| 冊名 | 林投姉 |
| 編者 | 陳清雲唸唱 |
| 出版社 | 筆錄月球唱片廠股份有限公司CD |
| 出版年 | 2010 |
| 篇名 | 第五集 |
| 林投姉仔 有 靈聖 ， 我 共 你 講 照頭 行 ， 廟 若 起 好 我 隨請 ， 予 你 死 落 好 名聲 。 |
Nâ-tâu-tsí-á ū lîng-siànn , Guá kā lí kóng tsiàu-thâu kiânn , Biō nā khí hó guá suî-tshiánn , Hōo lí sí lo̍h hó miâ-siann . |
| 我 講 个 話 做 會到 ， 毋免 予 你 帶 林投 ， 禮數 共 你 攢 甲 夠 ， 含笑歸塗 去 出頭 。 |
Guá kóng ē uē tsò ē-kàu , M̄-bián hōo lí tuà nâ-tâu , Lé-sòo kā lí tshuân kah kàu , Hâm-tshiàu-kui-thôo khì tshut-thâu . |
| 時間 簡那 會 遮年 長 ， 按怎 天色 攏 袂 光 ， 做戲 腳手 煞 齊軟 ， 實在 有影 喙 攏 袂 酸 。 |
Sî-kan kán-nah ē tsiah--nî tn̂g , Àn-tsuánn thinn-sik lóng buē kng , Tsò-hì kha-tshiú suah tsiâu-nńg , Si̍t-tsāi ū-iánn tshuì lóng buē sng . |
| 毋知 為着 啥 因單 ， 予 我 那 想 那 起寒 ， 做戲 歸暝 攏 無人 看 ， 實在 強卜 流 凊汗 。 |
M̄-tsai uī-tio̍h siánn in-tuann , Hōo guá ná siūnn ná khí-kuâunn , Tsò-hì kui-mî lóng bô-lâng khuànn , Si̍t-tsāi kiông-bueh lâu tshìn-kuānn . |
| 戲 做 歸暝 个 時間 ， 爐主 實在 真 野蠻 ， 無 煮 點心 來 遮 等 ， 實在 有影 足誠 殘 。 |
Hì tsò kui-mî ê sî-kan , Lôo-tsú si̍t-tsāi tsin iá-bân , Bô tsú tiám-sim lâi tsai tán , Si̍t-tsāi ū-iánn tsiok-tsiânn tshân . |
| 這步 實在 真好用 ， 共伊 唸 一下 天 煞 明 ， 鬼 治塊 創治 足 僥倖 ， 實在 有影 有聖 佮 有靈 。 |
Tsit-pōo si̍t-tsāi tsin-hó-īng , Kā-i liām tsi̍t-ē thinn suah bîng , Kuí tī-teh tshòng-tī tsiok hiau-hīng , Si̍t-tsāi ū-iánn ū-siànn kah ū-lîng . |
| 做戲 驚 甲 足百起 走 ， 身軀 大汗 治塊 粒流 ， 險險 時間 做 袂到 ， 驚 一下 直走 無 越頭 。 |
Tsò-hì kiann kah peh-khí tsáu , Sin-khu tuā-kuānn tī-teh lia̍p-lâu , Hiám-hiám sî-kan tsò bē-kàu , Kiann tsi̍t-ē ti̍t-tsáu bô ua̍t-thâu . |
| 離別 家鄉 做外 遊 ， 風雨 袂過 過 別州 ， 江湖 是 我 學 在手 ， 天下 隨在 我 去 遊 。 |
Lî-pia̍t ka-hiong tsuè-guā iû , Hong-ú buē-kuè kuè pa̍t-tsiu , Kang-ôo sī guá o̍h tsāi-tshiú , Thian-hā suî-tsāi guá khì iû . |
| 相命 先生 學 真深 ， 平洋 過了 過 山林 ， 一路 那 行 那 夜 深 ， 想 着 無錢 足 激心 。 |
Siòng-miā sian-sin o̍h tsin-tshim , Pênn-iûnn kuè-liáu kuè san-lîm , Tsi̍t-lōo ná kiânn ná iā tshim , Siūnn tio̍h bô-tsînn tsio̍k kik-sim . |
| 來 到 山頂 一間廟 ， 感覺 心肝 真 礙虐 ， 親像 運命 坐 真少 ， 無人 綴 我 會當 着 。 |
Lâi kàu suann-tíng tsi̍t-king-biō , Kám-kak sim-kuann tsin gāi-gio̍h , Tshin-tshiūnn ūn-miā tsē tsin-tsió , Bô-lâng tsuè guá ē-tàng tio̍h . |
| 林投姉 林投姉 ， 本來 是 姓 李 ， 招娘 着是 伊个 真 名字 ， 一人 變 到 死 潭邊 ， 無人 同情 伊 ， 這款 事情 真 哀悲 ， 聽 我 來 講 起 。 |
Nâ-tâu-tsí Nâ-tâu-tsí , Pún-lâi sī sìnn lí , Tsiau-niû tio̍h-sī i-ê tsin miâ-lī , Tsi̍t-lâng piàn kàu sí thâm-pinn , Bô-lâng tông-tsîng i , Tsit-khuán sū-tsîng tsin ai-pi , Thiann guá lâi kóng khí . |
| 雙腳 疊齊 跪落去 ， 先生 喂 ， 我 个 苦情 是 真 哀悲 ， 我 个 翁婿 來 早 過世 ， 放 囝 予 我 來咧 晟持 。 |
Siang-kha thia̍p-tsê khuī--lo̍h-khì , Sian-sinn uè , Guá ê khóo-tsîng sī tsian ai-pi , Guá ê ang-sài lâi tsá kuè-sì , Pàng kiánn hōo guá lâi-leh tshiânn-tî . |
| 本來 家中 是 真 富貴 ， 搪着 一个 媒人婆 ， 講 我 是 查某人 ， 扞家 來 扞袂起 ， 叫 我 着愛 閣 佮 人 定 親誼 。 |
Pún-lâi ka-tiong sī tsin hù-kuì , Tn̄g-tio̍h tsi̍t-ê muî-lâng-pô , Kóng guá sī tsá-bóo-lâng , Huānn-ke lâi huānn-buē-khí , Kiò guá tio̍h-ài koh kah lâng tīng tshin-gī . |
| 彼 當陣 ， 想 着 細囝 無捨世 ， 我 才來 答應 伊 ， 望 卜 佮 我 好 百年 。 |
Hit tang-tsūn , Siūnn tio̍h sè-kiánn bô-siá-sì , Guá tsiah-lâi tah-ìng i , Bāng bueh kah guá hó pah-nî . |
| 夭壽 短命 無好死 ， 斬頭 路旁屍 ， 周 阿司 實在 有 無理 ， 講 伊 卜 廣東 去 ， 卜 去 遐 做 生理 ， 家賄 共 我 款 了離 。 |
Iáu-siū té-miā bô-hó-sí , Tsām-thâu lōo-pông-si , Tsiu A-si si̍t-tsāi ū bô-lí , Kóng i bueh Kńg-tang khì , Bueh khì hia tsò sing-lí , Ke-hué kā guá khuán liáu-lī . |
| 錢銀 共 我 提 千四 ， 經過 有 誠久 ， 攏 無 寫批 ， 放 阮 母囝 在家 難得 過日子 。 |
Tsînn-gîn kā guá the̍h tshing-sì , King-kuè ū tsiânn-kú . Lóng bô siá-phue , Pàng guán bú-kiánn tsāi-ka lân-tit kuè-li̍t-tsí . |
| 想着 眾人 卜 討錢 ， 無通 好 來 還 伊 ， 眾人 真 受氣 ， 閣 將 阮 母囝 趕 出來 ， 只有 去 逃生 ， 無疑 我囝 染 重病 ， 一命 煞 來 過世 。 |
Thiann-tio̍h tsìng-lâng bueh thó-tsînn , Bô-thang hó lâi hânn i , Tsìng-lâng tsin siū-khì , Koh tsiong guán bú-kiánn kuánn tshut-lâi , Tsí-ū khì tô-sinn , Bô-gî guá-kiánn liám tāng-pīnn , Tsi̍t-miā suah lâi kuè-sì . |
| 彼當時 ， 我 是 真 哀悲 ， 姑不二將 閣 不得已 ， 也 來 自盡 歸陰司 。 事情 着是 按呢生 ， 望 你 替 我 鬥 解圍 。 |
Hit-tang-sî , Guá sī tsin ai-pi , Koo-put-lī-tsiong koh put-tik-í , Iā lâi tsū-tsīn kui-im-si , Sū-tsîng tio̍h-sī án-ni-sinn , Bāng lí thè guá tàu kái-uî . |
