首頁 >資料庫介紹
目錄
回上頁

冊名 戶蠅蚊仔大戰歌
編者 林有來改編
出版社 竹林書局
出版年 1987
篇名 上本
顯示 的款式:
Lô-má-jī 是
漢字是
竹林 書局 就是 我 ，
即編 戶蠅蚊仔歌 ，
只本 連續 做 相煞 ，
萬項 生活 受 拖磨 。
Tik-lîm tsu-kio̍k tio̍h-sī guá ,
Tsiah-pian hôo-sîn-báng-á-kua ,
Tsit-pún liân-sio̍k tsuè sio-suà ,
Bāng-bāng sing-ua̍h siū thua-buâ .
省乜 歌仔 吪 趣味 ，
袂念 先共 恁 通知 ，
萬項 動物 朗 廣 起 ，
也 兮 反亂 即 有 奇 。
Siánn-mi̍h kua-á huah tshù-bī ,
Buē-liām sing-kā lín thong-ti ,
Bān-hāng tōng-bu̍t lóng kóng khí ,
Iā ē huán-luān tsiah ū kî .
無論 省貨 有 性弟 ，
戶蠅 蚊仔 起 冤家 ，
為着 生活 兮 關係 ，
即 兮 扣冤 事 大个 。
Bô-lūn siánn-huè ū sìng-tē ,
Hôo-sîn báng-á khí uan-ke ,
Uī-tio̍h sing-ua̍h ê kuan-hē ,
Tsiah ē khioh-uan sū tuā-ê .
戶蠅 卜去 咬 臭肉 ，
飛去 更着 蚊仔腳 ，
蚊仔 卜 甲 伊 相打 ，
戶蠅 甲 伊 大 交加 。
Hôo-sîn beh-khì kā tshàu-bah ,
Pe-khì kinn-tio̍h báng-á-kha ,
Báng-á beh kah i sio-phah ,
Hôo-sîn kah i tuā kau-ka .
戶蠅 靠 伊 大箍把 ，
不驚 蚊仔 伊 一个 ,
蚊仔 想着 足 怨切 ，
起人 卜 甲 伊 冤家 。
Hôo-sîn khò i tuā-khoo-pé ,
M̄-kiann báng-á i tsi̍t-ê ,
Báng-á siūnn-tio̍h tsiok uàn-tsheh ,
Khí-lâng beh kah i uan-ke .
戶蠅 目啁 典 大蕊 ，
不驚 蚊仔 噴雞歸 ，
無 听 汝 塊 放犬屁 ，
敢 驚 蚊仔 人 大堆 。
Hôo-sîn ba̍k-tsiu tián tuā-luí ,
M̄-kiann báng-á pûn-ke-kui ,
Bô thiann lí teh pàng-káu-phuì ,
Kám kiann báng-á lâng tuā-tui .
蚊仔 飛起 一直 走 ，
一困 飛去 到 因兜 ，
去 吪 蚊黨 巢巢到 ，
卜掠 戶蠅 來 夾頭 。
Báng-á pe-khí it-ti̍t tsáu ,
Tsi̍t-khùn pe-khì kàu in-tau ,
Khì huah báng-tóng tsâu-tsâu-kàu ,
Beh-lia̍h hôo-sîn lâi gia̍p-thâu .
蚊仔 歸陣 飛 來 到 ，
戶蠅 双手 武 拳頭 ，
打死 蚊仔 耳耳哮 ，
煞 加 旦落 土腳兜 。
Báng-á kui-tīn pe lâi kàu ,
Hôo-sîn sang-tshiú bú kûn-thâu ,
Phah-sí báng-á hīnn-hīnn-háu ,
Suà ka tàn-lo̍h thôo-kha-tau .
蚊仔 打輸 真 冤枉 ，
戶蠅 武藝 真 能通 ，
蚊仔 走 去 竹廣洞 ，
去 請 一尾 鱔人王 。
Báng-á phah-su tsin uan-óng ,
Hôo-sîn bú-gē tsin lîng-thong ,
Báng-á tsáu khì Tik-kóng-tōng ,
Khì tshiánn tsi̍t-bué siān-lâng-ông .
蚊仔 來到 竹廣 口 ，
叫 人 通報 入 內頭 ，
為着 冤情 來 拜候 ，
共 鱔大哥 說 透流 。
Báng-á lâi-kàu tik-kóng kháu ,
Kiò lâng thong-pò li̍p lāi-thâu ,
Uī-tio̍h uan-tsîng lâi pài-hāu ,
Kā siān-tuā-ko seh thàu-lâu .
鱔人 听着 蚊仔 廣 ，
戶蠅 文武 双項 通 ，
相 行出 竹廣洞 ，
卜去 食 伊 戶蠅王 。
Siān-thâng thiann-tio̍h báng-á kóng ,
Hôo-sîn bûn-bú sang-hāng thong ,
Sio-tshuā kiânn-tshut Tik-kóng-tōng ,
Beh-khì tsia̍h i hôo-sîn-ông .
戶蠅 看着 鱔尫 來 ，
驚 甲 嘴仔 利西西 ，
知影 鱔 尫 嘴 利害 ，
飛 高 不敢 宿落來 。
Hôo-sîn khuànn-tio̍h siān-ang lâi ,
Kiann kah tshuì-á li̍h8-sai-sai ,
Tsai-iánn siān ang tshuì lī-hāi ,
Pe kuân m̄-kánn hioh--lo̍h-lâi ,
鱔 尫 看着 伊 戶蠅 ，
想 甲 嘴瀾 汁汁珍 ，
戶蠅 着驚 飛緊緊 ，
鱔 尫 看着 目銀銀 。
Siān ang khuànn-tio̍h i hôo-sîn ,
Siūnn kah tshuì-nuā tsha̍p-tsha̍p-tin ,
Hôo-sîn tio̍h-kiann pe-kín-kín ,
Siān ang khuànn-tio̍h ba̍k-gîn-gîn .
戶蠅 想着 真 不愿 ，
卜甲 蚊仔 結 大冤 ，
卜閣 起人 甲 伊 亂 ，
法度 請 比 伊 恰權 。
Hôo-sîn siūnn-tio̍h tsin m̄-guān ,
Beh-kah báng-á kiat tuā-uan ,
Beh-koh khí-lâng kah i luān ,
Huat-tōo tshiánn pí i khah-kuân .
戶蠅 卜去 請 蜈蚣 ，
卜請 蜈蚣 咬 鱔 尫 ，
帶治 厝頂 角仔蜂 ，
只位 伊 店 几十冬 。
Hôo-sîn beh-khì tshiánn giâ-kang ,
Beh-tshiánn giâ-kang kā siān ang ,
Tuà-tī tshù-tíng kak-á-phāng ,
Tsit-uī i tiàm kuí-tsa̍p-tang .
蜈蚣 听着 戶蠅 講 ，
講 伊 蚊仔 無 正莊 ，
双人 行出 角仔洞 ，
卜夾 蚊仔 伊 个 煌 。
Giâ-kang thiann-tio̍h hôo-sîn kóng ,
Kóng i báng-á bô tsìng-tsong ,
Sang-lâng kiânn-tshut Kak-á-tōng ,
Beh-gia̍p báng-á i ê hông .
蜈蚣 腳骨 又 極多 ，
三十六枝 一直 把 ，
戶蠅 想了 無 好世 ，
去 問 加絕 伊 一个 。
Giâ-kang kha-kut iū ki̍k-tsē ,
Sann-tsa̍p-la̍k-ki it-ti̍t pê ,
Hôo-sîn siūnn-liáu bô hó-sè ,
Khì bn̄g ka-tsua̍h i tsi̍t-ê .
加絕 帶治 菜廚府 ，
專門 塊共 做 軍師 。
伊 个 計智 足成 有 ，
二枝 消息 在 身軀 。
Ka-tsua̍h tuà-tī Tshài-tû-hú ,
Tsuan-bûn teh-kāng tsuè kun-su .
I ê kè-tì tsiok-tsiânn ū ,
Nn̄g-ki siau-sit tsāi sin-khu .
加絕 推算 無 錯誤 ，
也有 一層 三 不服 ，
緊 共 戶蠅 伊 約束 ，
蜈蚣 此去 兮 羅祿 。
Ka-tsua̍h tshui-sǹg bô tshò-ngōo ,
Iā-ū tsi̍t-tsân sam put-ho̍k ,
Kín kā hôo-sîn i iok-sok ,
Giâ-kang tshú-khì ē lô-lo̍k .
蚊仔 知影 蜈蚣 來 ，
走 去 講 乎 仙尫 知 ，
仙尫 想計 在 心內 ，
赶緊 去 請 蛤仔 來 ，
Báng-á tsai-iánn giâ-kang lâi ,
Tsáu khì kóng hōo siān-ang tsai .
Siān-ang siūnn-kè tsāi sim-lāi ,
Kuánn-kín khì tshiánn kap-á lâi ,
蛤仔 帶治 田岸 空 ，
蚊仔 去請 伊 一个 ，
若無 伊 來 事 呆紡 ，
卜請 蛤仔 破 蜈蚣 。
Kap-á tuà-tī tshân-huānn khang ,
Báng-á khì-tshiánn i tsi̍t-lâng ,
Nā-bô i lâi sū phái-pháng ,
Beh-tshiánn kap-á phuà giâ-kang .
蛤仔 法 度 真 利害 ，
將 情 說 乎 蚊仔 知 ，
蜈蚣 法度 我 知 呆 ，
放 尿 伊 着 不敢 來 。
Kap-á huat tōo tsin lī-hāi ,
Tsiong tsîng seh hōo báng-á tsai ,
Giâ-kang huat-tōo guá tsai phái ,
Pàng liō i tio̍h m̄-kánn lâi .
蚊仔 去 請 伊 蛤仔 ，
收拾 蜈蚣 伊 个 腳 ，
蜈蚣 帶 煌 卜來 咬 ，
蛤仔 做前 走來 詐 。
Báng-á khì tshiánn i kap-á ,
Siu-si̍p giâ-kang i ê kha ,
Giâ-kang tuà hông beh-lâi kā ,
Kap-á tsuè-tsîng tsáu-lâi tsa̍h .
蜈蚣 趖着 蛤仔尿 ，
腳骨 親像 火 塊 燒 ，
大聲 小聲 哀哀叫 ，
歸尾 店塊 博博趙 。
Giâ-kang sô-tio̍h kap-á-liō ,
Kha-kut tshin-tshiūnn hé teh sio ,
Tuā-siann sè-siann ai-ai-kiò ,
Kui-bué tiàm-teh pho̍k-pho̍k-tiô .
蜈蚣 腳骨 六了了 ，
袂珍袂動 直寮寮 ，
想着 有影 真 見少 ，
為 伊 戶蠅 即 衰梢 。
Giâ-kang kha-kut lak-liáu-liáu ,
Buē-tín-buē-tāng ti̍t-liâu-liâu ,
Siūnn-tio̍h ū-iánn tsin kiàn-siàu ,
Uī i hôo-sîn tsiah sue-siâu .
歸尾 店塊 柿柿蔡 ，
無腳 通行 按盞 拖 ，
一條 親像 手錶帶 ，
遠遠 看着 親像 蛇 。
Kui-bué tiàm-teh tshī-tshī-tshuah ,
Bô-kha thang-kiânn àn-tsuánn thua ,
Tsi̍t-tiâu tshin-tshiūnn tshiú-pió-tuà ,
Hn̄g-hn̄g khuànn-tio̍h tshin-tshiūnn tsuâ .
戶蠅 飛高 看現現 ，
看 伊 蛤仔 恰 肴仙 ，
伊 个 法度 不免 戰 ，
那看 蜈蚣 真 可連 。
Hôo-sîn pe-kuân khuànn-hiān-hiān ,
Khuànn i kap-á khah gâu-sian ,
I ê huat-tōo m̄-bián tsiàn ,
Ná-khuànn giâ-kang tsin khó-liân .
蜈蚣 就 共 戶蠅 廣 ，
汝 緊 去 請 蛇 大王 ，
帶在 青山 石峰洞 ，
伊 个 法度 極 靈通 。
Giâ-kang tio̍h kā hôo-sîn kóng ,
Lí kín khì tshiánn tsuâ tāi-ông ,
Luà-tsāi Tshing-san Tsio̍h-hong-tōng ,
I ê huat-tōo ki̍k lîng-thong .
戶蠅 隨時 飛 起行 ，
去 到 青山 叫 蛇兄 ，
代先 問 靴 蛇仔子 ，
廣 蛇大王 伊 个 名 。
Hôo-sîn suî-sî pe khí-kiânn ,
Khì kàu Tshing-san kiò tsuâ-hiann ,
Tāi-sing bn̄g hia tsuâ-á-kiánn ,
Kóng tsuâ-tsī-ông i ê miâ .
大蛇 听着 真 歡喜 ，
暢 甲 嘴仔 唏唏唏 ，
腹肚 飫 甲 半小死 ，
今日 有通 好 止飢 。
Tuā-tsuâ thiann-tio̍h tsin huann-hí ,
Thiòng kah tshuì-á hi-hi-hi ,
Pak-tóo iau kah puànn-sió-sí ,
Kin-li̍t ū-thang hó tsí-ki .
大蛇 嘴仔 扒 開開 ，
蛤仔 驚 甲 目 昧昧 ，
一隻 乎 伊 做 一嘴 ，
吞 落 奄滾 結 一雷 。
Tuā-tsuâ tshuì-á peh khui-khui ,
Kap-á kiann kah ba̍k bui-bui ,
Tsi̍t-tsiah hōo i tsuè tsi̍t-tshuì ,
Thun lo̍h ām-kún kiat tsi̍t-luî .
蛤仔 伊 死 門｜ 日暗 ，
蚊仔 共 伊 做 孝男 ，
逐隻 哭 甲 真 青慘 ，
蛤仔 汝 死 我 不甘 。
Kap-á i sí tú li̍t-àm ,
Báng-á kā i tsuè hàu-lâm ,
Ta̍k-tsiah khàu kah tsin tshinn-tshám ,
Kap-á lí sí guá m̄-kam .
蛤仔 汝 死 真 打損 ，
蚊仔 日 哭 門｜ 下方 ，
有情 煞 共 汝 捧飯 ，
哭 甲 嘴仔 長長長 。
Kap-á lí sí tsin phah-sńg ,
Báng-á li̍t khàu tú ē-hng ,
Ū-tsîng suà kā lí phâng-pn̄g ,
Khàu kah tshuì-á tn̂g-tn̂g-tn̂g .
日頭 若暗 着塊 哮 ，
拘 治 暗暗 棹仔腳 ，
哭 甲 歸身 朗 無肉 ，
上世 皆听 無 爭差 。
Li̍t-thâu nā-àm tio̍h-teh háu ,
Ku tī àm-àm toh-á-kha ,
Khàu kah kui-sin lóng bô-bah ,
Siông-sè kai-thiann bô tsing-tsha .
蚊仔 想着 情 就 尽 ，
卜閣 去請 黃真人 ，
想 報 冤仇 恰 要緊 ，
伐落 就緊 卜 起身 。
Báng-á siūnn--tio̍h tsîng tio̍h tsīn ,
Beh-koh khì-tshiánn N̂g-tsin-lîn ,
Siūnn pò uan-siû khah iàu-kín ,
Hua̍t-lo̍h tio̍h-kín beh khí-sin .
伐落 起行 緊 備辨 ，
透冥 赶到 花果山 ，
黃蜂真人 出來 等 ，
蚊仔 共 伊 說 一番 。
Hua̍t-lo̍h khí-kiânn kín pī-pān ,
Thàu-mî kuánn-kàu Hua-kó-san ,
N̂g-phang-tsin-lîn tshut-lâi tán ,
Báng-á kā i seh tsi̍t-huan .
黃蜂 第一 呆性弟 ，
卜助 蚊仔 伊 一个 ，
起吪 蜂黨 足成 多 ，
卜甲 大蛇 起 冤家 。
N̂g-phang tē-it phái-sìng-tē ,
Beh-tsōo báng-á i tsi̍t-ê ,
Khí-huah phang-tóng tsiok-tsiânn tsē ,
Beh-kah tuā-tsuâ khí uan-ke .
加絕 推算 真 利害 ，
隨時 廣 乎 戶蠅 知 ，
蚊仔 去 通 因 黨派 ，
近日 大兵 就 下 來 。
Ka-tsua̍h tshui-sǹg tsin lī-hāi ,
Suî-sî kóng hōo hôo-sîn tsai ,
Báng-á khì thong in tóng-phài ,
Kūn-li̍t tuā-ping tio̍h ē lâi .
戶蠅 听着 加絕 廣 ，
黃蜂 武藝 極 能通 ，
咱 着 預備 恰 套棟 ，
卜請 省人 恰 適當 。
Hôo-sîn thiann-tio̍h ka-tsua̍h kóng ,
N̂g-phang bú-gē ki̍k lîng-thong ,
Lán tio̍h ū-pī khah thò-tòng ,
Beh-tshiánn siánn-lâng khah sik-tòng .
加絕 塊想 隨時 有 ，
叫 伊 着去 請 蜘蛛 ，
蜘蛛 帶 在 后壁厝 ，
人人 叫 伊 天羅師 。
Ka-tsua̍h teh-siūnn suî-sî ū ,
Kiò i tio̍h-khì tshiánn ti-tu ,
Ti-tu tuà tsāi Āu-piah-tshù ,
Lâng-lâng kiò i Thian-lô-su .
伊 有 天羅 甲 地網 ，
法術 又閣 真 靈通 ，
着 請 這个 恰 套棟 ，
緊去 請 伊 來 知防 。
I ū thian-lô kah tē-bóng ,
Huat-su̍t iū-koh tsin lîng-thong ,
Tio̍h tshiánn tsit-ê khah thò-tòng ,
Kín-khì tshiánn i lâi ti-hông .
戶蠅 閣再 問 一擺 ，
先生 汝 閣 廣 我 知 ，
不知 伊 帶 省 所在 ，
叫 我 倒位 請 伊 來 。
Hôo-sîn koh-tsài bn̄g tsi̍t-páinn ,
Sian-sinn lí koh kóng guá tsai .
M̄-tsai i tuà siánn sóo-tsāi ,
Kiò guá tó-uī tshiánn i lâi .
加絕 即共 伊 開口 ，
伊 是 店 人 厝後郊 ，
不管 倒位 伊 兮 到 ，
有時 帶人 厝角頭 。
Ka-tsua̍h tsiah-kā i khai-kháu ,
I sī tiàm lâng tshù-āu-kau ,
M̄-kuán tó-uī i ē kàu ,
Ū-sî tuà-lâng tshù-kak-thâu .
戶蠅 隨時 就 起行 ，
去 到 講 乎 蜘蛛 听 ，
蚊仔 卜 甲 伊 拼命 ，
去 請 黃蜂 界 出名 。
Hôo-sîn suî-sî tio̍h khí-kiânn ,
Khì kàu kóng hōo ti-tu thiann ,
Báng-á beh kah i piànn-miā ,
Khì tshiánn n̂g-phang kài tshut-miâ .
蜘蛛 听着 戶蠅 廣 ，
黃蜂 戰術 極 靈通 ，
伊 兮 法度 極 套棟 ，
身軀 伊 帶 一点 煌 。
Ti-tu thiann-tio̍h hôo-sîn kóng ,
N̂g-phang tsiàn-su̍t ki̍k lîng-thong ,
I ê huat-tōo ki̍k thò-tòng ,
Sin-khu i tuà tsi̍t-tiám hông .
戶蠅 听着 只號 事 ，
好嘴 治塊 求 蜘蛛 ，
汝着 來去 做 我 主 ，
野無 驚了 去 刣 輸 。
Hôo-sîn thiann-tio̍h tsit-hō sū ,
Hó-tshuì tī-teh kiû ti-tu ,
Lí-tio̍h lâi-khì tsuè guá tsú ,
Iá-bô kiann-liáu khì thâi su .
蜘蛛 娘娘 即 講起 ，
我 个 身軀 能 放糸 ，
天羅 地網 創 完備 ，
千軍 萬馬 尽 拘除 。
Ti-tu niû-niû tsiah kóng-khí ,
Guá ê sin-khu ē pàng-si ,
Thian-lô tē-bóng tshòng uân-pī ,
Tshian-kun bān-má tsīn khu-tî ,
蜘蛛 計智 極 肴 想 ，
人人 叫 伊 施娘娘 ，
製成 陰陽 天羅帳 ，
不驚 蚊仔 肴 主張 。
Ti-tu kè-tì ki̍k gâu siūnn ,
Lâng-lâng kiò i Si-niû-niû ,
Tsuè-sîng im-iông thian-lô-tiùnn ,
M̄-kiann báng-á gâu tsú-tiunn .
黃蜂 只日 招 出陣 ，
冤家 蚊仔 甲 戶蠅 ，
戶蠅 看着 能 青秤 ，
黃蜂 相打 介 認真 。
N̂g-phang tsit-li̍t tsio tshut-tīn ,
Uan-ke báng-á kah hôo-sîn ,
Hôo-sîn khuànn-tio̍h ē tshinn-tshìn ,
N̂g-phang sio-phah kài līn-tsin .
黃蜂 歸陣 巢巢到 ，
蜘蛛 網 在 厝角頭 ，
黃蜂 着驚 想卜 走 ，
天網 地網 四過 包 。
N̂g-phang kui-tīn tsâu-tsâu-kàu ,
Ti-tu bāng tsāi tshù-kak-thâu ,
N̂g-phang tio̍h-kiann siūnn-beh tsáu ,
Thian-lô tē-bóng sì-kè pau .
黃蜂 着驚 走 袂離 ，
飛去 更 着 蜘蛛糸 ，
想卜 脫身 走 袂去 ，
蜘蛛 翻身 卜 掠 伊 。
N̂g-phang tio̍h-kiann tsáu buē-lī ,
Pe-khì kinn tio̍h ti-tu-si ,
Siūnn-beh thuat-sin tsáu buē-khì ,
Ti-tu huan-sin beh lia̍h i .
蜘蛛 翻身 就 加 攬 ，
真人 暗 放 梅花針 ，
娘娘 冲毒 成 青慘 ，
不敢 加 掠 面 青紅 。
Ti-tu huan-sin tio̍h ka lám ,
Tsin-lîn àm pàng muî-hue-tsam ,
Niû-niû tiòng-to̍k tsiânn tshinn-tshám ,
M̄-kánn ka lia̍h bīn tshinn-âng .
中本