一步 珠淚 苦 在 心 ， 感 君 待 妾 情意 深 ， 望 卜 永遠 來 同情 ， 無疑 勞燕 來 分形 。	Tsi̍t-pōo tsu-luī khóo tsāi sim , Kám kun thāi tshiap tsîng-ì tshim , Bāng beh íng-uán lâi kâng-tsîng , Bô-gî lô-iàn lâi hun-hîng . Chi̍t-pō͘ chu-lūi khó͘ chāi sim , Kám kun thāi chhiap chêng-ì chhim , Bāng beh éng-óan lâi kâng-chêng , Bô-gî lô-iàn lâi hun-hêng .
二步 珠淚 驚 人 哉 ， 月老 姻緣 錯 推排 ， 一人 分開 一 所在 ， 情郎 返去 着閣 來 。	Ln̄g-pōo tsu-luī kiann lâng tsai , Gua̍t-nóo in-iân tshò tshui-phâi , Tsi̍t-lâng pun-khui tsi̍t sóo-tsāi , Tsîng-lông tńg--khì tio̍h-koh lâi . Ln̄g-pō͘ chu-lūi kiaⁿ lâng chai , Goa̍t-nó͘ in-iân chhò chhui-phâi , Chi̍t-lâng pun-khui chi̍t só͘-chāi , Chêng-lông tńg--khì tio̍h-koh lâi .
三步 珠淚 心 着急 ， 情同意合 深 如 密 ， 敢是 前世 做 失德 ， 即會 夗央 不 比翼 。	Sann-pōo tsu-luī sim tio̍h-kit , Tsîng-tông-ì-ha̍p tshim lû bi̍t , Kám-sī tsîng-sì tsuè sit-tik , Tsiah-ē uan-iunn put pí-i̍k . Saⁿ-pō͘ chu-lūi sim tio̍h-kit , Chêng-tông-ì-ha̍p chhim lû bi̍t , Kám-sī chêng-sì chòe sit-tek , Chiah-ē oan-iuⁿ put pí-e̍k .
四步 珠淚 開聲 哮 ， 情意 深切 不 到 頭 ， 望 卜 雙人 好 到 老 ， 無疑 有頭 無 尾稍 。	Sì-pōo tsu-luī khui-siann háu , Tsîng-ì tshim-tshiat m̄ kàu thâu , Bāng beh sang-lâng hó kàu lāu , Bô-gî ū-thâu bô bé-sau . Sì-pō͘ chu-lūi khui-siaⁿ háu , Chêng-ì chhim-chhiat m̄ kàu thâu , Bāng beh sang-lâng hó kàu lāu , Bô-gî ū-thâu bô bé-sau .
五步 珠淚 哮 出 聲 ， 思想 情郎 無心成 ， 閻王 註定 咱 呆命 ， 即 着 折散 分路 行 。	Gōo-pōo tsu-luī háu tshut siann , Su-siūnn tsîng-lông bô-sim-tsiânn , Giâm-ông tsù-tiānn lán phái-miā , Tsiah tio̍h thiat-suànn hun-lōo kiânn . Gō͘-pō͘ chu-lūi háu chhut siaⁿ , Su-siūⁿ chêng-lông bô-sim-chiâⁿ , Giâm-ông chù-tiāⁿ lán phái-miā , Chiah tio̍h thiat-sòaⁿ hun-lō͘ kiâⁿ .
六步 珠淚 慘切 啼 ， 聽 君 卜 返 心頭 悲 ， 望 卜 盡情 甲 情義 ， 今日 分開 真無疑 。	La̍k-pōo tsu-luī tshám-tsheh thî , Thiann kun beh tńg sim-thâu pi , Bāng beh tsīn-tsîng kah tsīn-ī , Kim-li̍t pun-khui tsin-bô-gî . La̍k-pō͘ chu-lūi chhám-chheh thî , Thiaⁿ kun beh tńg sim-thâu pi , Bāng beh chīn-chêng kah chīn-ī , Kim-li̍t pun-khui chin-bô-gî .
七步 珠淚 哮 出聲 ， 情郎 相辭 行 出 埋 ， 吩咐 加己 顧 身命 ， 冥 來 早宿 日 早 行 。	Tshit-pōo tsu-luī háu tshut-siann , Tsîng-lông sann-sî kiânn tshut thiann , Huan-hù ka-kī kòo sin-miā , Mî lâi tsá-hioh li̍t tsá kiânn . Chhit-pō͘ chu-lūi háu chhut-siaⁿ , Chêng-lông saⁿ-sî kiâⁿ chhut thiaⁿ , Hoan-hù ka-kī kò͘ sin-miā , Mî lâi chá-hioh li̍t chá kiâⁿ .
八步 珠淚 送 君 返 ， 回頭 相看 心頭 酸 ， 望 卜 雙人 好 久長 ， 無疑 無尾 半中央 。	Pueh-pōo tsu-luī sàng kun tńg , Huê-thâu sann-khuànn sim-thâu sng , Bāng beh sang-lâng hó kú-tn̂g , Bô-gî bô-bé puànn-tiong-ng . Poeh-pō͘ chu-lūi sàng kun tńg , Hôe-thâu saⁿ-khòaⁿ sim-thâu sng , Bāng beh sang-lâng hó kú-tn̂g , Bô-gî bô-bé pòaⁿ-tiong-ng .
九步 珠淚 為着 哥 ， 今 來 分開 無奈何 ， 感 君 待 妾 情意 好 ， 親像 割肉 用 慢 刀 。	Káu-pōo tsu-luī uī-tio̍h ko , Tann lâi pun-khui bô-nāi-hô , Kám kun thāi tshiap tsîng-ì hó , Tshin-tshiūnn kuah-bah īng bān to . Káu-pō͘ chu-lūi ūi-tio̍h ko , Taⁿ lâi pun-khui bô-nāi-hô , Kám kun thāi chhiap chêng-ì hó , Chhin-chhiūⁿ koah-bah ēng bān to .
十步 珠淚 目柯 腫 ， 我 君 待 阮 真 有情 ， 一百 二百 提 阮 用 ， 話頭 言語 全 無 瓊 。	Tsa̍p-pōo tsu-luī ba̍k-khoo tsíng , Guá kun thāi guán tsin ū-tsîng , Tsit-pah ln̄g-pah the̍h gún īng , Uē-thâu giân-gí tsuân bô khîng . Cha̍p-pō͘ chu-lūi ba̍k-kho͘ chéng , Góa kun thāi góan chin ū-chêng , Chit-pah ln̄g-pah the̍h gún ēng , Ōe-thâu giân-gí chôan bô khêng .
十一 珠淚 湳淚 啼 ， 憶着 情郎 心腸 悲 ， 望 卜 夗央 做 一池 ， 誰 知 鸞鳳 分 二邊 。	Tsa̍p-it tsu-luī lâm-luī thî , It-tio̍h tsîng-lông sim-tn̂g pi , Bāng beh uan-iunn tsuè tsi̍t-tî , Tsuî tsai luân-hōng pun ln̄g-pinn . Cha̍p-it chu-lūi lâm-lūi thî , It-tio̍h chêng-lông sim-tn̂g pi , Bāng beh oan-iuⁿ chòe chi̍t-tî , Chûi chai lôan-hōng pun ln̄g-piⁿ .
十二 珠淚 挂 目墘 ， 汝 娘 思君 埋怨 天 ， 月老 算盤 拍 錯 見 ， 將 阮 姻緣 折 二邊 。	Tsa̍p-lī tsu-luī kuì ba̍k-kînn , Lí niû su-kun bâi-uàn thinn , Gua̍t-nóo sǹg-puânn phah tshò kìnn , Tsiong gún in-iân thiah ln̄g-pinn . Cha̍p-lī chu-lūi kùi ba̍k-kîⁿ , Lí niû su-kun bâi-òan thiⁿ , Goa̍t-nó͘ sǹg-pôaⁿ phah chhò kìⁿ , Chiong gún in-iân thiah ln̄g-piⁿ .
十三 珠淚 淚 累面 ， 君 妾 情 深 心 無 變 ， 一步 三轉 看 君 面 ， 藕斷絲連 情 相牽 。	Tsa̍p-sann tsu-luī luī luī-biān , Kun tshiap tsîng tshim sim bô piàn , Tsi̍t-pōo sann-tńg khuànn kun biān , Gió-tuān-si-liân tsîng sann-khian . Cha̍p-saⁿ chu-lūi lūi lūi-biān , Kun chhiap chêng chhim sim bô piàn , Chi̍t-pō͘ saⁿ-tńg khòaⁿ kun biān , Gió-tōan-si-liân chêng saⁿ-khian .
十四 珠淚 滿 胸前 ， 難 割 難 捨 哥 深情 ， 捧 起 琶琵 來 遮 面 ， 聲聲 彈 出 斷腸聲 。	Tsa̍p-sì tsu-luī muá hîng-tsîng , Lân kuah lân sià ko tshim-tsîng , Phóng khí khî-pê lâi tsia bīn , Siann-siann tuânn tshut tuān-tiông-sing . Cha̍p-sì chu-lūi móa hêng-chêng , Lân koah lân sià ko chhim-chêng , Phóng khí khî-pê lâi chia bīn , Siaⁿ-siaⁿ tôaⁿ chhut tōan-tiông-seng .
十五 珠淚 淚 淋漓 ， 越頭 看 君 湳淚 啼 ， 叮嚀 寄語 情郎 知 ， 今生 無緣 寄 後世 。	Tsa̍p-gōo tsu-luī luī lîm-lî , Ua̍t-thâu khuànn kun lâm-luī thî , Ting-lîng kià-gú tsîng-lông ti , Kim-sing bô-iân kià āu-sì . Cha̍p-gō͘ chu-lūi lūi lîm-lî , Oa̍t-thâu khòaⁿ kun lâm-lūi thî , Teng-lêng kià-gú chêng-lông ti , Kim-seng bô-iân kià āu-sì .
十六 珠淚 透 羅裙 ， 龍肝 鳳髓 不愛 吞 ， 命 呆 無 人 親像 阮 ， 深山 孤雁 哮 無 群 。	Tsa̍p-la̍k tsu-luī thàu lô-kûn , Lîng-kuann hōng-tshé m̄-ài thun , Miā phái bô lâng tshin-tshiūnn gún , Tshim-suann koo-gān háu bô kûn . Cha̍p-la̍k chu-lūi thàu lô-kûn , Lêng-koaⁿ hōng-chhé m̄-ài thun , Miā phái bô lâng chhin-chhiūⁿ gún , Chhim-soaⁿ ko͘-gān háu bô kûn .
十七 珠淚 淚 落塗 ， 日 來 割腸 冥 割肚 ， 割 到 心肝 碎糊糊 ， 煩惱 治時 目周 烏 。	Tsa̍p-tshit tsu-luī luī lo̍h-thôo , Li̍t lâi kuah-tn̂g mî kuah-tōo , Kuah kah sim-kuann tshuì-kôo-kôo , Huân-ló tī-sî ba̍k-tsiu oo . Cha̍p-chhit chu-lūi lūi lo̍h-thô͘ , Li̍t lâi koah-tn̂g mî koah-tō͘ , Koah kah sim-koaⁿ chhùi-kô͘-kô͘ , Hôan-ló tī-sî ba̍k-chiu o͘ .
十八 珠淚 雙平 垂 ， 想着 情郎 心肝 碎 ， 陽間 無緣 來 分開 ， 死 到 陰府 做一堆 。	Tsa̍p-pueh tsu-luī sang-pîng suî , Siūnn-tio̍h tsîng-lông sim-kuann tshuì , Iông-kan bô-iân lâi pun-khui , Sí kàu im-hú tsuè-tsi̍t-tui . Cha̍p-poeh chu-lūi sang-pêng sûi , Siūⁿ-tio̍h chêng-lông sim-koaⁿ chhùi , Iông-kan bô-iân lâi pun-khui , Sí kàu im-hú chòe-chi̍t-tui .
十九 珠淚 淚 絲絲 ， 一日 煩惱 十二時 ， 望 君 保重 金 身己 ， 免 我 煩惱 加 傷悲 。	Tsap-káu tsu-luī luī si-si , Tsi̍t-li̍t huân-ló tsa̍p-lī-sî , Bāng kun pó-tiōng kim sin-kí , Bián guá huân-ló ke siong-pi . Chap-káu chu-lūi lūi si-si , Chi̍t-li̍t hôan-ló cha̍p-lī-sî , Bāng kun pó-tiōng kim sin-kí , Bián góa hôan-ló ke siong-pi .
二十 珠淚 點點 流 ， 冥日 哀怨 在 心頭 ， 月老 姻緣 註 無 到 ， 死 到 陰間 去 磕頭 。	Lī-tsa̍p tsu-luī tiám-tiám lâu , Mî-li̍t ai-uàn tsāi sim-thâu , Gua̍t-nóo in-iân tsù bô kàu , Sí kàu im-kan khì kha̍p-thâu . Lī-cha̍p chu-lūi tiám-tiám lâu , Mî-li̍t ai-òan chāi sim-thâu , Goa̍t-nó͘ in-iân chù bô kàu , Sí kàu im-kan khì kha̍p-thâu .
廿一 珠淚 淚 汪洋 ， 好事 多磨 本 平常 ， 望 君 身体 照顧 勇 ， 後會有期 再 思量 。	Lī-it tsu-luī luī ong-iông , Hó-sū to-buâ pún pîng-siông , Bāng kun sin-thé tsiàu-kòo ióng , Hiō-huē-iú-kî tsài su-liông . Lī-it chu-lūi lūi ong-iông , Hó-sū to-bôa pún pêng-siông , Bāng kun sin-thé chiàu-kò͘ ióng , Hiō-hōe-iú-kî chài su-liông .
廿二 珠淚 如 海水 ， 二人 折散 真 克虧 ， 月老 注定 無 改為 ， 迫 到 乎 咱 着 分開 。	Lī-lī tsu-luī lû hái-tsuí , Ln̄g-lâng thiah-suànn tsin khik-khui , Gua̍t-nóo tsù-tiānn bô kái-uî , Pik kah hōo lán tio̍h pun-khui . Lī-lī chu-lūi lû hái-chúi , Ln̄g-lâng thiah-sòaⁿ chin khek-khui , Goa̍t-nó͘ chù-tiāⁿ bô kái-ûi , Pek kah hō͘ lán tio̍h pun-khui .
廿三 珠淚 一直 滴 ， 情郎 念 我 我 念 伊 ， 月老 帳簿 寫 錯字 ， 冤枉 有只 天地 知 。	Lī-sann tsu-luī it-ti̍t ti̍h , Tsîng-lông liām guá guá liām i , Guat-nóo siàu-phōo siá tshò-lī , Uan-óng ū-tsí thian-tē ti . Lī-saⁿ chu-lūi it-ti̍t ti̍h , Chêng-lông liām góa góa liām i , Goat-nó͘ siàu-phō͘ siá chhò-lī , Oan-óng ū-chí thian-tē ti .
廿四 珠淚 淚 流完 ， 一日 想 君 換 一款 ， 命 呆 無 人 即 齊全 ， 破鏡 不敢 再 團圓 。	Lī-sì tsu-luī luī lâu-uân , Tsi̍t-li̍t siūnn kun uānn tsi̍t-khuán , Miā phái bô lâng tsiah tsuê-tsuân , Phuà-kiánn m̄-kánn tsài thuân-uân . Lī-sì chu-lūi lūi lâu-ôan , Chi̍t-li̍t siūⁿ kun ōaⁿ chi̍t-khóan , Miā phái bô lâng chiah chôe-chôan , Phòa-kiáⁿ m̄-káⁿ chài thôan-ôan .
廿五 珠淚 淚 成 血 ， 憶着 情郎 分 不開 ， 酒 不 醉 人 人 自 醉 ， 眼 不 流淚 淚 雙垂 。	Lī-gōo tsu-luī luī sîng hui̍h , It-tio̍h tsîng-lông pun buē-khui , Tsiú put tsuì lîn lîn tsū tsuì , Gán put liû-luī luī sang-suî . Lī-gō͘ chu-lūi lūi sêng hui̍h , It-tio̍h chêng-lông pun bōe-khui , Chiú put chùi lîn lîn chū chùi , Gán put liû-lūi lūi sang-sûi .
廿六 珠淚 滴滴 紅 ， 冥目 煩惱 百外 項 ， 無非 為着 君 一人 ， 呆命 孤鳥 那 散鋒 。	Lī-la̍k tsu-luī ti̍h-ti̍h âng , Mî-li̍t huân-ló pah-guā hāng , Bû-hui uī-tio̍h kun tsi̍t-lâng , Phái-miā koo-tsiáu ná suànn-phang . Lī-la̍k chu-lūi ti̍h-ti̍h âng , Mî-li̍t hôan-ló pah-gōa hāng , Bû-hui ūi-tio̍h kun chi̍t-lâng , Phái-miā ko͘-chiáu ná sòaⁿ-phang .
廿七 珠淚 血 滿面 ， 千辛萬苦 為 君 恁 ， 望 卜 兩心 來 相印 ， 今日 折散 足 無 因 。	Lī-tshit tsu-luī hui̍h muá-bīn , Tshian-sin-bān-khóo uī kun lín , Bāng beh lióng-sim lâi siong-ìn , Kim-li̍t thiah-suànn tsiok bô in . Lī-chhit chu-lūi hui̍h móa-bīn , Chhian-sin-bān-khó͘ ūi kun lín , Bāng beh lióng-sim lâi siong-ìn , Kim-li̍t thiah-sòaⁿ chiok bô in .
廿八 珠淚 牽 衫 擦 ， 煩惱 無冥 甲 無日 ， 情郎 平安 恰 在的 ， 那 無 割吊 在的 直 ！	Lī-peh tsu-luī khan sann tshit , Huân-ló bô-mî kah bô-li̍t , Tsîng-lông pîng-an khah tsāi-tit , Nā bô kuà-tiàu tsāi-tit ti̍t ! Lī-peh chu-lūi khan saⁿ chhit , Hôan-ló bô-mî kah bô-li̍t , Chêng-lông pêng-an khah chāi-tit , Nā bô kòa-tiàu chāi-tit ti̍t !
廿九 珠淚 血 流 盡 ， 盡門 一句 說 盡情 ， 別 做 親事 顧 終身 ， 無後為大 真 罪人 。	Lī-káu tsu-luī hui̍h lâu tsīn , Tsīn-bn̂g tsi̍t-kù seh tsīn-tsîng , Pa̍t tsuè tshin-sū kòo tsiong-sin , Bû-hiō-uī-tāi tsin tsuē-lîn . Lī-káu chu-lūi hui̍h lâu chīn , Chīn-bn̂g chi̍t-kù seh chīn-chêng , Pa̍t chòe chhin-sū kò͘ chiong-sin , Bû-hiō-ūi-tāi chin chōe-lîn .
三十 珠淚 血 流離 ， 情郎 回 心 着 返 意 ， 別 做 姻緣 結連理 ， 通 顧 祖宗 香爐耳 。	Sann-tsa̍p tsu-luī hui̍h lâu-lī , Tsîng-lông huê sim tio̍h tńg ì , Pa̍t tsuè in-iân kiat-liân-lí , Thang kòo tsóng-tsong hiunn-lôo-hīnn . Saⁿ-cha̍p chu-lūi hui̍h lâu-lī , Chêng-lông hôe sim tio̍h tńg ì , Pa̍t chòe in-iân kiat-liân-lí , Thang kò͘ chóng-chong hiuⁿ-lô͘-hīⁿ .