台灣民間文學歌仔册資料庫

新刊神姐歌-全本

一群姿娘仔，
要卜問神姐，
相邀又相招，
卜去須趂早。
五更起身来，
落床就縛腳。

Tsi̍t-kûn tsir-niû-kánn ,
Ài-berh mn̄g Sîn-tsiá ,
Sann-io iū sann-tsio ,
Berh-khìr su thàn-tsá .
Goö-kinn khí-sin lâi ,
Lo̍h-tshn̂g tio̍h pa̍k-kha .

頭梳銀錠髟告，
放落長偹尾。

Thâu sue gûn-tiānn-kèr ,
Pàng-lo̍h tn̂g-pī-bér .

下身紅葉裙，
上身水月衣，
面上抹水粉，
唇上点胭脂。

Ë-sin âng-hio̍h-kûn ,
Tsiünn-sin tsuí-ge̍rh-i ,
Bīn-tsiünn buat tsuí-hún ,
Tsûn-tsiünn tiám ian-tsi .

紅綾鞋，
鎖綠墘，
白膝褲，
綉花枝，
紅紅絲帶，
結在許腳目邊。

Âng-lîng-uê ,
Sóo-lia̍k-kînn ,
Pe̍h-siak-khòo ,
Siù-hue-ki ,
Âng-âng si-tuà ,
Kat tïr hír kha-ba̍k pinn .

手執弄抗籃，
貯尽碗糕粿，
也有花粉俴，
也有濶芦荟。

Tshiú tsip lòng-khòng-nâ ,
Tué tsïn uánn-ko-kér ,
Iā-ū hue-hún-tsînn ,
Iā-ū khuah lôo-hēr .

角車是針筒，
出門刘吊人。

Kak-tshia sï tsam-tâng ,
Tshut-mn̂g kuah-tiàu-lâng .

行到神姐厝，
打門叫聖媽。

Kiânn kàu Sîn-tsiá tshù ,
Phah-mn̂g kiò Siànn-má .

壇上供奉諸菩薩，
供養却是金舍人，
一邊是善才龙女觀音，
一邊是灶君土地神，
聖媽端的交椅坐。

Tuânn-tsiünn kiong-hōng tsir phôo-sat ,
Kiong-ióng khiok-sï Kim-sià-lîn ,
Tsi̍t-pinn sï siān-tsâi Liông-lír kuan-im ,
Tsi̍t-pinnsï tsàu-kun thóo-tī-sîn ,
Siànn-má tuann-tiah kau-í tsër .

一帖紙俴對面燒，
引卜亡魂過河橋。

Tsi̍t-thiap tsuá-tsînn tuì-bīn sio ,
Ín-berh bông-hûn kèr Hôo-kiô .

亡人行到河橋東，
腳鬆手也鬆；
亡人行到奈河橋，
腳搖手也搖。

Bông-lîn kiânn kàu Hôo-kiô tang ,
Kha sang tshiú iā sang ;
Bông-lîn kiânn kàu Nāi-hôo-kiô ,
Kha iô tshiú iā iô .

橋頭將軍，
橋尾土地，
獻俴獻鈔，
買路過河橋。

Kiô-thâu tsiong-kun ,
Kiô-bér thóo-tī ,
Hiàn-tsînn hiàn-tshau ,
bué-lōo kèr Hôo-kiô .

引来一位亡魂仔，
說伊年登即十二，
離父離母就過世。

Ín-lâi tsi̍t-uī bông-hûn-kánn ,
Serh i nî-ting tsiah tsa̍p-lī ,
Lî pë lî bú tio̍h kèr-sì .

煞了！
甲汝引阮媽，
汝引亡魂仔。

Suah--lòo !
Kah-lír ín gún-má ,
Lír ín bông-hûn-kánn .

既然要引汝媽，
未知汝媽是江也是母？

Kì-liân ài ín lír-má ,
Bēr-tsai lír-má sï kang iá sï bú ?

煞了！
阮媽是姿娘，
不是半陰陽。

Suah--lòo !
Gún-má sï tsir-niû ,
M̄-sï puànn-iam-iûnn .

既然汝媽是姿娘，
男亡請退邊，
女亡引来說。

Kì-liân lír-má sï tsir-niû ,
Lâm-bông tshiánn thèr-pinn ,
Lír-bông ín-lâi serh .

亡人亡哀哀，
信女請汝出壇来。

Bông-lîn bông-ai-ai ,
Sìn-lír tshiánn lír tshut-tuânn lâi .

「
媳婦呵！
媳婦呵！
…
…
」

“
Sin-pū a !
Sin-pū a !
...
...
”

煞了！
未知是不是，
只是哭，
只是啼。
「
那卜不是汝媽，
因乜敢来到只。
」

Suah--lòo !
Bēr-tsai sï-m̄-sï ,
Tsí-sï khàu ,
Tsí-sï thî .
“
Nā berh m̄-sï lír-má ,
In-mi̍h kánn lâi-kàu tsí .
”

汝那是阮媽，
几个子？
几媳婦？
可全頭說知机。

Lír nā-sï gún-má ,
Kuí-gê kánn ?
Kuí sin-pū ?
Thang tsn̂g-thâu serh tsai-ki .

「
大仔不在厝，
二仔在漳浦炰番薯，
三仔賭博弄蕩出門去。

“
Tuā-kánn m̄-tïr tshù ,
Lī-kánn tïr Tsiang-phóo pû han-tsîr ,
Sann-kánn pua̍h-kiáu lōng-tōng tshut-bn̂g khìr .

大媳婦梳頭我歡喜，
二媳婦縛腳過我意，
三媳婦在我面前切切啼。
」

Tuā-sin-pū sue-thâu guá huann-hí ,
Lī-sin-pū pa̍k-kha kèr guá-ì ,
Sann-sin-pū tïr guá bīn-tsuînn tshueh-tshueh-thî .
”

真真着，
正正是。
引媽下身穿几重？

Tsin-tsin-tio̍h ,
Tsiànn-tsiànn-sï .
Ín-má ë-sin tshīng kuí-tîng ?

「
一重一，
二重二，
三重三，
四重四，
汝媽下身是我穿五重。
」
引媽上身穿几重？

“
Tsi̍t-tîng tsi̍t ,
Nn̄g-tîng nn̄g ,
Sann-tîng sann ,
Sì-tîng sì ,
Lír-má ë-sin sï guá tshīng goö-tîng .
”
Ín-má tsiünn-sin tshīng kuí-tîng ?

「
一重一，
二重二，
三重三，
四重四，
五重五，
六重六：
汝媽上身是我穿六重。
」

“
Tsi̍t-tîng tsi̍t ,
Nn̄g-tîng nn̄g ,
Sann-tîng sann ,
Sì-tîng sì ,
Goö-tîng goö ,
La̍k-tîng la̍k :
Lír-Má tsiünn-sin sï guá tshīng la̍k-tîng .
”

煞了！
誰處矇瞳鬼，
到此来混障？

Suah--lòo !
Tsuî-tèr bông-tōng-kuí ,
Kàu-tshír lâi hūn-tsiùnn ?

上身明明是我與媽穿七重，
因乜是六重？
引媽見說目滓流：
「
七重是七重，

Tsiünn-sin bîng-bîng sï guá ír má tshīng tshit-tîng ,
In-mi̍h sï la̍k-tîng ?
Ín-má kìnn-serh ba̍k-tsái lâu :
“
Tshit-tîng sï tshit-tîng ,

那因當時第三子上街去剪袄，
灣入去輦宝，
輸到空空；
媳婦汝即做一領无兜裡袄，
汝媽穿到奈何橋，
被一惡鬼就剝倒。
」

Nā-in tong-sî tuē-sann-kánn tsiünn-kue khìr tsián-ó ,
Uan-li̍p-khìr lián-pó ,
Su kàu khang-khang ;
Sin-pū lír tsiah tsèr tsi̍t-niá bô-ta-lí-ó ,
Lír-má tshīng kàu Nāi-hôo-kiô ,
Pī tsi̍t ok-kuí tio̍h pak-tó .
”

引媽須着保庇阮媳婦呵，
保庇好花土汝枝，
好仔乞汝飼，
臭頭爛耳汝莫碟。

Ín-má su-tio̍h póo-pì gún sin-pū a ,
Póo-pì hó-hue tshiünn lír ki ,
Hó-kánn khit lír tshī ,
Tshàu-thâu nuā-hï lír bo̍h-ti̍h .

汝媽話說了，
即時卜返去。

Lír-Má uē serh-liáu ,
Tsiak-sî berh tńg-khìr .

神姐起位来，
娘子曰得流。

Sîn-tsiá khí-uī lâi ,
Niû-kánn ba̍k-tsái lâu .

世人搃是癡，
神姐无影厘；
不如入廟燒好香，
尋神終須无采俴。

Sè-lîn tsóng-sï tshi ,
Sîn-tsiá bô-iánn lí ;
M̄-lîr li̍p-biō sio-hó-hiunn ,
Tshēr-sîn tsiong-su bô-tshái tsînn .

回上頁