| 冊名 | 台灣白話史詩 |
| 編者 | 蔡奇蘭(鹿耳門漁夫) |
| 出版社 | 台笠出版社 |
| 出版年 | 1998 |
| 篇名 | 卷首：台灣通緒記(西元前246~西元1557) |
| 台灣 最早 叫 島夷 ， 島夷 二字 出 尚書 ， 尚書 出版 秦朝 時 ， 秦 距 今 二仟 餘 年 。 |
Tâi-uân tsuè-tsá kiò tó-î , Tó-î nn̄g-jī tshut siōng-si , Siōng-si tshut-pán Tsîn-tiâu sî , Tsîn kī kim nn̄g-tshing î nî . |
| 第二 古名 叫 東鯷 ， 出 在 漢書 地理 志 ， 東鯷 每 年 來 會稽 ， 朝貢 稱臣 拿 白旗 。 |
Tē-jī kóo-miâ kiò Tang-thî , Tshut tsāi hàn-su tē-lí tsì , Tang-thî muí nî lâi kuè-ki , Tiâu-kòng tshing-sîn gia̍h pe̍h-kî . |
| 第三 古名 叫 夷州 ， 夷州 出 在 沈 瑩 手 ， 臨海 水土志 伊 修 ， 伊 是 東吳 兮 太守 。 |
Tē-sann kóo-miâ kiò Î-tsiu , Î-tsiu tshut tsāi Sím Îng tshiú , Lîm-hái tsuí-thóo-tsì i siu , I sī Tong-ngôo ê thài-siù , |
| 記載 台灣 沒 霜雪 ， 草木 不死 無 染病 ， 四面 是 山 少 平地 ， 眾仙 快樂 笑嘿嘿 。 |
Kì-tsài Tâi-uân bô sng-seh , Tshó-bo̍k put-sú bô jiám-pēnn , Sì-bīn sī suann tsió pênn-tē , Tsiòng-sian khuài-lo̍k tshiò-he-he . |
| 第四 古名 叫 琉求 ， 隋煬帝 派 兵 征收 ， 朱 寬 陳 稜 大 出手 ， 土人 押回 中國 囚 。 |
Tē-sì kóo-mài kiò liû-kiû , Suî-iông-tè phài ping tsing-siu , Tsu Khuan Tân Lîng tuā tshut-tshiú , Thóo-lâng ah-huê Tiong-kok siû . |
| 這款 霸道 不 長久 ， 隋朝 政權 短短 休 ， 上天 處罰 有 理由 ， 台灣 寶地 不可 搶 。 |
Tsit-khuán pà-tō put tn̂g-kú , Suî-tiâu tsìng-kuân té-té hiu , Siōng-thian tshú-hua̍t ū lí-iû , Tâi-uân pó-tē m̄-thang tshiúnn . |
| 隋朝 至 宋 六佰 冬 ， 記載 台灣 沒半項 ， 尋 遍 古籍 白 費工 ， 證明 台灣 是 番邦 。 |
Suî-tiâu tsì Sòng la̍k-pah tang , Kì-tsài Tâi-uân bô-puànn-hāng , Tshuē piàn kóo-tsi̍k pe̍h huì-kang , Tsìng-bîng Tâi-uân sī huan-pang . |
| 番邦 寫 入 諸 番 記 ， 番 記 出版 南宋 時 ， 南宋 距 今 九佰 年 ， 諸 番 記載 有 兩篇 。 |
Huan-pang siá ji̍p tsu huan kì , Huan kì tshut-pán Lâm-sòng sî , Lâm-sòng kī kim káu-pah nî , Tsu huan kì-tsài ū nn̄g-phinn . |
| 趙 汝适 寫 番 生食 ， 袒裸 盱睢 毗 舍 耶 ， 原始 生活 睡 豬舍 ， 掠 人 取 頭 漢人 驚 。 |
Tiō Lú-kuat siá huan tshenn-tsia̍h , Thán-ló hu-sui pî sià iâ , Guân-sí sing-ua̍h khùn ti-sià , Lia̍h lâng tshú thâu hàn-jîn kiann . |
| 樓 鑰 撰寫 玫媿 集 ， 平湖 二字 文獻 入 ， 台灣 沒名 較 不 及 ， 兩地 不通 皆 獨立 。 |
Lôo io̍k tsuān-siá muî-kuì tsi̍p , Pîng-ôo nn̄g-jī bûn-hiàn ji̍p , Tâi-uân bô-miâ khah put ki̍p , Lióng-tē put-thong kai to̍k-li̍p . |
| 又 寫 生番 攻 平湖 ， 軍兵 被 殺 土土土 ， 盡 刈 所 種 沒 留步 ， 大 罵 毗 舍 耶 可惡 。 |
Iū siá tshenn-huan kong Pîng-ôo , Kun-ping pī sat thôo-thôo-thôo , Tsīn kuah sóo tsìng bô lâu-pōo , Tuā mā pî sià iâ khó-ònn . |
| 南宋 滅亡 換 元朝 ， 辦理 鹽 稅 島民 繳 ， 巡檢 司媽宮 地標 ， 台灣 代誌 無 半條 。 |
Lâm-sòng bia̍t-bông uānn Guân-tiâu , Pān-lí iâm suè tó-bîn kiáu , Sûn-kiám Su-má-king tē-phiau , Tâi-uân tāi-tsì bô puànn-tiâu . |
| 元朝 滅亡 換 明代 ， 台灣 出現 慢慢 來 ， 第一 周 嬰 有 了解 ， 所 著 東番記 有 載 。 |
Guân-tiâu bia̍t-bông uānn Bîng-tāi , Tâi-uân tshut-hiān bān-bān lâi , Tē-it Tsiu Ing ū liáu-kái , Sóo tù tang-huan-kì ū tsài . |
| 指 出 安平 近 內海 ， 台江 海灣 好 所在 ， 討 掠 漁船 連 帆 排 ， 漢 番 東洋 有 往來 。 漁貨 鹿皮 交易 開 ， 無 主 管轄 鬧猜猜 ， |
Tsí tshut An-pîng kīn lāi-hái , Tâi-kang hái-uan hó sóo-tsāi , Thó lia̍h hî-tsûn liân phâng pâi , Hàn huan tang-iûnn ū óng-lâi , Hî-huè lo̍k-phuê kau-i̍k khai , Bô tsú kuán-ha̍t nāu-tshai-tshai . |
| 台灣 當時 無 人 管 ， 周 嬰 命名 叫 台員 。 閩 書 作者 何 喬遠 ， 又 將 台員 改 大員 ， |
Tsî-uân tong-sî bô lâng kuán , Tsiu Ing bīng-miâ kiò Tâi-uân , Bîn su tsok-tsiá Hô Kiâu-uán , Iū tsiong Tâi-uân kái Tāi-uân , |
| 台員 大員 音 同款 ， 最後 為何 叫 台灣 ？ 原因 出 在 何 喬遠 ， 喬遠 著 書 自己 反 。 |
Tâi-uân Tāi-uân im kâng-khuán , Tsuè-āu uī-hô kiò Tâi-uân ? Guân-in tshut tsāi Hô Kiâu-uán , Kiâu-uán tù su tsū-kí huán . |
| 鏡 山 全 集 文學 味 ， 作者 喬遠 愛 歌詩 ， 台灣 二字 有 詩意 ， 海灣 曲線 像 長絲 ， |
Kìng san tsuân tsi̍p bûn-ha̍k bī , Tsok-tsiá Kiâu-uán ài kua-si , Tâi-uân nn̄g-jī ū si-ì , Hái-uan khiok-suànn tshiōnn tn̂g-si . |
| 風 吹 長絲 風景 美 ， 蓬萊 仙島 太 神奇 ， 明朝 打開 伊 神秘 ， 世界 各國 注意 伊 。 |
Hong tshue tn̂g-si hong-kíng suí , Hông-lâi sian-tó thài sîn-kî , Bîng-tiâu phah-khui i sîn-pì , Sè-kài kok-kok tsù-ì i . |
| 十六 世紀 中期 後 ， 日本 倭寇 開始 鬧 ， 勾結 海賊 用 大炮 ， 中國 沿海 被 困擾 。 |
Tsa̍p-la̍k sè-kí tiong-kî āu , Ji̍t-pún o-khòo khai-sí nāu , Kau-kiat hái-tsha̍t iōng tuā-phàu , Tiong-kok iân-hái pī khùn-jiáu . |
| 明朝 官員 管 無效 ， 海賊 泅 過 黑水溝 ， 台灣 變成 海賊 巢 ， 明 軍 炮 擊 追 不 到 。 |
Bîng-tiâu kuann-uân kuán bô-hāu , Hái-tsha̍t siû kuè oo-tsuí-kau , Tâi-uân piàn-sîng hái-tsha̍t tsâu , Bîng kun phàu kik tui bē kàu . |
| 公元 壹伍伍柒 年 ， 台灣 山脈 青青青 ， 藍天 白雲 浪 平平 ， 葡萄牙 船 行 海墘 。 |
Kong-uân it-ngóo-ngóo-tshit nî , Tâi-uân suann-me̍h tshinn-tshinn-tshinn , Nâ-thinn pe̍h-hûn lōng pînn-pînn , Phô-tô-gâ tsûn kiânn hái-kînn . |
| 花鹿 伴 子 在 溪邊 ， 世外桃源 初次見 ， 船 上 水手 感謝 天 。 |
Hue-lo̍k phuānn kiánn tsāi khé-pinn , Sè-guā-thô-guân tshoo-tshù-kìnn , Tsûn siōng tsuí-tshiú kám-siā thinn . |
| 水手 向 天 笑哈哈 ， 喊 出 喔 福爾摩沙 ， 美麗之島 響 天下 |
Tsuí-tshiú hiòng thinn tshiò-ha-ha , Huah tshut oo hū-o-móo-sà , Lí-lē-tsi-tó hiáng thian-hā |
