| 冊名 | 尤清博士選縣長歌 |
| 編者 | 林錦賢改編 |
| 出版社 | 尤清通訊 |
| 出版年 | 1989 |
| 篇名 | 全本 |
| 尤 清 博士 來 出身 ， 一片 奉獻 兮 精神 ， 社會 人士 有 公認 ， 縣長 適當 候選人 。 |
Iû Tshing phok-sū lâi tshut-sin , Tsi̍t-phiàn hōng-hiàn ê tsing-sîn ; Siā-huē jîn-sū ū kong-jīn , Kuān-tiúnn sik-tòng hāu-suán-jîn . |
| 尤 清 留學 兮 博士 ， 比評 別儂 無 卡 輸 ， 當選 對 咱 有 好處 ， 四年 了後 知 工夫 。 |
Iû Thing liû-ha̍k ê phok-sū , Pí-phīng pa̍t-lâng bô khah su , Tòng-suán tuì lán ū hó-tshù , Sì-nî liáu-āu tsai kang-hu . |
| 現在 縣長 林 豐正 ， 這回 應該 換 尤 清 ， 是 好 是 歹 有 比評 ， 無 換 全然 無 競爭 。 |
Hiān-tsāi kuān-tiúnn Lîm Hong-tsìng , Tsit-huê ìng-kai uānn Iû Tshing , Sī hó sī pháinn ū pí-phīng , Bô uānn tsuân-jiân bô kīng-tsing . |
| 有 換 自然 愛 交賬 ， 無 換 仝黨 好 報銷 ， 免講 恁 亦 會 分曉 ， 所以 愛 換 尤 清 朝 。 |
Ū uānn tsū-jiân ài kau-siàu , Bô uānn kâng-tóng hó pò-siau , Bián-kóng lín ia̍h ē hun-hiáu , Sóo-í ài uānn Iû Tshing tiâu . |
| 以前 全 是 國民黨 ， 予 人因 閣 做 無 啥 通 ， 請 恁 逐家 鬥 運動 ， 政府 即 有 新 作風 。 |
Í-tsîng tsuân sī Kok-bîn-tóng , Hōo in koh tsuè bô siánn thong , Tshiánn lín ta̍k-ke tàu ūn-tōng , Tsìng-hú tsiah ū sin tsok-hong . |
| 過去 一黨 塊 專制 ， 食虧 就 是 咱 逐家 ， 買 物 會曉 貨 比 貨 ， 愛勿 閣 奉 騙 玲瓏旋 。 |
Kuè-khì tsi̍t-tóng teh tsuan-tsè , Tsia̍h-khui tio̍h sī lán ta̍k-ke , Bé mi̍h ē-hiáu huè pí huè , Mài koh hōng phiàn ling-long-se̍h . |
| 這回 應該 換 黨派 ， 免 笑 黨外 無 人才 ， 換 予 尤 清 做 看覓 ， 有 好 下任 即 閣 來 。 |
Tsit-huê ìng-kai uānn tóng-phài , Bián tshiò tóng-guā bô jîn-tsâi , Uānn hōo Iû Tshing tsuè khuànn-māi , Ū hó ē-jīm tsiah koh lâi . |
| 尤 清 縣長 若 選 朝 ， 咱 予 尤 清 會勿 假痟 ， 政見 逐項 照 對賬 ， 國民黨 會 顧朝朝 。 |
Iû Tshing kuān-tiúnn nā suán tiâu , Lán hōo Iû Tshing bē ké-siáu , Tsìng-kiàn ta̍k-hāng tsiàu tuì-siàu , Kok-bîn-tóng ē kòo-tiâu-tiâu . |
| 想 卜 歪哥 穩 著吊 ， 無仝 黨派 歹 催撨 ， 無影 恁 即 來 幹撟 ， 肚臍 來 想 嘛 明瞭 。 |
Siūnn beh uai-ko ún tio̍h-tiàu , Bô-kâng tóng-phài pháinn tshui-tshiâu , Bô-iánn lín tsiah lâi kàn-kiāu , Tōo-tsâi lâi siūnn mā bîng-liâu . |
| 尤 清 當選 大家樂 ， 保證 毋敢 來 歪哥 ， 卜 選 彼 黨 無 可靠 ， 了工 不如 來  迌 。 |
Iû Tshing tòng-suán tài-tsia-lò , Pó-tsìng m̄-kánn lâi uai-ko , Beh suán hit tòng bô khó-khò , Liáu-kang put-jû lâi tshit-thô . |
| 三峽 樹林 透 泰山 ， 板橋 土城 媽祖 塍 ， 真儕 彼日 錢 毋 趁 ， 無 選 尤 清 心 不安 。 |
Sam-kiap Tshiū-nâ thàu Thài-san , Pán-kiô Thóo-siânn Má-tsóo tshân , Tsin-tsē hit-ji̍t tsînn m̄ thàn , Bô suán Iû Tshing sim put-an . |
| 新莊 林口 透 五股 ， 八里 蘆洲 三重埔 ， 無 選 尤 清 真 艱苦 ， 選 予 別儂 無 前途 。 |
Sin-tsng Nâ-kháu thàu Gōo-kóo , Pa̍t-lí Lôo-tsiu Sann-tîng-poo , Bô suán Iû Tshing tsin kan-khóo , Suán hōo pa̍t-lâng bô tsiân-tôo . |
| 中和 新店 透 烏來 ， 知影 尤 清 好 人才 ， 過去 縣政 真 失敗 ， 卜 選 尤 清 通 儂 知 。 |
Tiong-hô Sin-tiàm thàu oo-lai , Tsai-iánn Iû tshing hó jîn-tsâi , Kuè-khì kuān-tsìng tsin sit-pāi , Beh suán Iû Tshing thong lâng tsai . |
| 龜山 閣 去 坪林 尾 ， 有 做 水庫 錢 無 賠 ， 一概 編 入 水源地 ， 只 有 會當 種 粗茶 。 |
Ku-suann koh khì Phênn-nâ bué , Ū tsuè tsuí-khòo tsînn bô puê , It-khài pian ji̍p tsuí-guân-tē , Tsí ū ē-tàng tsìng tshoo-tê . |
| 想 卜 震動 受 限制 ， 別儂 食飯 咱 食糜 ， 無 欠 彼黨 死儂債 ， 所 有 票聲 尤 清 兮 。 |
Siūnn beh tín-tāng siū hān-tsè , Pa̍t-lâng tsia̍h-puīnn lán tsia̍h-bê , Bô khiàm hit-tóng sí-lâng-tsè , Sóo ū phiò-siann Iû Tshing ê . |
| 平溪 深 坑 透 石碇 ， 大大 細細 選 尤 清 ， 選 予 別儂 無路用 ， 想 卜 改進 無可能 。 |
Pênn-khe Tshim khenn thàu Tsio̍h-tīng , Tuā-tuā sè-sè suán Iû Tshing , Suán hōo pa̍t-lâng bô-lōo-īng , Siūnn beh kái-tsìn bô-khó-lîng . |
| 澳底 貢寮 透 雙溪 ， 卜 選 尤 清 却 和齊 ， 想 着 過去 真 後悔 ， 閣 選 彼黨 儂 會 衰 。 |
Ò-té Kòng-liâu thàu Siang-khe , Beh suán Iû Tshing khioh hô-tsê , Siūnn tio̍h kuè-khì tsin hōo-hué , Koh suán hit-tóng lâng ē sue . |
| 雙溪 牡丹 透 瑞芳 ， 人民 強強 卜 夯狂 ， 地 方 建設 真 失望 ， 希望 尤 清 會 成功 。 |
Siang-khe Bóo-tan thàu Suī-hong , Jîn-bîn kiông-kiông beh giâ-kông , Tē huinn kiàn-siat tsin sit-bōng , Hi-bāng Iû Tshing ē sîng-kong . |
| 八里 竹圍 透 淡水 ， 政府 白賊 港 無 開 ， 現現 好勢 換 別位 ， 卜 選 尤 清 歸 大堆 。 |
Pat-lí Tik-uî thàu Tām-suí , Tsìng-hú pe̍h-tsha̍t káng bô khui , Hiān-hiān hó-sè uānn pa̍t-uī , Beh suán Iû Tshing kui tuā-tui . |
| 愛勿 信 彼黨 鑽石 喙 ， 頭路 無 做 噴雞歸 ， 愛勿閣 聽 人因 烏 白 屁 ， 選 予 尤 清 勿會 克虧 。 |
Mài sìn hit-tóng suān-tsio̍h tshuì , Thâu-lōo bô tsuè pûn-ke-kui , Mài-koh thiann in oo pe̍h phuì , Suán hōo Iû Tshing bē khik-khui . |
| 金山 石門 透 三芝 ， 對 咱 尤 清 大 支持 ， 講 着 以往 真 受氣 ， 地 方 建設 無 半絲 。 |
Kim-san Tsio̍h-muînn thàu Sam-tsi , Tuì lán Iû Tshing tuā tsi-tshî , Kóng tio̍h í-óng tsin siū-khì , Tē huinn kiàn-siat bô puànn-si . |
| 迴龍 樹林 透 鶯歌 ， 無 選 尤 清 算 勿會和 ， 對 人因 彼黨 真 清楚 ， 辦事 親像 龜 塊 趖 。 |
Huê-liông Tshiū-nâ thàu Ing-ko , Bô suán Iû Tshing suìnn bē-hô , Tuì in hit-tóng tsin tshing-tshó , Pān-sū tshin-tshiūnn ku teh sô . |
| 萬里 野柳 石 門洞 ， 金山 老梅 阿里 旁 ， 有 魚 毋 掠 鬥 運動 ， 尤 清 當選 刣 豬公 。 |
Bān-lí Iá-liú Tsio̍h muînn-tōng , Kim-san Láu-muî A-lí pông , Ū hî m̄ lia̍h tàu ūn-tōng , Iû Tshing tòng-suán thâi ti-kong . |
| 福隆 澳底 貢仔寮 ， 卜 設 核四 食 勿會 消 ， 人民 性命 無 重要 ， 顧 想 趁錢 為 目標 。 |
Hok-liông Ò-té Kòng-á-liâu , Beh siat hi̍k-sù tsia̍h bē siau , Jîn-bîn sènn-miā bô tiōng-iàu , Kòo siūnn thàn-tsînn uī bo̍k-piau . |
| 可惡 大官 若像 妖 ， 莫怪 百姓 暴暴跳 ， 映望 核四 來 吊消 ， 最大 希望 尤 清 朝 。 |
Khó-ònn tuā-kuann ná-tshiūnn iau , Bo̍k-kuài peh-sènn pho̍k-pho̍k-thiàu , Uìnn-bāng hi̍k-sù lâi tiàu-siau , Tsuè-tuā hi-bāng Iû Tshing tiâu . |
| 永和 埔墘 港仔喙 ， 真儕 暗中 塊 鼓吹 ， 尤 清 無 朝 大 漏氣 ， 放尿 抄沙 勿會 做堆 。 |
Íng-hô Poo-kînn Káng-á-tshuì , Tsin-tsē àm-tiong teh kóo-tshui , Iû Tshing bô tiâu tuā làu-khuì , Pàng-jiō tsiau-sua bē tsò-tui . |
| 中和 板橋 透 土城 ， 真 早 以前 有 風聲 ， 知影 這回 大 捙拼 ， 會 死 愛 予 尤 清 贏 。 |
Tiong-hô Pán-kiô thàu Thôo-siânn , Tsin tsá í-tsîng ū hong-siann , Tsai-iánn tsit-huê tuā tshia-piànn , Ē sí ài hōo Iû tshing iânn . |
| 今 嘛 逐家 攏 覺醒 ， 咱 奉 惡霸 四十 年 ， 第一 食虧 咱 百姓 ， 無 換 咱 勿會 出頭天 。 |
Tann mā ta̍k-ke lóng kak-tshínn , Lán hōng ok-pà sì-tsa̍p nî , Tē-it tsia̍h-khui lán peh-sìnn , Bô uānn lán bē tshut-thâu-thinn . |
| 為 咱 北縣 會 進步 ， 為 咱 北縣 兮 前途 ， 剝脫 過去 兮 痛苦 ， 唯一 尤 清 愛 擁護 。 |
Uī lán Pak-kuān ē tsìn-pōo , Uī lán Pak-kuān ê tsiân-tôo , Pak-thuat kuè-khì ê thòng-khóo , Uî-it Iû Tshing ài ióng-hōo . |
| 這回 算 是 生死戰 ， 北縣 範圍 全 炮煙 ， 尤 清 當選 有 體面 ， 免 予 別儂 來 假仙 。 |
Tsit-huê sǹg sī senn-sí-tsiàn , Pak-kuān huān-uî tsuân phàu-ian , Iû Tshing tòng-suán ū thé-biān , Bián hōo pa̍t-lâng lâi ké-sian . |
| 尤 清 無 朝 真 無采 ， 別儂 繼續 閣 嫐俳 ， 所以 准 勝 不 准 敗 ， 拼輸 笑 咱 大箍呆 。 |
Iû Tshing bô tiâu tsin bô-tshái , Pa̍t-lâng kè-sio̍k koh hiau-pai , Sóo-í tsún sìng put tsún pāi , Piànn-su tshiò lán tuā-khoo-tai . |
| 尤 清 縣長 第二 擺 ， 台北縣下 通 儂 知 ， 這回 若是 閣 失敗 ， 下回 無儂 敢 出來 。 |
Iû Tshing kuān-tiúnn tē-jī pái , Tâi-pak-Kuān-ē thong lâng tsai , Tsit-huê nā-sī koh sit-pāi , Ē-huê bô-lâng kánn tshut--lâi . |
| 縣長 歸氣 用 官派 ， 毋免 勞民 兼 傷財 ， 咱 着 認真 想 看覓 ， 縣長 着 咱 來 摧排 。 |
Kuān-tiúnn kui-khì īng kuann-phài , M̄-bián lô-bîn kiam siong-tsâi , Lán tio̍h jīn-tsin siūnn khuànn-māi , Kuān-tiúnn tio̍h lán lâi tshui-pâi . |
| 黨內 縣長 若 傀儡 ， 另外 後面 有 頭家 ， 有事 轉去 問 老父 ， 家自 毋敢 烏白批 。 |
Tóng-lāi kuān-tiúnn ná ka-lé , Liān-guā āu-bīn ū thâu-ke , Ū-sū tńg-khì muīnn lāu-pē , Ka-kī m̄-kánn oo-pe̍h-phue . |
| 黨外 縣長 好 負責 ， 無 受 頂面 兮 壓力 ， 只 顧 人民 兮 利益 ， 是 伊 最 大 兮 目的 。 |
Tóng-guā kuān-tiúnn hó hū-tsik , Bô siū tíng-bīn ê ap-li̍k , Tsí kòo jîn-bîn ê lī-ik , Sī i tsuè tuā ê bo̍k-tik . |
| 有 儂 毋捌 嚴重性 ， 主張 咱 遮 開 繳宮 ， 彼款 縣長 感 通用 ， 咱 做 人民 死 大先 。 |
Ū lâng m̄-bat giâm-tiōng-sìng , Tsú-tiunn lán tsia khui kiáu-king , Hit-khuán kuān-tiúnn kám thang-īng , Lán tsuè jîn-bîn sí tāi-sing . |
| 勿會曉 見笑 彼 口灶 ， 大官 細官 卜 總包 ， 派 出 人選 全 阿斗 ， 准 做 青瞑 票 無 投 。 |
Bē-hiáu kiàn-siàu hit kháu-tsàu , Tuā-kuann sè-kuann beh tsóng-pau , Pài tshut jîn-suán tsuân a-táu , Tsún tsuè tshenn-mê phiò bô tâu . |
| 辦事 勿會曉 知 重點 ， 請請 裁裁 無 方針 ， 彼班 跤數 無 缺欠 ， 免 閣 死豬 來 鎮砧 。 |
Pān-sū bē-hiáu tsai tiōng-tiám , Tshìn-tshìn tshái-tshái bô hong-tsiam , Hit-pan kha-saiù bô khuat-khiàm , Bián koh sí-ti lâi tìn-tiam . |
| 尤 清 登記 第六號 ， 汝 咱 逐家 愛 協和 ， 親晟 朋友 緊 相 報 ， 當選 是 恁 兮 功勞 。 |
Iû Tshing ting-kì tē-la̍k-hō , Lí lán ta̍k-ke ài hia̍p-hô , Tshin-tsiânn pîng-iú kín sio pò , Tòng-suán sī lín ê kong-lô . |
| 對手 確實 真 厲害 ， 經過 設計 閣 安排 ， 光復 彳各 今 毋捌 敗 ， 伊 無 準備 毋敢 來 。 |
Tuì-tshiú khak-si̍t tsin lī-hāi , King-kuè siat-kè koh an-pâi , Kong-ho̍k kàu tann m̄-ba̍t pāi , I bô tsún-pī m̄-kánn lâi . |
| 所以 尤 清 真 苦戰 ， 在 佇 生 死 兮 邊緣 ， 會得 奇蹟 來 出現 ， 汝 是 貴人 大 神仙 。 |
Sóo-í Iû Tshing tsin khóo-tsiàn , Tsāi tì senn sí ê pian-iân , Ē-tit kî-tsik lâi tshut-hiān , Lí sī kuì-jîn tuā sîn-sian . |
| 票聲 咱 愛 拴 雙倍 ， 再 三 懇求 咱 逐家 ， 這項 佮 咱 大 關係 ， 予 伊 拜託 毋通 推 。 |
Phiò-siann lán ài tshuân siang-puē , Tsài sann khún-kiû lán ta̍k-ke , Tsit-hāng kah lán tuā kuan-hē , Hōo i pài-thok m̄-thang the . |
| 欠 汝 一票 勿會 得 過 ， 汝 無 支持 穩 落第 ， 絕對 毋通 相 靠勢 ， 縣長 會 閣 別儂 兮 。 |
Khiàm lí tsi̍t-phiò bē tit kè , Lí bô tsi-tshî ún lo̍k-tē , Tsua̍t-tuì m̄-thang siunn khò-sè , Kuān-tiúnn ē koh pa̍t-lâng ê . |
| 票數 愛 着 七十 萬 ， 尤 清 亦閣 有 困難 ， 咱 緊 團結 力 緊 贊 ， 毋驚 大炮 扑 勿會 陳 。 |
Phiò-sòo ài tio̍h tshit-tsa̍p bān , Iû Tshing ia̍h-koh ū khùn-lân , Lán kín thuân-kiat la̍t kín tsàn , M̄-kiann tuā-phàu phah bē tân . |
| 對方 選舉 派 部隊 ， 這點 尤 清 上 食虧 ， 三軍 人馬 剿 彳各位 ， 咱 無 團結 難 解圍 。 |
Tuì-hong suán-kí phài pōo-tuī , Tsit-tiám Iû Tshing siōng tsia̍h-khui , Sam-kun jîn-má tsâu kàu-uī , Lán bô thuân-kiat lân kái-uî . |
| 對方 真敖力 做 跤 手 ， 票聲 會 偆 亦 會 勼 ， 手法 會 粗 亦 會 幼 ， 咱 無 注意 命 會 休 。 |
Tuì-hong tsin-gâu tsuè kha tshiú , Phiò-siann ē tshun ia̍h ē kiu , Tshiú-huat ē tshoo ia̍h ē iù , Lán bô tsú-ì miā ē hiu . |
| 閣 無 當選 會 奉 笑 ， 無 汝 支持 穩 勿會 着 ， 尤 清 無 朝 真 可惜 ， 厝邊 隔壁 緊 相招 。 |
Koh bô tòng-suán ē hōng tshiò , Bô lí tsi-tshî ún bē tio̍h , Iû Tshing bô taiû tsin khó-sioh , Tshù-pinn keh-piah kín sio-tsio . |
| 朋友 電話 着 緊 叫 ， 吹撨 選票 壓 予 着 ， 愛勿 講 小小 兮 一票 ， 是 卜 當選 特效藥 。 |
Pîn-iú tiān-uē tio̍h kín kiò , Tshui-tshiâu suán-phiò ah hoo tio̍h , Mài kóng sió-sió ê tsi̍t-phiò , Sī beh tòng-suán ti̍k-hāu-io̍h . |
| 汝 兮 一票 真 寶貴 ， 咱 有 權利 緊 發揮 ， 免閣 予 儂 彈 臭屁 ， 選 贏 笑 甲 喙 開開 。 |
Lí ê tsi̍t-phiò tsin pó-kuì , Lán ū kuân-lī kín huat-hui , Bián-koh hōo jîn tāunn tshàu-phuì , Suán iânn tshiò kah tshuì khui-khui . |
| 這 是 一場 大 決鬥 ， 北縣 地區 亂抄抄 ， 咱 兮 火力 拴 予彳各 ， 功勞 即 勿會 放 水 流 。 |
Tse sī tsi̍t-tiûnn tuā kuat-tàu , Pak-kuān tē-khu luān-tshau-tshau , Lán ê hué-la̍t tshuân hoo-kàu , Kong-lô tsiah bē pàng tsuí lâu . |
| 咱 知 開票 滾輪拵 ， 票聲 愛着 量 有 偆 ， 若 無 縣長 無 咱 份 ， 愛 緊 票桶 認真 巡 。 |
Lán tsai khui-phiò khún-lûn-tsūn , Phiò-siann ài-tio̍h liōng ū tshun , Nā bô kuān-tiúnn bô lán hūn , Ài kín phiò-tháng jīn-tsin sûn . |
| 毋管 好天 亦 落雨 ， 早起 無 去 換 下晡 ， 一定 相  投票所 ， 無去 尤 清 土土土 。 |
M̄-kuán hó-thinn iah lo̍h-hōo , Tsá-khí bô khì uānn ē-poo , It-tīng sio-tshuā tâu-phiò-sóo , Bô-khì Iû Tshing thôo-thôo-thôo . |
| 無影 社會 無 公正 ， 攏 是 西瓜 倚 大爿 ， 錦上添花 無路用 ， 想 予 清楚 選 尤 清 。 |
Bô-iánn siā-huē bô kong-tsìng , Lóng sī si-kue uá tuā-pîng , Gím-siōng-thiam-hua bô-lōo-īng , Siūnn hoo tshing-tshó suán Iû Tshing . |
| 伊 是 為 咱 做 縣政 ， 肯 為 逐家 來 犧牲 ， 期待 美麗 兮 遠景 ， 尤 清 當選 咱 光榮 。 |
I sī uī lán tsuè kuān-tsìng , Khíng uī ta̍k-ke lâi hi-sing , Kî-thāi bí-lē ê uán-kíng , Iû Tshing tòng-suán lán kong-îng . |
