首頁 >資料庫介紹
目錄
回上頁

冊名 最新百菓歌
編者 麥田(麥國安)
出版社 嘉義玉珍書局
出版年 1932
篇名 下本
顯示 的款式:
Lô-má-jī 是
漢字是
頭集 阮 兄 親手 做 ，
國安 卜 來 續 尾回 ，
種種 歌仔 真正 多 ，
百菓 个 歌 恰 笑科 。
Thâu-tsi̍p gún hiann tshin-tshiú tsuè ,
Kok-an beh lâi suah bué-huê ,
Tsióng-tsióng kua-á tsin-tsiànn tsuē ,
Pah-kó ê kua khah tshiò-khue .
歌仔 好听 眾人 愛 ，
玉珍 發行 印 出來 ，
着 念 隻 能 知 好呆 ，
外哖 笑科 汝 敢 知 。
Kua-á hó-thiann tsiòng-lâng ài ,
Gio̍k-tin huat-hîng ìn tshut-lâi ,
Tio̍h liām tsiah ē tsai hó-bái ,
Guā-nî tshiò-khue lí kám tsai .
榮話 加 廣 無路用 ，
水梨 老祖 刣 着傷 ，
楊桃 禪師 真正 暢 ，
樹梅 仙姑 有 恰 雄 。
Îng-uē ke kóng bô-lōo-iōng ,
Tsuí-lâi ló-tsóo thâi tio̍h-siong ,
Iûnn-thô siâm-su tsin-tsiànn thiòng ,
Tshiūnn-m̂ sian-koo ū khah hiông .
樹梅 祭 出 蛾眉莿 ，
水梨 身軀 軟 如 綿 ，
着傷 入營 強卜 死 ，
櫻桃 看着 可憐 伊 。
Tshiū-m̂ tsè tshut gô-bî-tshì ,
Tsuí-lâi sin-khu nńg jû mî ,
Tio̍h-siong ji̍p-iânn kiông-beh sí ,
Ing-thô khuànn-tio̍h khó-liân i .
看着 水梨 敢能 害 ，
暗塊 煩惱 無 人 知 ，
想 着 藥師 一層 代 ，
騰雲駕霧 仙山 來 。
Khuànn-tio̍h tsuí-lâi kánn-ē hāi ,
Àm-teh huân-ló bô lâng tsai ,
Siūnn tio̍h io̍h-su tsi̍t-tsân tāi ,
Thîng-hûn-kà-bū sian-san lâi .
來 到 珠皮銀膚洞 ，
紅白 甘蔗 二藥王 ，
共 咱 櫻桃 同 一黨 ，
蔗汁 救人 變 神通 。
Lâi kàu Tsu-phê-gûn-hu-tōng ,
Âng-pe̍h kam-tsià jī-io̍h-ông ,
Kāng lán ing-thô kâng tsi̍t-tóng ,
Tsià-tsiap kiù-lâng piàn sîn-thong .
仙童 號做 竹仔蔗 ，
櫻桃 駕雲 來 到 者 ，
仙童 洞口 店塊 立 ，
拜託 通報 說 一聲 。
Sian-tông hō-tsuè tik-á-tsià ,
Ing-thô kà-hûn lâi kàu tsia ,
Sian-tông tōng-kháu tiàm-teh khiā ,
Pài-thok thong-pò sueh tsi̍t-siann .
說 廣 混元太乙洞 ，
櫻桃 求 見 二藥王 ，
藥師 听着 仙童 廣 ，
帶念 櫻桃 同 道宗 。
Sueh kóng Hūn-guân-thài-it-tōng ,
Ing-thô kiû kiàn jī-io̍h-ông ,
Io̍h-su thiann-tio̍h sian-tông kóng ,
Tài-liām ing-thô kâng tō-tsong .
紅 白 甘蔗 出來 請 ，
請 伊 櫻桃 入 中廳 ，
因為 水梨 卜 無命 ，
到者 懇求 我 道兄 。
Âng pe̍h Kam-tsià tshut-lâi tshiánn ,
Tshiánn i Ing-thô ji̍p tiong-thiann ,
In-uī Tsuí-lâi beh bô-miā ,
Kàu-tsia khún-kiû guá tō-hiann .
望 汝 下山 救 伊 命 ，
紅 白 甘蔗 甲 伊 行 ，
水梨 着傷 塊 哭 痛 ，
甘蔗 藥師 勤 免驚 。
Bāng lí hā-san kiù i miā ,
Âng pe̍h Kam-tsià kah i kiânn ,
Tsuí-lâi tio̍h-siong teh khàu thiànn ,
Kam-tsià io̍h-su khǹg bián-kiann .
謹 吐 蔗汁 醫 水梨 ，
藥 到 病 除 眾人 知 ，
那無 此藥 着 呆代 ，
病体 好好 能 起來 。
Kín thòo tsià-tsiap i tsuí-lâi ,
Io̍h kàu pēnn tû tsìng-lâng tsai ,
Nā-bô tsit-io̍h to̍h pháinn-tāi ,
Pīnn-thé hó-hó ē khí--lâi .
蔗汁 食落 人 着 醒 ，
敢謝 蔗仙 汝 來 醫 ，
那無 貧道 着 能死 ，
即層 恩情 大 如天 。
Tsià-tsiap tsia̍h--lo̍h lâng to̍h tshínn ,
Kám-siā Tsià-sian lí lâi i ,
Nā-bô pîn-tō to̍h ē-sí ,
Tsí-tsân in-tsîng tuā jû-thinn .
蔗仙 漸 請 帶 營內 ，
二回 出戰 卜 相刣 ，
兩平 擺陣 人 立在 ，
就 罵 樹梅 大 不皆 。
Tsià-sian tsiām tshiánn tuà iânn-lāi ,
Jī-huê tshut-tsiàn beh sio-thâi ,
Nn̄g-pîng pâi-tīn lâng khiā-tsāi ,
To̍h mē tshiū-m̂ tāi put-kai .
卜 刣 主帥 先 出陣 ，
樹梅 櫻桃 柄 認真 ，
兩平 戰鼓 催 真 緊 ，
兵卒 死傷 足 可憐 。
Beh tâi tsú-suè sing tshut-tīn ,
Tshiū-m̂ Ing-thô piànn jīn-tsin ,
Nn̄g-pîng tsiàn-kóo tshui tsin kín ,
Ping-tsut sí-siong tsiok khó-lîn .
樹梅 手 拋 蛾眉莿 ，
櫻桃 桃劍 執 一枝 ，
二人 拼命 不驚 死 ，
刣 甲 無日 甲 無冥 。
Tshiū-m̂ tshiú pha gô-bî-tshì ,
Ing-thô thô-kiàm tsip tsi̍t-ki ,
Nn̄g-lâng piànn-miā m̄-kiann sí ,
Thâi kah bô-ji̍t kah bô-mî .
樹梅 有 人 通好 誥 ，
相刣 不驚 歪尾桃 ，
暖霧 陣內 看好好 ，
暗 祭 毒霧 腹 那 搜 。
Tshiū-m̂ ū lâng thang-hó khò ,
Sio-thâi m̄-kiann uai-bué-thô ,
Lián-bū tīn-lāi khuànn-hó-hó ,
Àm tsè to̍k-bū pak ná so .
櫻桃 故 刣 被 伊 害 ，
暖霧 寒冰 噴出來 ，
櫻桃 糊 着 暖霧屎 ，
敗陣 着傷 大聲 哀 。
Ing-thô kòo thâi pī i hāi ,
Lián-bū hân-ping phùn--tshut--lâi ,
Ing-thô kôo tio̍h lián-bū-sái ,
Pāi-tīn tio̍h-siong tuā-siann ai .
暖霧 刣 營 塊 故 暢 ，
水梨 祭 寶 共 伊 傷 ，
七寶 仙釘 硬 又 勇 ，
祭 在 空中 真正 雄 。
Lián-bū thâi iânn teh kòo thiòng ,
Tsuí-lâi tsè pó kā i siong ,
Tshit-pó sian-ting ngī iū ióng ,
Tsè tī khong-tiong tsin-tsiànn hiông .
金釘 着 是 水梨 致 ，
千變萬化 能 大枝 ，
暖霧 野閣 不知 死 ，
老祖 打 伊 無張池 。
Kim-ting to̍h sī Tsuí-lâi tì ,
Tshian-piàn-bān-huà ē tuā-ki ,
Lián-bū iá-koh m̄-tsai sí ,
Ló-tsóo phah i bô-tiunn-tî .
兩平 出戰 通 刣 敗 ，
鳴羅 收兵 回 營 來 ，
櫻桃 起 寒 強卜 害 ，
症頭 沉重 人 不知 。
Nn̄g-pîng tshut-tsiàn thong thâi pāi ,
Bîng-lô siu-ping huê iânn lâi ,
Ing-thô khí kuânn kiông-beh hāi ,
Tsìng-thâu tîm-tāng lâng m̄-tsai .
櫻桃 着病 卜 夭壽 ，
紅蔗 冷氣 緊 來 收 ，
藥師 有影 真 妙手 ，
食 着 蔗汁 好鰍鰍 。
Ing-thô tio̍h-pīnn beh iáu-siū ,
Âng-tsià líng-khì kín lâi siu ,
Io̍h-su ū-iánn tsin miāu-tshiú ,
Tsia̍h tio̍h tsià-tsiap hó-liu-liu .
樹梅 着傷 直卜 死 ，
身軀 那 綿 飛 上 天 ，
飛 甲 乎 人 看 不 見 ，
加治 不知 死 野 生 。
Tshiū-m̂ tio̍h-siong tit-beh sí ,
Sin-khu ná mî pue tshiūnn thinn ,
Pue kah hōo lâng khuànn m̄ kìnn ,
Ka-tī m̄-tsai sí iah sinn .
墜落 看着 日月洞 ，
洞 內 菱角 做 天王 ，
桑才 夫人 治塊 廣 ，
外口 故友 愛 相逢 。
Tuī-lo̍h khuànn-tio̍h Ji̍t-gua̍t-tōng ,
Tōng lāi Lîng-kak tsuè thian-ông ,
Sng-tsâi hu-jîn tī-teh kóng ,
Guā-kháu kòo-iú ài siong-hông .
桑才 夫人 出來 請 ，
請 伊 樹梅 入 內廳 ，
呵老 桑才 上 好命 ，
菱角 天王 有 出名 。
Sng-tsâi hu-jîn tshut-lâi tshiánn ,
Tshiánn i Tshiū-m̂ ji̍p lāi-thiann ,
O-ló Sng-tsâi siōng hó-miā ,
Lîng-kak thian-ông ū tshut-miâ .
天王 生成 二个 角 ，
黑面 兇惡 甲 吐目 ，
人 雄 愛卜 甲 人 觸 ，
性弟 罔夫 未 孤獨 。
Thian-ông sinn-sîng nn̄g-ê kak ,
Oo-bīn hiong-ok kah thòo-ba̍k ,
Lâng hiông ài-beh kah lâng tak ,
Sìng-tē bóng-hu bē koo-ta̍k .
樹梅 好嘴 共 伊 請 ，
三人 下山 做陣 行 。
此塹 水梨 下 呆命 ，
菱角 出戰 陣陣 營 。
Tshiūnn-m̂ hó-tshuì kā i tshiánn ,
Sann-lâng hā-san tsuè-tīn kiânn .
Tsit-tsām Tsuí-lâi ē pháinn-miā ,
Lîng-kak tshut-tsiàn tīn-tīn iânn .
菱角 討戰 緊 排陣 ，
八門 金鎻 訓煉 真 ，
敵將 入陣 旗 催 緊 ，
尋 無 門路 通 脫身 。
Lîng-kak thó-tsiàn kín pâi-tīn ,
Peh-mn̂g kim-só hùn-liān tsin ,
Ti̍k-tsiòng ji̍p-tīn kî tshui kín ,
Tshuē bô mn̂g-lōo thang thuat-sin .
水梨 會兵 出來 戰 ，
陣 藏 八卦 按 先天 ，
六爻 發動 肴 轉變 ，
不驚 菱角 塊 假仙 。
Tsuí-lâi huē-ping tshut-lâi tsiàn ,
Tīn tsông pak-kuà àn sian-thian ,
La̍k-ngâu huat-tōng gâu tńg-piàn ,
M̄-kiann Lîng-kak teh ké-sian .
菱角 出陣 戰 水梨 ，
老祖 祭 釘 無人知 ，
梨致 上天 真 利害 ，
菱角 看 了 笑咳咳 。
Lîng-kak tshut-tīn tsiàn Tsuí-lâi ,
Ló-tsóo tsè ting bô-lâng-tsai ,
Lâi-tì siūnn-thinn tsin lī-hāi ,
Lîng-kak khuànn liáu tshiò-hai-hai .
別人 塊 驚 梨仔致 ，
我 不 驚 汝 外 大枝 ，
菱角 个 皮 相像 鉄 ，
卜 是 別人 無 身屍 。
Pa̍t-lâng teh kiann Lâi-á-tì ,
Guá m̄ kiann lí guā tuā-ki ,
Lîng-kak ê phê sann-tshiūnn thi̍h ,
Beh sī pa̍t-lâng bô sin-si .
菱角 个 壳 那 鉄甲 ，
水梨 祭 釘 大 爭差 ，
門｜着 天王 着 教 飽 ，
梨致 倒 段 落 土脚 。
Lîng-kak ê khak ná thi̍h-kah ,
Tsuí-lâi tsè ting tuā tsing-tsha ,
Tú-tio̍h thian-ông tio̍h kah pá ,
Lâi-tì tò tn̄g lo̍h thôo-kha .
水梨 敗陣 叫 不好 ，
二回 出戰 是 櫻桃 ，
菱角 鉄甲 通好 誥 ，
硬 如 鋼鉄 不驚 刀 。
Tsuí-lâi pāi-tīn kiò m̄-hó ,
Jī-huê tshut-tsiàn sī Ing-thô ,
Lîng-kak thi̍h-kah thang-hó khò ,
Ngī jû kǹg-thi̍h m̄-kiann to .
櫻桃 桃劍 執 在 手 ，
刣 着 菱角 刀 煞 球 ，
看 着 刣 須 難得 受 ，
桃只 來 打 伊 目周 。
Ing-thô thô-kiàm tsip tsāi tshiú ,
Thâi tio̍h Lîng-kak to suah khiû ,
Khuànn tio̍h thâi su lân-tit siū ,
Thô-tsí lâi phah i ba̍k-tsiu .
天王 看 伊 祭 桃只 ，
菱角 爾目 無半糸 ，
櫻桃 野閣 不知 死 ，
乎 伊 凌角 喬 一裂 。
Thian-ông khuànn i tsè thô-tsí ,
Lîng-kak ni̍h-ba̍k bô-puànn-si ,
Ing-thô iá-koh m̄-tsai sí ,
Hōo i Lîng-kak kiāu tsi̍t-li̍h8 .
現部 桃仔 有 紀念 ，
不 是 諞歌 效肖 添 ，
天地 生成 未 走閃 ，
身來 一裂 尾 占占 。
Hiān-sî Thô-á ū kì-liām ,
M̄ sī pian-kua hau-siâu thiam ,
Thinn-tē sinn-sîng bē tsáu-siám ,
Sin--lâi tsi̍t-li̍h8 bué tsiam-tsiam .
凌角 網夫 界 不好 ，
受氣 來 喬 歪 尾 桃 ，
櫻桃 敗陣 回 返倒 ，
芎蕉 看 了 心內 遭 。
Lîng-kak bóng-hu kài m̄-hó ,
Siū-khì lâi kiāu uai bué thô ,
Ing-thô pāi-tīn huê tńg-tò ,
King-tsio khuànn liáu sim-lāi tso .
櫻桃 敗 返 入 營內 ，
芎蕉 煩惱 無人 知 ，
連連 刣須 是 利害 ，
元帥 心悶 回 府 來 。
Ing-thô pāi tńg ji̍p iânn-lāi ,
King-tsio huân-ló bô-lâng tsai ,
Liân-liân thâi-su sī lī-hāi ,
Guân-suè sim-būn huê hú lâi .
芎蕉 回返 未 外 久 ，
李仔 來 接 伊 丈夫 ，
看 伊 六神 全 無主 ，
元帥 搖頭 廣 刣須 。
King-tsio huê-tńg bē guā kú ,
Lí-á lâi tsiap i tiōng-hu ,
Khuànn i lio̍k-sîn tsuân bô-tsú ,
Guân-suè iô-thâu kóng thâi-su .
李仔 勸 伊 免 煩惱 ，
妾 身 替 汝 建 功勞 ，
漸請 夫君 床內 倒 ，
萬般 有 妾 通 伐落 。
Lí-á khǹg i bián huân-ló ,
Tshiap sin thè lí kiàn kong-lô ,
tsiām-tshiánn hu-kun tshn̂g-lāi tó ,
Bān-puann ū tshiap thang hua̍t-lo̍h .
元帥 听 了 心 歡喜 ，
呵老 李仔 好 妻兒 ，
門｜好 紅柿 來 到 止 ，
卜 來 補助 李仔 伊 。
Guân-suè thiann liáu sim huann-hí ,
O-ló Lí-á hó tshe-jî ,
Tú-hó Âng-khī lâi kàu tsí ,
Beh lâi póo-tsōo Lí-á i .
紅柿 小姐 是 查某 ，
為 救 娘娘 回 帝都 ，
小姐 領兵 做 前部 ，
開路 先峰 開 路途 。
Âng-khī sió-tsiá sī tsa-bóo ,
Uī kiù niû-niû huê tè-too ,
Sió-tsiá niá-ping tsuè tsîng-pōo ,
Khai-lōo sian-hong khui lōo-tôo .
紅柿 身 騎 桃花馬 ，
主帥 李仔 伊 一个 ，
出兵 軍旗 代先 祭 ，
即擺 出戰 為 國家 。
Âng-khī sin khiâ thô-hue-bé ,
Tsú-suè Lí-á i tsi̍t-ê ,
Tshut-ping kun-kî tāi-sing tsè ,
Tsí-pái tshut-tsiàn uī kok-ke .
大隊 兵馬 卜 起行 ，
來 到 尽 聽 戰鼓 聲 ，
桑才 夫人 即 知影 ，
出來 卜 共 伊 須營 。
Tuā-tuī ping-bé beh khí-kiânn ,
Lâi kàu tsīn thiann tsiàn-kóo siann ,
Sng-tsâi hu-jîn suî tsai-iánn ,
Tshut-lâi beh kāng i su-iânn .
桑才 櫻桃 塊 相刣 ，
祭 起 桑葉 上 天胎 ，
櫻桃 桃劍 頭上 蓋 ，
僥倖 桑風 漸漸來 。
Sng-tsâi Ing-thô teh sio-thâi ,
Tsè khí sng-hio̍h tsiūnn thian-thai ,
Ing-thô thô-kiàm thâu-tsiūnn kài ,
Hiau-hīng sng-hong tsiām-tsiām-lâi .
桑葉 扇 風 極 絕頂 ，
櫻桃 被 煽 現 原形 ，
恰 廣 亦是 桃仔 性 ，
桑砂 飛來 目 未 明 。
Sng-hio̍h siàn hong ki̍k tsua̍t-tíng ,
Ing-thô pī siàn hiàn guân-hîng ,
Khah kóng ia̍h-sī thô-á sìng ,
Sng-sua pue--lâi ba̍k buē bîng .
眾人 被 煽 目 未 金 ，
凌 角 天王 起 淫心 ，
看 着 紅柿 那 花錦 ，
意愛 在 心 想卜 淫 。
Tsìng-lâng pī siàn ba̍k buē kim ,
Lîng kak thian-ông khí îm-sim ,
Khuànn tio̍h Âng-khī ná hue-gím ,
Ì-ài tsāi sim siūnn-beh îm .
看着 紅柿 李仔 水 ，
菱角 痴哥 成 古錐 ，
兩平 个 角 來 到位 ，
好塊 李仔 脫 離開 。
Khuànn-tio̍h Âng-khī Lí-á suí ,
Lîng-kak tshi-ko tsiânn kóo-tsui ,
Nn̄g-pîng ê kak lâi kàu-uī ,
Hó-teh Lí-á thuat lî-khui .
菱角 喬 着 紅柿致 ，
紅柿 生 水 紅支支 ，
小姐 驚着 半小死 ，
天王 甲 伊 羔羔纏 。
Lîng-kak kiāu tio̍h Âng-khī-tì ,
Âng-khī sinn suí âng-kì-kì ,
Sió-tsiá kiann--tio̍h puànn-sió-sí ,
Thian-ông kah i ko-ko-tînn .
紅柿 被 力 入 營內 ，
看 汝 生 水 專工 來 ，
我 勸 汝 着 罔 親彩 ，
那不 着卜 共 汝 刣 。
Âng-khī pī lia̍h ji̍p iânn-lāi ,
Khuànn lí sinn suí tsuan-kang lâi ,
Guá khǹg lí tio̍h bóng tshìn-tshái ,
Nā-m̄ to̍h-beh kā lí thâi .
天王 意愛 強卜 小 ，
貪 汝 生 水 真 妖嬌 ，
少年 做 代 免 見肖 ，
僥倖 菱角 棟未朝 。
Thian-ông ì-ài kiông-beh siáu ,
Tham lí sinn suí tsin iau-kiau ,
Siàu-liân tsuè tāi bián kiàn-siàu ,
Hiau-hīng Lîng-kak tòng-bē-tiâu .
小姐 被 拞 未 來 走 ，
氣 甲 泪滓 双港 流 ，
被 伊 交纏 開 聲 哭 ，
罵 伊 菱角 着 症頭 。
Sió-tsiá pī khiú bī lâi tsáu ,
Khì kah ba̍k-tsái siang-káng lâu ,
Pī i kau-tînn khui siann khàu ,
Mē i Lîng-kak tio̍h tsìng-thâu .
菱角 千般 來 喜弄 ，
意愛 紅柿 結 成 双 ，
手 來 皆 抱 不甘 放 ，
未須 胡蝶 採花蜂 。
Lîng-kak tshian-puann lâi hí-lāng ,
Ì-ài Âng-khī kiat tsiânn siang ,
Tshiú lâi kai phō m̄-kam pàng ,
Buē-su ôo-tia̍p tshái-hue-phang .
好 得 桑才 走 來 救 ，
不 放 龍角 伊 干休 ，
天王 第一 驚 牽手 ，
看 着 伊 某 煞 球球 。
Hó tit Sng-tsâi tsáu lâi kiù ,
M̄ pàng Lîng-kak i kan-hiu ,
Thian-ông tē-tsi̍t kiann khan-tshiú ,
Khuànn tio̍h i bóo suah kiu-kiu .
菱角 呆死 煞 驚 某 ，
那無 伊 敢 做 胡途 ，
門｜着 即欵 無法度 ，
查某 不驚 伊 乾埔 。
Lîng-kak pháinn-sí suah kiann bóo ,
Nā-bô i kánn tsuè hôo-tôo ,
Tú-tio̍h tsí-khuán bô-huat-tōo ,
Tsa-bóo m̄-kiann i ta-poo .
櫻桃 敗陣 回 營內 ，
尋 無 紅柿 隻 能 知 ，
小姐 被 力 敢 能 害 ，
緊 致 香案 請 仙 來 。
Ing-thô pāi-tīn huê iânn-lāi ,
Tshuē bô Âng-khī tsiah ē tsai ,
Sió-tsiá pī lia̍h kánn ē hāi ,
Kín tì hiunn-uànn tshiánn sian lâi .
誠心 卜 請 龍眼娘 ，
直日 功曹 接 信香 ？
將 伊 个 香 執 在 手 ，
騰雲駕霧 出 戰場 。
Sîng-sim beh tshiánn Lîng-gíng-niû ,
Ti̍t-ji̍t kong-tsô tsiap sìn-hiunn ?
Tsiong i ê hiunn tsip tsāi tshiú ,
Thîng-hûn-kà-bū tshut tsiàn-tiûnn .
來 到 團圓金丸洞 ，
龍眼 座禪 訓練 功 ，
功曹 送 香 專 不廣 ，
仙姑 鼻 香 情 難 當 。
Lâi kàu Thuân-înn-kim-uân-tōng ,
Lîng-gíng tsē-siân hùn-liān kong ,
Kong-tsô sàng hiunn tsuan m̄-kóng ,
Sian-koo phīnn hiunn tsîng lân tong .
龍眼 掘指 就 知影 ，
仙娥 下凡 大植 營 ，
眾人 迎請 葡萄子 ，
卜 共 桑才 大 須營 。
Lîng-gíng khut-tsuínn to̍h tsai-iánn ,
Sian-ngôo hā-huân tāi-tit iânn ,
Tsìng-lâng ngiâ-tshiánn Phû-tô-kiánn ,
Beh kāng sng-tsâi tuā su-iânn .
葡萄 仙娥 就 出陣 ，
奉 師 法旨 下 凡塵 ，
陣內 戰鼓 摧 真 緊 ，
共 伊 桑才 柄 認真 。
Phû-tô sian-ngôo to̍h tshut-tīn ,
Hōng su huat-tsí hā huân-tîn ,
Tīn-lāi tsiàn-kóo tshui tsin kín ,
Kāng i Sng-tsâi piànn jīn-tsin .
桑才 伊 執 桑葉 扇 ，
仙娥 藤根 執 一枝 ，
二人 上 陣 柄 生死 ，
各人 祭 寶 真 出奇 。
Sng-tsâi i tsip sng-hio̍h sìnn ,
Sian-ngôo tîn-kin tsip tsi̍t-ki ,
Nn̄g-lâng tshiūnn tīn piànn sinn-sí ,
Kok-lâng tsè pó tsin tshut-kî .
桑才 敗陣 祭 桑葉 ，
扇葉 个 風 真正 燒 ，
葡萄 仙娥 想 愛 笑 ，
罵 伊 桑才 禍 自 招 。
Sng-tsâi pāi-tīn tsè sng-hio̍h ,
Sìnn-hio̍h ê hong tsin-tsiànn sio ,
Phû-tô sian-ngôo siūnn ài tshiò ,
Mē i Sng-tsâi hō tsū tsio .
葡萄 祭 石 緊 開嘴 ，
五光 石頭 吐 歸追 ，
祭 在 空中 真正 水 ，
五彩 神光 格 相隨 。
Phû-tô tsè tsio̍h kín khui-tshuì ,
Ngóo-kong tsio̍h-thâu thòo kui-tui ,
Tsè tī khong-tiong tsin-tsiànn suí ,
Ngóo-tshái sîn-kong kik siong-suî .
桑才 刣須 走回 營 ，
葡萄 遁 入 不 做 聲 ，
乎 伊 桑才 不知影 ，
看 無 紅柿 隻 大驚 。
Sng-tsâi thâi-su tsáu-huê iânn ,
Phû-tô tūn ji̍p m̄ tsuè siann ,
Hōo i Sng-tsâi m̄-tsai-iánn ,
Khuànn bô Âng-khī tsiah tuā-kiann .
所致 菱角 不 成 鬼 ，
被 人 偷 回 無 克虧 ，
仙娥 背 返 來 到位 ，
芎蕉 暢 甲 嘴 開開 。
Sóo-tì Lîng-kak m̄ tsiânn kuí ,
Pī lâng thau huê bô khik-khui ,
Sian-ngôo āinn tńg lâi kàu-uī ,
King-tsio thiòng kah tshuì khui-khui .
敢謝 葡萄 汝 來 救 ，
那無 紅柿 生命 休 ，
大家 塊 食 慶賀 酒 ，
菱角 想 卜 報 冤仇 。
Kám-siā Phû-tô lí lâi kiù ,
Nā-bô Âng-khī sìnn-miā hiu ,
Ta̍k-ke teh tsia̍h khìng-hō tsiú ,
Lîng-kak siūnn beh pò uan-siû .
菱角 不愿 閣 出戰 ，
現出 原形 變 代先 ，
仙娥 着驚 煞 未 變 ，
喬 着 葡萄 狂狂顛 。
Lîng-kak m̄-guān koh tshut-tsiàn ,
Hiān-tshut guân-hîng piàn tāi-sian ,
Sian-ngôo tio̍h-kiann suah buē piàn ,
Kiāu tio̍h Phû-tô kông-kông-tian .
匍匋 敗陣 起 脚 走 ，
食 落 仙丹 閣 回頭 ，
即部 乎 人 想 未 到 ，
走入 敵營 透暗 偷 。
Phû-tô pāi-tīn khí kha tsáu ,
Tsia̍h lo̍h sian-tan koh huê-thâu ,
Tsí-pōo hōo lâng siūnn buē kàu ,
Tsáu-ji̍p ti̍k-iânn thàu-àm thau .
遁 入 內面 偷 看 了 ，
葡萄 仙藤 祭 一條 ，
桑才 掠 返 算 大賬 ，
想 着 即 恨 罪 難 消 。
Tūn ji̍p lāi-bīn thau khuànn liáu ,
Phû-tô sian-tîn tsè tsi̍t-tiâu ,
Sng-tsâi lia̍h tńg sǹg tuā-siàu ,
Siūnn tio̍h tsí hūn tsuē lân siau .
卜 刣 正人 勸 不好 ，
代念 養蠶 个 功勞 ，
禁 在 監牢 免 伊 到 ，
以后 水梨 卜 伐落 。
Beh thâi tsìng-lâng khǹg m̄-hó ,
Tāi-liām ióng-tshâm ê kong-lô ,
Kìm tī kann-lô bián i tò ,
Í-āu Tsuí-lâi beh hua̍t-lo̍h .
來 將 桑才 來 皆 放 ，
解勸 菱角 來 投降 ，
損 軍 了 糧 真 害桶 ，
不免 眾仙 費 了 工 。
Lâi tsiong Sng-tsâi lâi kai pàng ,
Kué-khǹg Lîng-kak lâi tâu-hâng ,
Sńg kun liáu niû tsin hāi-tháng ,
M̄-bián tsiòng-sian huì liáu kang .
桑才 放 回 性 不解 ，
閣 去 仙山 請 人 來 ，
加己 不知 能 呆代 ，
專 卜 逆天 甲 人 刣 。
Sng-tsâi pàng huê sìng m̄-kái ,
Koh khì sian-san tshiánn lâng lâi ,
Ka-kī m̄-tsai ē pháinn-tāi ,
Tsuan beh gi̍k-thinn kah lâng thâi .
來 到 金蜂黃花島 ，
金光 洞內 金柑姑 ，
即 个 又閣 是 查某 ，
桑才 共 伊 廣 歸埔 。
Lâi kàu Kim-phang-n̂g-hue-tóo ,
Kim-kong tōng-lāi Kim-kam-koo ,
Tsit ê iū-koh sī tsa-bóo ,
Sng-tsâi kā i kóng kui-poo .
金柑 听 了 大 受氣 ，
提 出 寶貝 在 身邊 ，
楊萄 樹梅 不知死 ，
串 做 代志 卜 逆天 。
Kim-kam thiann liáu tuā siū-khì ,
The̍h tshut pó-puè tī sin-pinn ,
Iûnn-thô Tshiū-m̂ m̄-tsai-sí ,
Tshuàn tsuè tāi-tsì beh gi̍k-thinn .
金柑 手 執 黃金莿 ，
相 刣 即欵 做 家施 ，
閣 能 運動 人 元氣 ，
金光 燦爛 真正 奇 。
Kim-kam tshiú tsip n̂g-kim-tshì ,
Sio thâi tsit-khuán tsuè ke-si ,
Koh ē ūn-tōng lâng guân-khì ,
Kim-kong tshàn-lān tsin-tsiànn kî .
金柑 出陣 祭 金光 ，
葡萄 着驚 乱乱藏 ，
敗陣 走 返 通 不廣 ，
暗暗 偷偷 在 后方 。
Kim-kam tshut-tīn tsè kim-kong ,
Phû-tô tio̍h-kiann luān-luān-tsông ,
Pāi-tīn tsáu tńg thong m̄-kóng ,
Àm-àm thau-thau tī āu-hong .
仙娥 暗 祭 葡萄藤 ，
金柑 被 伊 栶 在 身 ，
縛 在 身軀 栶緊緊 ，
寶貝 利害 實 非 輕 。
Sian-ngôo àm tsè phû-tô-tîn ,
Kim-kam pī i khún tsāi sin ,
Pa̍k tī sin-khu khún-kín-kín ,
Pó-puè lī-hāi si̍t hui khin .
金柑 被 禁 在 后營 ，
桑才 聞 報 着 大驚 ，
廣 乎 正人 伊 知影 ，
閣 去 請 仙 來 須營 。
Kim-kam pī kìm tī āu-iânn ,
Sng-tsâi bûn pò tio̍h tuā-kiann ,
Kóng hōo tsìng-lâng i tsai-iánn ,
Koh khì tshiánn sian lâi su-iânn .
來 到 翠藍黃瓜洞 ，
金桔 仙姑 瓦 西方 ，
桑才 入 洞 緊 去 廣 ，
被 伊 格 甲 氣蒼蒼 。
Lâi kàu Tshuì-nâ-n̂g-kue-tōng ,
Kim-kiat sian-koo uá se-hong ,
Sng-tsâi ji̍p tōng kín khì kóng ,
Pī i kik kah khì-tshong-tshong .
桑才 效肖 上 不好 ，
格 伊 金桔 心火 刀 ，
共 伊 桑才 做陣 到 ，
不是 伊 死 我 命 無 。
Sng-tsâi hau-siâu siōng m̄-hó ,
Kik i Kim-kiat sim-hué to̍h ,
Kāng i Sng-tsâi tsuè-tīn tò ,
M̄-sī i sí guá miā bô .
即擺 兩平 來 出陣 ，
戰法 大家 閣 換 新 ，
金桔 莿捧 摧 真 緊 ，
仙娥 伊 拋 葡萄藤 。
Tsit-pái nn̄g-pîng lâi tshut-tīn ,
Tsiàn-huat ta̍k-ke koh uānn sin ,
Kim-kiat tshì-pāng tshui tsin kín ,
Sian-ngôo i pha phû-tô-tîn .
葡萄 來 戰 伊 金桔 ，
刣 甲 身 燒 頭面 烈 ，
二人 拜師 所 訓練 ，
為着 楊萄 仙柄仙 。
Phû-tô lâi tsiàn i Kim-kiat ,
Thâi kah sin sio thâu-bīn jia̍t ,
Nn̄g-lâng pài-su sóo hùn-liān ,
Uī-tio̍h Iûnn-thô sian-piànn-sian .
金桔 祭 出 桔仔搥 ，
仙娥 藤仔 展開開 ，
祭 在 空中 來 到位 ，
能 縛 桔仔 足 古錐 。
Kim-kiat tsè tshut kiat-á-thuî ,
Sian-ngôo tîn-á tián-khui-khui ,
Tsè tī khong-tiong lâi kàu-uī ,
Ē pa̍k kiat-á tsiok kóo-tsui .
葡萄 仙藤 那 栶索 ，
縛 入 桔仔 在 天羅 ，
櫻桃 水梨 成 呵老 ，
專 是 葡萄 个 功勞 。
Phû-tô sian-tîn ná khún-soh ,
Pa̍k li̍p Kiat-á tī thian-lô ,
Ing-thô Tsuí-lâi tsiânn o-ló ,
Tsuân sī Phû-tô ê kong-lô .
桑才 即擺 上 青慘 ，
連 失 金桔 甲 金柑 ，
煩惱 失神 不知 暗 ，
定定 領 須 足 不甘 。
Sng-tsâi tsí-páinn siōng tshi-tshám ,
Liân sit Kim-kiat kah Kim-kam ,
Huân-ló sit-sîn m̄-tsai àm ,
Tiānn-tiānn niá su tsiok m̄-kam .
管 糧 來 報 無 糧草 ，
桑才 煩惱 乱抄抄 ，
無通 食 過 七 下罩 ，
摧 糧 个 人 分 双頭 。
Kuán niû lâi pò bô niû-tsháu ,
Sng-tsâi huân-ló luān-tshiau-tshiau ,
Bô-thang tsia̍h kè tshit ē-tàu ,
Tshui niû ê lâng hun siang-thâu .
去 催 藍拔 關刀豆 ，
呌 伊 運糧 謹 來 交 ，
菱角 一生 極 肴 走 ，
天王 走 甲 無 曰頭 。
Khì tshui Ná-pua̍t Kuan-to-tāu ,
Kiò i ūn-niû kín lâi kau ,
Lîng-kak it-sing ki̍k gâu tsáu ,
Thian-ông tsáu kah bô uat-thâu .
藍拔 橄欖 運 糧草 ，
運 來 大營 謹 來 交 ，
到位 門｜好 日頭 罩 ，
二人 交令 入 內頭 。
Ná-pua̍t Kann-ná ūn niû-tsháu ,
Ūn lâi tuā-iânn kín lâi kau ,
Kàu-uī tú-hó ji̍t-thâu tàu ,
Nn̄g-lâng kiáu-līng ji̍p lāi-thâu .
就 問 出戰 勝 亦 敗 ？
藍拔 听說 笑咳咳 ，
那廣 出戰 我 上 愛 ，
明日 我 去 甲 伊 刣 。
To̍h mn̄g tshut-tsiàn sìng ia̍h pāi ?
Ná-pua̍t thiann-sueh tshiò-hai-hai ,
Nā-kóng tshut-tsiàn guá siōng ài ,
Bîng-ji̍t guá khì kah i thâi .
出陣 就 招 關刀豆 ，
二位 大王 出 外頭 ，
不知 好呆 開 步 走 ，
鴛鴦豆兵 代先 抄 。
Tshut-tīn to̍h tsio Kuan-to-tāu ,
Nn̄g-uī tuā-ông tshut guā-thâu ,
M̄-tsai hó-pháinn khui pōo tsáu ,
Uan-iunn-tāu-ping tāi-sing tshiau .
兩平 通批 卜 出戰 ，
王萊 將軍 箭 做 前 ，
瓜子 武藝 亦 卜 展 ，
門｜ 着 藍拔 隻 了然 。
Nn̄g-pîng thong-pue beh tshut-tsiàn ,
Ông-lâi tsiong-kun tsinn tsuè tsiân ,
Kue-tsí bú-gē ia̍h beh tián ,
Tú tio̍h Ná-pua̍t tsiah liáu-jiân .
王萊 瓜子 通 刣敗 ，
卜 知 伊 亦 不敢 來 ，
二將 知 了 能 呆 代 ，
葡萄 祭 寶 無 人 知 。
Ông-lâi Kue-tsí thong thâi-pāi ,
Beh tsai i ia̍h m̄-kánn lâi ,
Jī-tsiòng tsai liáu ē pháinn tāi ,
Phû-tô tsè pó bô lâng tsai .
仙娥 暗 祭 葡萄藤 ，
無彩 二个 成 認真 ，
將 伊 拔 豆 縛謹謹 ，
任 汝 先走 未 脫身 。
Sian-ngôo àm tsè phû-tô-tîn ,
Bô-tshái nn̄g-ê tsiânn jīn-tsin ,
Tsiong i Pua̍t Tāu pa̍k-kín-kín ,
Jīm lí sian-tsáu bē thuat-sin .
力 着 藍拔 關刀豆 ，
即漸 柚仔 卜 出頭 ，
桑才 親身 請 伊 到 ，
官兵 刣 須 乱抄抄 。
Lia̍h tio̍h Ná-pua̍t Kuan-to-tāu ,
Tsit-tsām Iū-á beh tshut-thâu ,
Sng-tsâi tshin-sin tshiánn i kàu ,
Kuann-ping thâi su luān-tshiau-tshiau .
柚仔 出陣 連連勝 ，
櫻桃 刣 須 大 不明 ，
專 用 柚汁 个 本頂 ，
門｜ 着 甘蔗 難 同情 。
Iū-á tshut-tīn liân-liân-sìng ,
Ing-thô thâi su tāi put-bîng ,
Tsuan īng iū-tsiap ê pún-tíng ,
Tú tio̍h Kam-tsià lân tông-tsîng .
眾人 刣須 通通走 ，
甘蔗 祭 出 甘蔗頭 ，
打着 斗柚 開聲 哭 ，
葡萄 仙娥 后頭 包 。
Tsìng-lâng thâi-su thong-thong-tsáu ,
Kam-tsià tsè tshut kam-tsià-thâu ,
Phah-tio̍h Táu-iū khui-siann khàu ,
Phû-tô sian-ngôo āu-thâu pau .
仙娥 祭出 葡萄藤 ，
柚仔 先走 未 脫身 ，
斗柚 員員 黃皮面 ，
禁 在 監牢 足 可憐 。
Sian-ngôo tsè-tshut phû-tô-tîn ,
Iū-á sian-tsáu buē thuat-sin ,
Táu-iū înn-înn n̂g-phê-bīn ,
Kìm tī kann-lô tsiok khó-lîn .
桑才 听着 知 呆代 ，
無花菓仙 加治 來 ，
即位 仙長 帶 上界 ，
未來 過去 專 能 知 。
Sng-tsâi thiann--tio̍h tsai pháinn-tāi ,
Bû-hue-kó-sian ka-tī lâi ,
Tsiat-uī sian-tióng tuà siōng-kài ,
Bī-lâi kè-khì tsuan ē tsai .
僥倖 加治 來 討 死 ，
見着 葡萄 無半糸 ，
門｜ 着 油柑 來 到 止 ，
走 來 出陣 卜 救 伊 。
Hiau-hīng ka-tī lâi thó sí ,
Kìnn-tio̍h Phû-tô bô-puànn-si ,
Tú tio̍h Iû-kam lâi kàu tsí ,
Tsáu lâi tshut-tīn beh kiù i .
油柑 卜 救 戰 龍眼 ，
龍眼 个 壳 祭 代先 ，
油柑 走 入 車 拔炳 ，
二人 被 力 難 做 情 。
Iû-kam beh kiù tsiàn Lîng-gíng ,
Lîng-gíng ê khak tsè tāi-sing ,
Iû-kam tsáu ji̍p tshia pua̍h-píng ,
Nn̄g-lâng pī lia̍h lân tông tsîng .
頻苞 親 來 賊營 內 ，
自 領 出爭 愛 相刣 ，
紅棗 進貢 上介 愛 ，
棗棍 執 對 大營 來 。
Phin-phau tshin lâi tsha̍t-iânn lāi ,
Tsū niá tshut-tsing ài sio-thâi ,
Âng-tsó tsìn-kòng siōng-kài ài ,
Tsó-kùn tsip tuì tuā-iânn lâi .
頻苞 第一 驚 棗莿 ，
紅棗 員外 紅綿綿 ，
頻苞 戇面 不知死 ，
被 打 大空 甲 小裂 。
Phin-phau tē-it kiann tsó-tshì ,
Âng-tsó guân-guē âng-mî-mî ,
Phin-phau gōng-bīn m̄-tsai-sí ,
Pī phah tuā-khang kah sè-li̍h8 .
凸柑 皇后 有 災難 ，
身体 有 病 不 平安 ，
枇把 求 醫 店塊 等 ，
佛手 大仙 下 凡間 。
Phòng-kam hông-hiō ū tsai-lān ,
Sin-thé ū pīnn put pîng-an ,
Pî-pê kiû i tiàm-teh tán ,
Hu̍t-siú tāi-sian hā huân-kan .
仙草 道童 甲 水梨 ，
西竺 山中 師徒 來 ，
卜 請 二仙 做 好代 ，
到 京 釋迦 上 金階 。
Sian-tsháu tō-tông kah Tsuí-lâi ,
Se-tiok suann-tiong su-tôo lâi ,
Beh tshiánn jī-sian tsuè hó-tāi ,
Kàu kiann Sik-khia tsiūnn kim-kai .
枇把 救 某 命 要謹 ，
欵待 二仙 做 上賓 ，
醫治 柑后 入 內面 ，
釋迦 佛手 染 凡塵 。
Pî-pê kiù bóo miā iàu-kín ,
Khuán-thāi jī-sian tsuè siōng-pin ,
I-tī kam-hiō ji̍p lāi-bīn ,
Sik-khia Hu̍t-siú jiám huân-tîn .
柑后 病体 醫 好好 ，
相刣 二仙 煞 廣和 ，
即欵 一國 廣 百菓 ，
佛手 釋迦 藝術 高 。
Kam-hiō pēnn-thé i hó-hó ,
Sio-thâi jī-sian suah kóng-hô ,
Tsit-khuán tsi̍t-kok kóng pah-kó ,
Hu̍t-tshiú Sik-khia gē-su̍t ko .
上本