It Sú-tsiá ka-sè . Hô-pîng sú-tsiá Sím Gī-jîn ,
Ka tsū lâm-pōo Sin-iânn tìn ,
Bîng-tī bué-nî kàu jû-kim ,
Peh-tsa̍p-peh huè ū tsing-sîn ,
Tshut-guā se-tsong tshīng kín-kín ,
Thé-thāi miâu-thiâu siàu-liân bīn ,
Muí-ji̍t tsián pò tsin-tsiànn khîn ,
Pah pún tsián-pò kīn tshian-kin ,
Sing-ua̍h khí-ki put jiám-tîn ,
Tse sī tn̂g-siū ê tsú-in ,

It Sú-chiá ka-sè . Hô-pêng sú-chiá Sím Gī-jîn ,
Ka chū lâm-pō͘ Sin-iâⁿ tìn ,
Bêng-tī bóe-nî kàu jû-kim ,
Peh-cha̍p-peh hòe ū cheng-sîn ,
Chhut-gōa se-chong chhēng kín-kín ,
Thé-thāi miâu-thiâu siàu-liân bīn ,
Múi-ji̍t chián pò chin-chiàⁿ khîn ,
Pah pún chián-pò kīn chhian-kin ,
Seng-oa̍h khí-ki put jiám-tîn ,
Che sī tn̂g-siū ê chú-in ,

Jī Ho̍k-bū ka-hiong .
Gī-jîn guân-miâ kiò Khîng-lâm ,
Siàu-liân gī-khì koh ióng-kám ,
Ho̍k-bū jîn-kûn tsò thâu-lâng ,
Tam-jīm tìn-tiónn ū sòo-tang ,
Thui-tián tsìng-līng tsik-jīm tāng ,
Kiàn-siat kòo-hiong bô thîng-kang ,
Lông-tē tiông-uē siu-sian tāng ,
Tsòng-ting tuī-tiónn miâ-siann phang ,
Kūn-siù ti-sū tsióng-tsn̄g sàng ,
Siū tio̍h kóo-lē lâng khin-sangh1 .

Jī Ho̍k-bū ka-hiong .
Gī-jîn gôan-miâ kiò Khêng-lâm ,
Siàu-liân gī-khì koh ióng-kám ,
Ho̍k-bū jîn-kûn chò thâu-lâng ,
Tam-jīm tìn-tióⁿ ū sò͘-tang ,
Thui-tián chèng-lēng chek-jīm tāng ,
Kiàn-siat kò͘-hiong bô thêng-kang ,
Lông-tē tiông-ōe siu-sian tāng ,
Chòng-teng tūi-tióⁿ miâ-siaⁿ phang ,
Kūn-siù ti-sū chióng-chn̄g sàng ,
Siū tio̍h kó͘-lē lâng khin-sangh1 .

Sann Sū-kiānn tsîng-tsàu .
Ji̍t-pún tsiàn-su huê kòo-hiong ,
Tâi-uân kong-ho̍k iōng ngē-kiông ,
Tiong-kok kun-tuī tshiōnn guân-hiong ,
Kiap-siu Ji̍t-sán ta̍k-ke tshiong ,
Khan tshin ín tshik oo-pe̍h jióng ,
Tham-kuann ù-lī tshiónn bí-liông ,
Tsi̍t-kûn thóo-huí bô thian-liông ,
Ti kuann Tân Gî thài hun-iong ,
Kuān-tiónn Kok-tsing bô-lōo-iōng ,
Tsú-uí Tsu Iām sī kan-hiông .

Saⁿ Sū-kiāⁿ chêng-chàu .
Ji̍t-pún chiàn-su hôe kò͘-hiong ,
Tâi-ôan kong-ho̍k iōng ngē-kiông ,
Tiong-kok kun-tūi chhiōⁿ gôan-hiong ,
Kiap-siu Ji̍t-sán ta̍k-ke chhiong ,
Khan chhin ín chhek o͘-pe̍h jióng ,
Tham-koaⁿ ù-lī chhióⁿ bí-liông ,
Chi̍t-kûn thó͘-húi bô thian-liông ,
Ti koaⁿ Tân Gî thài hun-iong ,
Kōan-tióⁿ Kok-cheng bô-lō͘-iōng ,
Chú-úi Chu Iām sī kan-hiông .

Sì Sū-piàn ê Sin-iânn .
Tâi-uân kong-ho̍k ê tshoo-kî ,
Kok-kun lâi Tâi bô kui-kí ,
Tâi jîn mē in guā-síng-ti ,
Káu khì ti lâi tsia̍h liáu bí ,
Tâi-uân peh-sènn ling-ki-ki ,
Jī-jī-pat iû-tshú ín khí ,
Tâi-lâm kuān-tiónn tsáu khì bi̍h ,
Khîng-lâm tìn-tiónn m̄ tsai-ki ,
Sin-iânn tī-an i uî-tshî ,
Bián sú peh-sènn tso hî-tî .

Sì Sū-piàn ê Sin-iâⁿ .
Tâi-ôan kong-ho̍k ê chho͘-kî ,
Kok-kun lâi Tâi bô kui-kí ,
Tâi jîn mē in gōa-séng-ti ,
Káu khì ti lâi chia̍h liáu bí ,
Tâi-ôan peh-sèⁿ leng-ki-ki ,
Jī-jī-pat iû-chhú ín khí ,
Tâi-lâm kōan-tióⁿ cháu khì bi̍h ,
Khêng-lâm tìn-tióⁿ m̄ chai-ki ,
Sin-iâⁿ tī-an i ûi-chhî ,
Bián sú peh-sèⁿ cho hî-tî .

Gōo Hip-siòng jiá hong-pho .
Khîng-lâm ài-sim kòo peh-sènn ,
Uî-tshî tī-an khóo-khóo-thenn ,
Ka phài tsit-uân lâi sûn-kenn ,
Sin-thé tshau-lô suah phuà-pēnn ,
Pī pik hip-siòng ián hì-pênn ,
Kuān-tiónn put tshat oo-pe̍h mē ,
Tsú-uí Tsu Iām iōng kan-kè ,
Bû-kò Khîng-lâm sī pháinn-tshenn ,
Sī-hui put-bîng sī án-ne ,
Khì-sí îng-lâng huah put-pênn .

Gō͘ Hip-siòng jiá hong-pho .
Khêng-lâm ài-sim kò͘ peh-sèⁿ ,
Ûi-chhî tī-an khó͘-khó͘-theⁿ ,
Ka phài chit-ôan lâi sûn-keⁿ ,
Sin-thé chhau-lô soah phòa-pēⁿ ,
Pī pek hip-siòng ián hì-pêⁿ ,
Kōan-tióⁿ put chhat o͘-pe̍h mē ,
Chú-úi Chu Iām iōng kan-kè ,
Bû-kò Khêng-lâm sī pháiⁿ-chheⁿ ,
Sī-hui put-bêng sī án-ne ,
Khì-sí êng-lâng hoah put-pêⁿ .

La̍k Thiat-tsit kàu sí-hîng .
Iú kong bô sióng suah thiat-tsit ,
Khîng-lâm tshim-tshim kì tsi̍t-ji̍t ,
Tâi-uân peh-sènn thài láu-si̍t ,
Su-liām tsóo-kok sim ti̍t-ti̍t ,
Nà tsai to-kháu buat phang-bi̍t ,
Phàn lí sí-tsuē tsin pháinn tshit ,
Khîng-lâm phàn sí tuā hong-tōng ,
Thài-thài the̍h tsînn kuánn soo-thong ,
Bîng-bîng tshing-pi̍k pī uan-óng ,
Kok-bîn tsìng-hú thài hong-tông .

La̍k Thiat-chit kàu sí-hêng .
Iú kong bô sióng soah thiat-chit ,
Khêng-lâm chhim-chhim kì chi̍t-ji̍t ,
Tâi-ôan peh-sèⁿ thài láu-si̍t ,
Su-liām chó͘-kok sim ti̍t-ti̍t ,
Nà chai to-kháu boat phang-bi̍t ,
Phàn lí sí-chōe chin pháiⁿ chhit ,
Khêng-lâm phàn sí tōa hong-tōng ,
Thài-thài the̍h chîⁿ kóaⁿ so͘-thong ,
Bêng-bêng chheng-pe̍k pī oan-óng ,
Kok-bîn chèng-hú thài hong-tông .

Tshit Tshìng-siann liân-liân .
Khîng-lâm pī phàn sī tāng-huān ,
It khòng it tiâu ji̍p kuí-kuan ,
Ji̍p liáu kuí-kuan lân tit tsuán ,
Khîng-lâm pîng-tsīng bô ai-uàn ,
Hó-lâng pī sat ia̍h kam-guān ,
Jī-tsa̍p-it su tshiōnn tshenn-huan ,
Bû huat bû thian kuán Tâi-uân ,
Tshit lâng tāng-huān kuainn sann-king ,
La̍k-ê siàu-liân í khui-tshìng ,
Tshìng-siann ji̍p-ní bîng-bîng-bîng .

Chhit Chhèng-siaⁿ liân-liân .
Khêng-lâm pī phàn sī tāng-hōan ,
It khòng it tiâu ji̍p kúi-koan ,
Ji̍p liáu kúi-koan lân tit chóan ,
Khêng-lâm pêng-chēng bô ai-òan ,
Hó-lâng pī sat ia̍h kam-gōan ,
Jī-cha̍p-it su chhiōⁿ chheⁿ-hoan ,
Bû hoat bû thian kóan Tâi-ôan ,
Chhit lâng tāng-hōan koaiⁿ saⁿ-keng ,
La̍k-ê siàu-liân í khui-chhèng ,
Chhèng-siaⁿ ji̍p-ní bêng-bêng-bêng .

Peh Tô tshut kuí-mn̂g-kuan .
Ah-pà tsìng-kuân thian-hā tsua̍t ,
Bô king sím-phàn tio̍h tshìng-kuat ,
Tông-phuānn hîng-tiônn thâu bē ua̍t ,
Kàn i kun-pōo put i huat ,
La̍k-ê sik-iú lâi tshám-sí ,
Sik-lāi tsí tshun Khîng-lâm i ,
Tán-thāi kiò miâ hù sí-kî ,
Tsi̍t-hun tsi̍t-bió tshiōnn ián-hì ,
Hì-bûn tshut-hiān Pe̍h Tsông-hi ,
Kái-kiù Khîng-lâm bián hù-sí .

Peh Tô chhut kúi-mn̂g-koan .
Ah-pà chèng-kôan thian-hā choa̍t ,
Bô keng sím-phàn tio̍h chhèng-koat ,
Tông-phōaⁿ hêng-tiôⁿ thâu bē oa̍t ,
Kàn i kun-pō͘ put i hoat ,
La̍k-ê sek-iú lâi chhám-sí ,
Sek-lāi chí chhun Khêng-lâm i ,
Tán-thāi kiò miâ hù sí-kî ,
Chi̍t-hun chi̍t-bió chhiōⁿ ián-hì ,
Hì-bûn chhut-hiān Pe̍h Chông-hi ,
Kái-kiù Khêng-lâm bián hù-sí .

Káu It-sing m̄-sueh kok-gí .
Khîng-lâm tô-tshut kuí-mn̂g-kuan ,
Kuann-si tînn-sin bô sǹg uân ,
Siōnn khí tong-tshoo ê huán-luān ,
Sim-kuann put-sî kiat kui-uân ,
Kuān-tiónn kiann-sí tsáu khì bi̍h ,
Tī-an Khîng-lâm lâi uî-tshî ,
Kìng-jiân phàn guá Khîng-lâm sí ,
Tse sī Siánn-mi̍h ê tsìng-tī ,
Tsin sī jiá lâng tuā siū-khì ,
It-sing m̄-sueh in kok-gí .

Káu It-seng m̄-soeh kok-gí .
Khêng-lâm tô-chhut kúi-mn̂g-koan ,
Koaⁿ-si tîⁿ-sin bô sǹg ôan ,
Siōⁿ khí tong-chho͘ ê hóan-lōan ,
Sim-koaⁿ put-sî kiat kui-ôan ,
Kōan-tióⁿ kiaⁿ-sí cháu khì bi̍h ,
Tī-an Khêng-lâm lâi ûi-chhî ,
Kèng-jiân phàn góa Khêng-lâm sí ,
Che sī Siáⁿ-mi̍h ê chèng-tī ,
Chin sī jiá lâng tōa siū-khì ,
It-seng m̄-soeh in kok-gí .

Tsa̍p Hi-bāng ê Tâi-uân .
Li̍k-sú tsi̍t-bīn āu-tsiò-kiànn ,
Tâi-uân kiánn-sun bô-lâng thiànn ,
Thóng-phàinn siōnn khí tuā tshenn-kiann ,
Kuánn-kín buat-oo kóng bô-iánn ,
Khîng-lâm kiàn-tsìng tsáu tshut thiann ,
Hô-pîng sú-tsiá i kuà-miâ ,
Kóng tshut jī-jī-pat tsin-tsîng ,
Hi-bāng ta̍k-ke ài líng-tsīng ,
Lô-tsuí-khe it-tīng piàn tshing ,
Tâi-uân íng-uán ū hô-pîng .

Cha̍p Hi-bāng ê Tâi-ôan .
Le̍k-sú chi̍t-bīn āu-chiò-kiàⁿ ,
Tâi-ôan kiáⁿ-sun bô-lâng thiàⁿ ,
Thóng-phàiⁿ siōⁿ khí tōa chheⁿ-kiaⁿ ,
Kóaⁿ-kín boat-o͘ kóng bô-iáⁿ ,
Khêng-lâm kiàn-chèng cháu chhut thiaⁿ ,
Hô-pêng sú-chiá i kòa-miâ ,
Kóng chhut jī-jī-pat chin-chêng ,
Hi-bāng ta̍k-ke ài léng-chēng ,
Lô-chúi-khe it-tēng piàn chheng ,
Tâi-ôan éng-óan ū hô-pêng .