| 冊名 | 戶蠅蚊仔大戰歌 |
| 編者 | 林有來改編 |
| 出版社 | 竹林書局 |
| 出版年 | 1987 |
| 篇名 | 下本 |
| 燕仔 看了 無 套棟 ， 隨時 吐出 白劍光 ， 蜘蛛 一派 算 空洞 ， 伊 有 十分 塊 知防 ， |
Ìnn-á khuànn-liáu bô thò-tòng , Suî-sî thòo-tshut pe̍h-kiàm-kong , Ti-tu tsi̍t-phài sǹg Khong-tōng , I ū tsa̍p-hun teh ti-hông , |
| 蜘蛛 放出 青光劍 ， 伊 个 劍尾 野 恰 尖 ， 兩平 劍光 金閃閃 ， 乎 伊 切斷 碎塩塩 。 |
Ti-tu pàng-tshut tshinn-kong-kiàm , I ê kiàm-bué iá khah tsiam , Nn̄g-pîng kiàm-kong kim-siám-siám , Hōo i tshiat-tn̄g tshuì-iâm-iâm . |
| 白光 煞 乎 伊 切斷 ， 青 个 劍肉 有 恰 長 ， 闘營 劍 閣 收 倒返 ， 門｜着 草耳 入 陣門 。 |
Pe̍h-kong suah hōo i tshiat-tn̄g , Tshinn ê kiàm-bah ū khah tn̂g , Tàu-iânn kiàm koh siu tò-tńg , Tú-tio̍h tsháu-ní li̍p tīn-mn̂g . |
| 草耳 接陣 伊 無 問 ， 二枝 鐵尺 丈外長 ， 見面 隨時 跳 倒返 ， 卜 戍 蜘蛛 兮 腳倉 。 |
Tsháu-ní tsiap-tīn i bô bn̄g , Nn̄g-ki thi̍h-tshioh tn̄g-guā-tn̂g , Kìnn-bīn suî-sî thiàu tò-tńg , Beh sut ti-tu ê kha-tshng . |
| 蜘蛛 看着 伊 暗器 ， 世間 那 有 這 二枝 ， 都是 案仔 吾梅刺 ， 娘娘 十分 塊 張池 。 |
Ti-tu khuànn-tio̍h i àm-khì , Sè-kan nà ū tsit nn̄g-ki , To-sī at-á gôo-muî-tshì , Niû-niû tsa̍p-hun teh tiunn-tî . |
| 蜘蛛 手 提 乾坤袋 ， 四句 咒語 不免 加 ， 乎 伊 收落 袋仔底 ， 無人 通 救 伊 一个 。 |
Ti-tu tshiú the̍h khiân-khun-tē , Sì-kù tsiù-gú m̄-bián ke , Hōo i siu-lo̍h tē-á-té , Bô-lâng thang kiù i tsi̍t-ê . |
| 大蟬 知影 走來 叫 ， 去報 烏秋 甲 來葉 ， 想 無 計智 真 可惜 ， 乾坤寶袋 偷 袂 着 。 |
Tuā-siân tsai-iánn tsáu-lâi kiò , Khì-pò oo-tshiu kah lāi-hio̍h , Siūnn bô kè-tì tsin khó-sioh , Khiân-khun-pó-tē thau buē tio̍h . |
| 鳥鼠 卜 咬 乾坤袋 ， 去 招 石降 甲 水蛙 ， 石降 鵠仔 打 三下 ， 三更 卜 共 伊 偷提 。 |
Niáu-tshí beh kā khiân-khun-tē , Khì tsio tsio̍h-kàng kah tsuí-ke , Tsio̍h-kàng khok-á phah sann-ē , Sann-kinn beh kā i thau-the̍h . |
| 鳥鼠 伊 卜 入 陣內 ， 串 對 壁空 無人知 ， 蜘蛛 娘娘 真 利害 ， 知影 鳥鼠 串 入 來 。 |
Niáu-tshí i beh li̍p tīn-lāi , Tsǹg tuì piah-khang bô-lâng-tsai , Ti-tu niû-niû tsin lī-hāi , Tsai-iánn niáu-tshí tsǹg li̍p lâi . |
| 娘娘 手 提 天羅網 ， 鳥鼠 隨時 走 無 空 ， 乎 伊 崁 落 袂 珍動 ， 大聲 治塊 吪 救人 。 |
Niû-niû tshiú the̍h thian-lô-bāng , Niáu-tshí suî-sî tsáu bô khang , Hōo i khàm lo̍h buē tín-tāng , Tuā-siann tī-teh huah kiù-lâng . |
| 乎 伊 塊着 舌舌叫 ， 娘娘 看 伊 全 無 着 ， 鳥鼠 來 輸 真 可惜 ， 後來 好得 伊 來葉 。 |
Hōo i teh--tio̍h tsi̍h-tsi̍h-kiò , Niû-niû khuànn i tsuân bô tio̍h , Niáu-tshí lâi su tsin khó-sioh , Āu--lâi hó-tit i lāi-hio̍h . |
| 來葉 來 加 夾 塊 走 ， 走 到 崑崙 个 山頭 ， 好得 天尊 赶 來 到 ， 野無 袂得 返 因兜 。 |
Lāi-hio̍h lâi ka giap teh tsáu , Tsáu kàu Khun-lûn ê suann-thâu , Hó-tit Thian-tsun kuánn lâi kàu , Iá-bô buē-tit tńg in-tau . |
| 鱔魚 伊 去 觀星宿 ， 蜘蛛 性命 袂 皆 休 ， 亦有 救星 通 來 救 ， 來 共 大蛇 說 理由 。 |
Siān-hî i khì kuan-sing-siù , Ti-tu sìnn-miā buē kai hiu , Ia̍h-ū kiù-tshinn thang lâi kiù , Lâi kā tuā-tsuâ seh lí-iû . |
| 大蛇 吐出 毒 烟霧 ， 毒氣 卜傷 伊 蜘蛛 ， 蜘蛛 河光 本成 有 ， 毒光 袂 瓦 伊 身軀 。 |
Tuā-tsuâ thòo-tshut to̍k ian-bū , To̍k-khì beh-siong i ti-tu , Ti-tu hô-kong pún-tsiânn ū , To̍k-kong buē uá i sin-khu . |
| 蝴蝶 夯頭 塊 觀望 ， 連 放 三枝 紅劍光 ， 卜傷 蜘蛛 因 妖黨 ， 來 助 大蛇 兮 威風 。 |
Ôo-tia̍p gia̍h-thâu teh kuan-bōng , Liân pàng sann-ki âng-kiàm-kong , Beh-siong ti-tu in iau-tóng , Lâi tsōo tuā-tsuâ ê ui-hong . |
| 蜘蛛 伊 有 護身鏡 ， 劍光 袂 瓦 先 知影 ， 蝴蝶 想卜 顧 生命 ， 卜 走 無路 通好 行 。 |
Ti-tu i ū hōo-sin-kiànn , Kiàm-kong bē uá sing tsai-iánn , Ôo-tia̍p siūnn-beh kòo sìnn-miā , Beh tsáu bô-lōo thang-hó kiânn . |
| 娘娘 發起 乾坤袋 ， 將 劍 收收 做 一下 ， 蝴蝶 看了 不是 世 ， 從 劍 收返 緊 回家 。 |
Niû-niû huat-khí khiân-khun-tē , Tsiong kiàm siu-siu tsuè tsi̍t-ē , Ôo-tia̍p khuànn-liáu m̄-sī sè , Tsiong kiàm siu-tńg kín huê-ke . |
| 田嬰 做人 上 鐵齒 ， 仙師 叫 伊 夯 戰旗 ， 崑崙 正派 四 大字 ， 空洞 喜平 也 知枝 。 |
Tshân-inn tsuè-lâng siōng thi̍h-khí , Sian-su kiò i giâ tsiàn-kî , Khun-lûn tsiànn-phài sì tuā-lī , Khong-tông hit-pîng iā tsai-ki . |
| 空洞 伊 有 野蠻 黨 ， 有 學 邪法 兮 劍光 ， 寶貝 也是 極 套棟 ， 移山 倒海 件件 通 。 |
Khong-tông i ū iá-bân tóng , Ū o̍h siâ-huat ê kiàm-kong , Pó-puè iā-sī ki̍k thò-tòng , Î-san tó-hái kiānn-kiānn thong . |
| 崑崙 劍仙 是 白鶴 ， 相刣 伊 也 免 用 刀 ， 孔雀 寶貝 也 真好 ， 仙家 法術 不是 無 。 |
Khun-lûn kiàm-sian sī pe̍h-ho̍h , Sio-thâi i iā bián īng to , Khóng-tshiok pó-puè iā tsin-hó , Sian-ka huat-su̍t m̄-sī bô . |
| 水牛 腸肚 上 大桶 ， 鹿駝 練成 金光枋 ， 卜 來 打破 蜘蛛網 ， 連打 三下 無彩工 。 |
Tsuí-gû tn̂g-tōo siōng tuā-tháng , Lo̍k-tô liān-sîng kim-kong-pāng , Beh lâi phah-phuà ti-tu-bāng , Liân-phah sann-ē bô-tshái-kang . |
| 蜘蛛 法術 逐項 有 ， 練 成 五粒 定光珠 ， 鹿駝 不知 甲 伊 株 ， 乎 伊 打 甲 煞 杯龜 。 |
Ti-tu huat-su̍t ta̍k-hāng ū , Liān sîng gōo-lia̍p tīng-kong-tsu , Lo̍k-tô m̄-tsai kah i tu , Hōo i phah khah suah khiau-ku . |
| 烏貓 靠 伊 上肴 走 ， 卜 咬 蜘蛛 兮 眉頭 ， 乎 伊 打着 哀哀哮 ， 一隻 今 煞 不成猿 。 |
Oo-niau khò i siōng-gâu tsáu , Beh kā ti-tu ê bâi-thâu , Hōo i phah--tio̍h ai-ai-háu , Tsi̍t-tsiah tann suah m̄-tsiânn-kâu . |
| 水蛙 卜 破 蜘蛛網 ， 戶蠅 即 去 放 毒蟲 ， 食 了 逐隻 大肚桶 ， 袂行 一圓 那 死人 。 |
Tsuí-ke beh phuà ti-tu-bāng , Hôo-sîn tsiah khì pàng to̍k-thâng , Tsia̍h liáu ta̍k-tsiah tuā-tōo-tháng , Buē-kiânn tsi̍t-khoo ná sí-lâng . |
| 灶雞 入陣 成 青慘 ， 條 在 蜘蛛 八卦網 ， 身軀 不時 淡淡淡 。 |
Tsàu-ke li̍p-tīn tsiânn tshinn-tshám , Tiâu tsāi ti-tu Pat-kuà-bāng , Tsînn-tshí pua̍h-lo̍h tsāi tē-hām , Sin-khu put-sî tâm-tâm-tâm . |
| 狐狸 靠 伊 尾 大汗 ， 恰 高 墻圍 也敢 盤 ， 現時 尾 煞 春 一半 ， 拵死 跳 上 八卦山 。 |
Hôo-lî khò i bué tuā-kuānn , Khah kuân tshiûnn-uî iā-kánn puânn , Hiān-sî bué suah tshun tsi̍t-puànn , Tshûn-sí thiàu tsiūnn Pat-kuà-suann . |
| 雞工 來 到 含含叫 ， 望冬 見面 朴朴趙 ， 雞子 對 米 一直 扣 ， 也無 看着 伊 來葉 。 |
Ke-kang lâi kàu kâm-kâm-kiò , Bāng-tang kìnn-bīn pho̍k-pho̍k-tiô , Ke-kiánn tuì bí it-ti̍t khioh , Iā-bô khuànn-tio̍h i lāi-hio̍h . |
| 番工 出聲 塊 吪 殺 ， 鴨母 刣 輸 吪 不達 ， 陣圖 省款 無 人 識 ， 門｜着 地牛 上 有力 。 |
Huan-kang tshut-siann teh huah sat , Ah-bó thâi su huah m̄-ta̍t , Tīn-tôo siánn-khuán bô lâng bat , Tú-tio̍h tē-gû siōng ū-la̍t . |
| 老猿 目啁 上 利害 ， 省乜 機關 看 兮 知 ， 伊 對 中門 入 陣內 ， 卜 甲 娘娘 伊 相刣 。 |
Lāu-kâu ba̍k-tsiu siōng lī-hāi , Siánn-mi̍h ki-kuan khuànn ē tsai , I tuì tiong-mn̂g li̍p tīn-lāi , Beh kah niû-niû i sio-thâi . |
| 娘娘 看着 大 受氣 ， 大 罵 老猿 死 畜生 ， 汝 敢 入陣 來 送死 ， 手 夯 佛藤 來 打 伊 。 |
Niû-niû khuànn--tio̍h tuā siū-khì , Tuā mē lāu-kâu sí thik-sinn , Lí kánn li̍p-tīn lâi sàng-sí , Tshiú gia̍h hu̍t-tîn lâi phah i . |
| 猿 是 大聖 孫 悟空 ， 入陣 接戰 有 知防 ， 猿 个 目啁 不是 戇 ， 菩薩祖師 兮 道童 。 |
Kâu sī tāi-sìng Sun Ngōo-khong , Li̍p-tīn tsiap-tsiàn ū ti-hông , Kâu ê ba̍k-tsiu m̄-sī gōng , Phôo-sat-tsóo-su ê tō-tông . |
| 猿 个 目啁 看 兮曉 ， 蜘蛛 本是 糸線妖 ， 伊 个 寶貝 極 巧妙 ， 風火 伊 就 棟袂朝 。 |
Kâu ê ba̍k-tsiu khuànn ē-hiáu , Ti-tu pún-sī si-suànn-iau , I ê pó-puè ki̍k khá-biāu , Hong-hé i tio̍h tòng-buē-tiâu . |
| 着請 風火 來 破陣 ， 也無 難得 掠 伊 身 ， 也着 寶貝 大 要緊 ， 能得 收陰 糸線神 。 |
Tio̍h-tshiánn hong-hé lâi phuà-tīn , Iah-bô lân-tit lia̍h i sin , Iā-tio̍h pó-puè tuā iàu-kín , Ē-tit siu-im si-suànn-sîn . |
| 蜘蛛 是 驚 風 甲 火 ， 無線 蜘蛛 就袂 飛 ， 東洋 大海 袂得 過 ， 看 伊 敢 有 双領 皮 。 |
Ti-tu sī kiann hong kah hé , Bô-suànn ti-tu tio̍h-buē pe , Tang-iûnn tuā-hái buē-tit kè , Khuànn i kám ū sang-líng phê . |
| 門人 服 在 五門 外 ， 上下 閣 有 烏白蛇 ， 戶蠅 驚 甲 柿柿蔡 ， 娘娘 有 死 允 無 活 。 |
Bûn-lîn ho̍k tsāi ngóo-mn̂g guā , Siōng-hā koh ū oo-pe̍h-tsuâ , Hôo-sîn kiann kah tshī-tshī-tshuah , Niû-niû ū sí ún bô ua̍h . |
| 肥力 一枝 巴蕉扇 ， 悅 着 大風 滾 上 天 ， 戶架 吪聲 哇哇死 ， 蜘蛛 性命 敢 難 移 。 |
Puî-li̍k tsi̍t-ki pa-tsiau-sìnn , Ia̍t tio̍h tuā-hong kún tsiūnn thinn , Hōo-kê huah-siann ke̍h-ke̍h-sí , Ti-tu sìnn-miā kánn lân î . |
| 真人 發起 神火箭 ， 九隻 火獅 青青青 ， 好得 娘娘 走 有 離 ， 乎 伊 燒斷 蜘蛛糸 。 |
Tsin-lîn huat-khí sîn-hé-tsìnn , Káu-tsiah hé-sai tshinn-tshinn-tshinn , Hó-tit niû-niû tsáu ū lī , Hōo i sio-tn̄g ti-tu-si . |
| 蜘蛛 着驚 走 落 地 ， 走甲 袂行 做 狗 把 ， 身軀 有 帶 乾坤袋 ， 第一 利害 是 只个 。 |
Ti-tu tio̍h-kiann tsáu lo̍h tē , Tsáu-kah buē-kiânn tsuè káu pê , Sin-khu ū tuà khiân-khun-tē , Tē-it lī-hāi sī tsit-ê . |
| 鳳凰 發起 七星劍 ， 連煞 二枝 格 相簾 ， 娘娘 性命 真 危險 ， 恰險 挑油 過 石尖 。 |
Hōng-hông huat-khí tshit-tshinn-kiàm , Liân-suà nn̄g-ki kik sio-liâm , Niû-niû sìnn-miā tsin guî-hiám , Khah-hiám tann-iû kè tsio̍h-tsiam . |
| 烏貓 烏狗 甲 狐狸 ， 寶劍 連 放 四五枝 ， 逐枝 兮 劍 白薛薛 ， 協力 卜 收 蜘蛛精 。 |
Oo-niau oo-káu kah hôo-lî , Pó-kiàm liân pàng sì-gōo-ki , Ta̍k-ki ê kiàm pe̍h-si̍h-si̍h , Hia̍p-li̍k beh siu ti-tu-tsinn . |
| 蜘蛛 發起 乾坤罩 ， 各人 寶貝 算 真肴 ， 好得 真人 治 尾後 ， 發起 太極 在 雲頭 。 |
Ti-tu huat-khí khiân-khun-tàu , Kok-lâng pó-puè sǹg tsin-gâu , Hó-tit tsin-lîn tī bué-āu , Huat-khí thài-ki̍k tsāi hûn-thâu . |
| 老祖 發起 通天手 ， 乾坤 寶袋 被 伊 收 ， 無 因 師父 走 來 救 ， 性命 險險 着煞 休 。 |
Nóo-tsóo huat-khí thong-thian-tshiú , Khiân-khun pó-tē pī i siu , Bô in su-hū tsáu lâi kiù , Sìnn-miā hiám-hiám tio̍h-suah hiu . |
| 蜘蛛 師父 是 飛糸 ， 喜日 閑遊 出 遙池 ， 看着 門徒 險險死 ， 下凡 赶緊 來 救 伊 。 |
Ti-tu su-hū sī Pe-si , Hit-li̍t hân-iû tshut iâu-tî , Khuànn-tio̍h bûn-tôo hiám-hiám-sí , Hā-huân kuánn-kín lâi kiù i . |
| 好得 師父 來 改救 ， 那 無 性命 伊 着休 ， 飛糸 塊 求 眾 道友 ， 門徒 伊 卜 加治 收 。 |
Hó-tit su-hū lâi kái-kiù , Nā bô sìnn-miā i tio̍h-hiu , Pe-si teh kiû tsìng tō-iú , Bûn-tôo i beh ka-tī siu . |
| 正人 同情 因 師父 ， 飛糸 即 來 收 蜘蛛 ， 正仙 回返 逍遙府 ， 仙家 道友 極 仁慈 。 |
Tsìng-lâng tông-tsîng in su-hū , Pe-si tsiah lâi siu ti-tu , Tsìng-sian huê-tńg Siau-iâu-hú , Sian-ka tō-iú ki̍k lîn-tsû . |
| 只本 歌仔 真 希罕 ， 內中 獸名 歸千項 ， 不是 古書 也無 傳 ， 全 廣 動物 無 廣 人 。 |
Tsit-pún kua-á tsin hi-hán , Lāi-tiong siū-miâ kui-tshing-hāng , M̄-sī kóo-si iā-bô thuân , Tsuân kóng tōng-bu̍t bô kóng lâng . |
