢 變款 ，
來去 見面 佮 伊 冤 。
|
Kim-ki ná siūnn ná m̄-guān ,
Tiâu tsioh tsûn-tsoo kuè Tâi-uân ,
Té-miā Tsiu Sîng kánn piàn-khuán ,
Lâi--khì kìnn-bīn kah i uan .
|
月裡 想着 心 大悶 ，
偝 囝 泉州 卜 搭船 ，
凄慘 歹命 就 是 阮 ，
來去 台灣 揣 郎君 。
|
Gua̍t-lí siūnn-tio̍h sim tuā-būn ,
Āinn kiánn Tsuân-tsiu bueh tah-tsûn ,
Tshi-tshám phái-miā tio̍h sī gún ,
Lâi-khì Tâi-uân tshuē lông-kun .
|
遠遠 來到 滬尾港 ，
月裡 想着 目箍 紅 ，
台灣 不捌 甲 半項 ，
何時 才會 見着 翁 ？
|
Hn̄g-hn̄g lâi-làu Hōo-bué-káng ,
Gua̍t-lí siūnn-tio̍h ba̍k-khoo âng ,
Tâi-uân m̄-bat kah puànn-hāng ,
Hô-sî tsiah-ē kìnn-tio̍h ang .
|
滬尾 起船 就 探聽 ，
無錢 坐車 路 用 行 ，
無人 親像 我 歹命 ，
佇時 會到 大稻埕 。
我 君仔喂 我 着 行 。
|
Hōo-bué khí-tsûn tio̍h thàm-thiann ,
Bô-tsînn tsē-tshia lōo iōng kiânn ,
Bô-lâng tshin-tshiūnn guá phái-miā ,
Tī-sî ē-kàu Tuā-tiū-tiânn .
Guá kun-á--uè guá tio̍h kiânn .
|
來到 滬尾 錢 用了 ，
細囝 無食 腹肚 枵 ，
想卜 共 分 驚 見笑 ，
細囝 枵 甲 擋袂牢 。
|
Lâi-kàu Hōo-bué tsînn īng-liáu ,
Sè-kiánn bô-tsia̍h pak-tóo iau ,
Siūnn-beh kâng pun kiann kiàn-siàu ,
Sè-kiánn iau kah tòng-bē-tiâu .
|
來到 滬尾 歇 一困 ，
無 晝 無 暗 無塊 分 ，
腹肚 連 枵 數十 陣 ，
早起 枵 甲 日暗分 。
|
Lâi-kàu Hōo-bué hioh tsi̍t-khùn ,
Bô tàu bô àm bô-teh hun ,
Pak-tóo liân iau sòo-tsa̍p tsūn ,
Tsá-khí iau kah li̍t-àm-hun .
|
細囝 偝在 尻脊骿 ，
徛 在 門邊 共 討食 ，
頭家 可憐 阮 歹命 ，
泔糜 淡薄 分 阮 食 。
|
Sè-kiánn āinn-tsāi kha-tsiah-phiann ,
Khiā tsāi mn̂g-pinn kang thó-tsia̍h ,
Thâu-ke khó-liân gún phái-miā ,
Ám-bê tām-po̍h pun guán tsia̍h .
|
這宮 分 無 別宮 討 ，
泔糜 來 分 換準 寶 ，
規日 無 食 蹛塊 餓 ，
頭家 有 泔 抑是 無 ？
|
Tsit-king pun bô pa̍t-king thó ,
Ám-bê lâi pun uānn-tsún pó ,
Kui-li̍t bô tsia̍h tuà-teh gō ,
Thâu-ke ū ám iah-sī bô ?
|
頭家 來去 我 來 貯 ，
貯 甲 一碗 洘頭糜 ，
泔糜 鹹薑 挾 三塊 ，
出外人 這碗 予 你 捧 去 扒 。
|
Thâu-ke lâi-khì guá lâi té ,
Té kah tsi̍t-uánn khó-thâu-bê ,
Ám-bê kiâm-kiunn ngeh sann-tè ,
Tshut-guā-lâng tsit-uánn hōo lí phâng khì pê .
|
月裡 伸手 着 加 捧 ，
感謝 頭家 敖力 做人 ，
頭家 真正 敖力 疼痛 ，
疼 阮 無爹 出外人 。
|
Gua̍t-lí tshun-tshiú tio̍h ka phâng ,
Kám-siā thâu-ke gâu tsuè-lâng ,
Thâu-ke tsin-tsiànn gâu thiànn-thàng ,
Thiànn gún bô-tia tshut-guā-lâng .
|
頭家 分 阮 食 下晝 ，
好心 歸尾 會 出頭 。
短命 周 成 無 存後 ，
僥雄 恁某 敢 有 敖力 。
|
Tahû-ke pun gún tsia̍h e-tàu ,
Hó-sim kui-bué ē tshut-thâu .
Té-miā Tsiu Sîng bô tsûn-āu ,
Hiau-hiông lín-bóo kám ū gâu .
|
這宮 分 好 過 別宮 ，
拖身 拖命 揣 周 成 ，
短命 周 成 做 僥倖 ，
對 恁 某囝 即 絕情 。
|
Tsit-kin pun hó kuè pa̍t-king ,
Thua-sin thua-miā tshuē Tsiu Sîng ,
Té-miā Tsiu Sîng tsuè hiau-hīng ,
Tuì lín bóo-kiánn tsiah tsua̍t-tsîng .
|
滬尾 分 來 到 干豆 ___ 關渡 ， 干豆 分 來 透 北投 ，
石牌 士林 分 透透 ，
來到 圓山 吊橋頭 。
|
Hōo-bué pun lâi kàu Kan-tāu , Kan-tāu pun lâi thàu Pak-tâu ,
Tsio̍h-pâi Sū-lîm pun thàu-thàu ,
Lâi-kàu Înn-suann tiàu-kiô-thâu .
|
想卜 跳水 做 客死 ，
可憐 細囝 無 晟持 ，
紅紅 幼幼 無捨施 ，
較苦  囝 來 揣 伊 。
|
Siūnn-beh thiàu-tsuí tsò kheh-sí ,
Khó-liân sè-kiánn bô tshiânn-tî ,
Âng-âng iù-iù bô-sià-sì ,
Khah-khóo tshuā kiánn lâi tshuē i .
|
那 分 那 行 那 探聽 ，
不覺 來到 大稻埕 ，
若無 問路 不知影 ，
周 成 茶行 開 何名 ？
|
Ná pun ná kiânn ná thàm-thiann ,
Put-kak lâi-kàu Tuā-tiūnn-tiânn ,
Nā-bô mn̄g-lōo m̄-tsia-iánn ,
Tsiu Sîng tê-hâng khui hô-miâ ?
|
朋友 聽着 就 皆 說 ，
茶行 開 佇 朝陽街 ，
揀茶 查某 倩 誠濟 ，
嘛有 獎茶 沖 芳花 。
|
Pîng-iú thiann-tio̍h to̍h ka sueh ,
Tê-hâng khui tī Tiâu-iông-ke ,
Kíng-tê tsa-bóo tshiànn tsiânn-tsē ,
Nā-ū tsióng-tê tshìng phang-hue .
|
趕緊 想着 真 煩惱 ，
問着 周 成 的 薪勞 ，
朋友 予 我 小 齪嘈 ，
周 成 有 佇 抑是 無 。
|
Kuánn-kín siūnn-tio̍h tsin huân-ló ,
Mn̄g-tio̍h Tsiu Sîng ê sin-lô ,
Pîng-iú hōo guá sió tsak-tsō ,
Tsiu Sîng ū tī iah-sī bô .
|
寸金 聽着 對喙 應 ，
你 問 周 成 啥何 因 ，
頭家 現步 佇 內面 ，
抑 你 佮 伊 啥乜 親 ？
|
Tshùn-kim thiann-tio̍h tuì-tshuì ìn ,
Lí mn̄g Tsiu Sîng siánn-hô in ,
Thâu-ke hiān-pōo tī lāi-bīn ,
Ah lí kah i siánn-mi̍h tshin .
|
周 成 是 我 的 親翁 ，
倚 來 台北 開 茶行 ，
朋友 予 我 小 起動 ，
刁工 卜 揣 伊 一人 。
|
Tsiu Sîng sī guá ê tshin-ang ,
Uá lâi Tâi-pak khui tê-hâng ,
Pîng-iú hōo guá sió khí-tāng ,
Thiau-kang beh tshuē i tsi̍t-lâng .
|
周 成 內面 親耳 聽 ，
外口 啥人 叫 我 名 ，
我 叫 寸金 塊 嚷 啥 ，
有事 講出 予 我 聽 。
|
Tsiu Sîng lāi-bīn tshin-hīnn thiann ,
Guā-kháu siánn-lâng kiò guá miâ ,
Guá kiò Tshùn-kim teh lióng siánn ,
Ū-sū kóng-tshut hōo guá thiann .
|
周 成 聽着 有 主意 ，
敢是 唐山 我 妻兒 ，
若是 我 妻 來 到 只 ，
今 着 慘 ，
今 着 去 ，
當初時 我 是 用 計智 ，
瞞騙 郭 阿麵 ，
講 我 無 妻兒 。
|
Tsiu Sîng thiann-tio̍h ū tsú-ì ,
Kánn-sī Tn̂g-suann guá tshe-lî ,
Nā-āi guá tshe lâi kàu tsí ,
Tann tio̍h tshám ,
Tann tio̍h khì ,
Tong-tshoo-sî guá sī iōng kè-tì ,
Muâ-phiàn Kueh A-mī ,
Kóng guá bô tshe-lî .
|
這碼 阮 某 來 咯 ，
今 卜 按怎 來 見 伊 ，
是 伊 抑 不是 ，
結果 味 見知 ，
代先 出來 見 。
|
Tsit-má guán bóo lâi lòo ,
Tann beh àn-tsuánn lâi kìnn i ,
Sī i iah m̄-sī ,
Kiat-kó bī kiàn-ti ,
Tāi-sing tshut-alî kìnn .
|
共 伊 看 一下 着 知機 ，
真實 年紀 果然 是 我 妻 月裡 ，
周 成 彼陣仔 面 隨 變 ，
反面 不 認 伊 。
|
Kā i khuànn tsi̍t-ē tio̍h tsai-ki ,
Tsin-si̍t nî-kí kóo-laîn sī guá tshe Gua̍t-lí ,
Tsiu Sîng hit-tsūn-á bīn suî pìnn ,
Huán-bīn m̄ jīn i .
|
月裡 見着 夫君 面 ，
你 敢 無 帶着 恁 爹親 ，
你 來 即久 無 批 無 信 ，
放 阮 母囝 來 可憐 。
|
Gua̍t-lí kìnn-tio̍h hu-kun bīn ,
Lí kám bô tài-tio̍h lín tia-tshin ,
Lí lâi tsiah-kú bô phe bô sìn ,
Pàng guán bú-kiánn lâi khó-lîn .
|
看着 扁擔 大聲 嚷 ，
冤家 你 即 無天良 ，
無 甲 半點 感情 上 ，
共 我 拍甲 全全 傷 。
|
Khuànn-tio̍h pínn-tann tuā-siann lióng ,
Uan-ke lí tsiah bô-thian-liông ,
Bô kah puànn-tiám kám-tsîng siōng ,
Kā guá phah-kah tsuân-tsuân siong .
|
陳 添 出來 在 店口 ，
薪勞 這款 不是 敖力 ，
不時 共 拍 搧 喙斗 ，
不着 就 對 頭家 投 。
|
Tân Thiam tshut-lâi tsāi tiam-kháu ,
Sin-lô tsit-khuán m̄-sī gâu ,
Put-sî kāng phah siàn tshuì-táu ,
M̄-tio̍h to̍h tuì thâu-ke tâu .
|
朋友 問 我 是 啥款 ，
叫 冤家 是 外 不願 ，
僥心 某 蹛 台灣 ，
見 我 既然 講 袂認得 ，
莫怪 我 卜 佮 伊 冤 。
|
Pîng-iú mn̄g guá sī siánn-khuán ,
Kiò uan-ke sī guā m̄-guān ,
Hiau-sim tshuā-bóo tsuà Tâi-uân ,
Kìnn guá kì-liân kóng bē-līn-tit ,
Bo̍k-kuài guá beh kah i uan .
|
我 勸 阿嫂 無要緊 ，
我 來 替 你 做 公親 ，
代先 你 入 內面 ，
拴 舖 予 你 通 安身 。
|
Guá khǹg a-só bô-iàu-kín ,
Guá lâi thé lí tsò kong-tshin ,
Tāi-sing tshuā lí li̍p lāi-bīn ,
Tshaûn phoo hōo li thang an-sin .
|
陳 添 嫂 入 房宮 ，
來到 帳房 報 周 成 ，
牽手 有 來 着 承領 ，
翁仔某 不通 歹 感情 。
|
Tân Thiam tshuā só li̍p pâng-king ,
Lâi-kàu siàu-pâng pò Tsiu Sîng ,
Khan-tshiú ū lâi tio̍h sîng-líng ,
Ang-á-bóo m̄-thang phái kám-tsîng .
|
伊 甲 有 來 我 着 好 ，
叫 我 稽考 絕對 無 ，
不過 一項 真 煩惱 ，
驚 佮 細姨 伊 袂和 ，
細姨 若 知 着 花膏 ，
較加 我 着 反家勞 。
|
I kah ū lâi guá tio̍h hó ,
Kiò guá khe-khó tsua̍t-tuì bô ,
M̄-kò tsi̍t-hāng tsin huân-ló ,
Kiann kah sè-î i bē-hô ,
Sè-î nā tsai tio̍h hue-ko ,
Khah-ke guá tio̍h huán-ke-lô .
|
陳 添 買 茶 出 外鄉 ，
寸金 來 報 頭家娘 ，
頭家 這款 卜 怎樣 ，
公家 翁婿 無 好想 。
|
Tân Thiam bé tê tshut guā-hiunn ,
Tshùn-kim lâi pò thâu-ke-niû ,
Thâu-ke tsit-khuán beh tsuánn-iūnn ,
Kong-ke ang-sài bô hó-siūnn .
|
阿麵 聽着 氣猜猜 ，
緊去 叫 恁 頭家 來 ，
我 不 強佔 人 翁婿 ，
將 伊 拆散 才 應該 。
|
A-mī thiann-tio̍h khì-tshai-tshai ,
Kín-khì kiò lín thâu-ke lâi ,
Guá m̄ kiông-tsiàm lâng ang-sài ,
Tsiong i thiah-suànn tsiah ing-kai .
|
有 某 敢 騙 我 無 某 ，
當初 佮 我 怎樣 呼 ，
公家 翁婿 真 艱苦 ，
一日 三餐 都 難渡 。
|
Ū bóo kánn phiàn guá bô bóo ,
Tng-tshoo kah guá tsuánn-iūnn hoo ,
Kong-ke ang-sài tsin kan-khóo ,
Tsi̍t-li̍t sam-tshan tio lân-tōo .
|
寸金 一時 有 主裁 ，
砒霜 loo7-te2 買 轉來 ，
我 今 毒藥 卜 交待 ，
隨在 娘仔 去 安排 。
|
Tshùn-kim tsi̍t-sî ū tsú-tsâi ,
Phi-sng lōo-té bé tńg--lâi ,
Guá tann to̍k-io̍h beh kau-tài ,
Suî-tsāi niû-á khì an-pâi .
|
寸金 豬肚 捧 一碗 ，
緊 共 月裡 說 因單 ，
面肉 消瘦 真 歹看 ，
台灣 不比 恁 唐山 。
|
Tshùn-kim ti-tōo phâng tsi̍t-uánn ,
Kín kā Gua̍t-lí sueh in-tuann ,
Bīn-bah siau-sàn tsin phái-khuànn ,
Tâi-uân put-pí lín Tn̂g-suann .
|
月裡 捧來 食 看覓 ，
丈夫 好意 叫 人 來 ，
規碗 食落 腹肚 內 ，
腹肚 攪絞 無人知 。
|
Gua̍t-lí phâng-lâi tsia̍h khuànn-māi ,
Tiōng-hu hó-ì kiò lâng lâi ,
Kui-uánn tsia̍h-lo̍h pak-tóo lāi ,
Pak-tóo kiáu-ká bô-lâng-tsai .
|
目睭 金金 塊 看 我 ，
恨 囝 出世 命 怪絕 ，
吹風 曝日 囝 會 大 ，
克虧 老母 無通 活 。
|
Ba̍k-tsiu kim-kim teh khuànn guá ,
Hūn kiánn tshut-sì miā kuài-tsua̍h ,
Tshe-hong pha̍k-li̍t kiánn ē tuā ,
Khik-khui lāu-bú bô-thang ua̍h .
|
囝 你 大漢 着 會曉 ，
着 報 冤仇 頭 一條 ，
三魂 七魄 散 了了 ，
一時 絕命 往 九霄 。
這碼 金枝 死翹翹 ，
寸金 來 報 伊 明瞭 。
|
Kiánn lí tuā-hàn tio̍h ē-hiáu ,
Tio̍h pò uan-siû thâu tsi̍t-tiâu ,
Sam-hûn tshit-phik suànn liáu-liáu ,
Tsi̍t-sî tsua̍t-bīng óng kiú-siau .
Tsit-má Kim-ki sí-khiàu-khiàu ,
Tshùn-kim lâi pò i bîng-liâu .
|
寸金 聽 我 來 交待 ，
唐山婆仔 免 加 坮 ，
身屍 擲落 古井 內 ，
頭殼 落去 跤 起來 ，
共 伊 倒頭 坮 ，
填石 崁頭 無人知 。
|
Tshùn-kim thiann guá lâi kau-tài ,
Tn̂g-suann-pó-á bián ka tâi ,
Sin-si tàn-lo̍h kóo-tsínn lāi ,
Thâu-khak lo̍h-khì kha khí-lâi ,
Kā i tò-tahû tâi ,
Thūn-tsio̍h khàm-thâu bô-lâng-tsai .
|
緊 拴 鋤頭 佮 畚箕 ，
身屍 共 伊  落 井 ，
填石 蓋塗 無人 見 ，
頭殼 落去 跤 向 天 ，
省 咧 一具 棺材 錢 。
|
Kín tshuân tî-thâu kah pùn-ki ,
Sin-si kā i hiat-lo̍h tsínn ,
Thūn-tio̍h khàm-thôo bô-lâng kìnn ,
Thâu-khak lo̍h-khì kha hiòng thinn ,
Íng leh tsi̍t-khū kuann-tshâi tsînn .
|
短命 不甘 你 着 汰 ，
恁 祖媽 另日 才 安排 ，
等 你 無佇 過 所在 ，
恬恬 攑 刀 加 偷刣 。
|
Té-miā m̄-kam lí tio̍h thài ,
Lín tsóo-má līng-li̍t tsiah an-pâi ,
Tán lí bô-tī kuè sóo-tsāi ,
Tiām-tiām gia̍h to ka thau-thâi .
|
我 死 陰魂 是 知機 ，
可恨 阿麵 死賤婢 ，
我 身 被 你 來 害死 ，
敢 閣 卜 害 我 囝兒 。
|
Guá sí im-hûn sī tsai-ki ,
Khó-hūn A-mī sí-tsiān-pi ,
Guá sin pī lí lâi hāi--sí ,
Kánn koh bueh hāi guá kiánn-lî .
|
月裡 轉來 古井 內 ，
三更半暝 足百起來 ，
周 成 野閣 不知 害 ，
人因某 卜 掠 也 不知 ，
翁仔某 蹛佇 花園 塊 天台 。
|
Gua̍t-lí tńg-lâi kóo-tsínn lāi ,
Sann-kinn-puànn-mî peh-khí-lâi ,
Tsiu Sîng iá-koh m̄-tsai hāi ,
In-bóo bueh lia̍h iā m̄-tsai ,
Ang-á-bóo tuà-tī hue-hn̂g teh thian-thai .
|
八月 十五 月 大光 ，
酒 煙 捧 在 後花園 ，
翁某 那 食 那 大爽 ，
望卜 你 我 做 久長 。
|
Peh-gue̍h tsa̍p-gōo gue̍h tuā-kng ,
Tsiú ian phâng tsāi āu-hue-hn̂g ,
Ang-bóo ná tsia̍h ná tuā-sńg ,
Bāng-beh lí guá tsò kú-tn̂g .
|
朋友 姊妹 聽 我 勸 ，
做人 細姨 不通 傷 佔權 ，
查某人 若有 這款 ，
予人 萬古 塊 流傳 。
|
Pîng-iú tsí-muē thiann guá khuàn ,
Tsò-lâng sè-î m̄-thang siunn tsiàm-kuân ,
Tsa-bóo-lâng nā-ū tsit-khuán ,
Hōo-lâng bān-kóo teh liû-thuân .
|
列位 諸君 愛 注意 ，
千萬 不通 某 不挃 ，
周 成 因為 害 某 才會 死 ，
嗚呼哀哉 歸 陰司 ，
囡仔 才 予 陳 添 抾去 飼 。
|
Lia̍t-uī tsu-kun ài tsù-ì ,
Tshian-bān m̄-thang bóo m̄-ti̍h ,
Tsiu Sîng in-uī hāi bóo tsiah-ē sí ,
Oo-hoo-ai-tsài kui im-si ,
Gín-á tsiah hōo Tân Thiam khioh-khì tshī .
|
|
