| 冊名 | 最新百樣花全歌 |
| 編者 | 未知 |
| 出版社 | 廈門博文齋書局 |
| 出版年 | 1931 |
| 篇名 | 全本 |
| 世間 做人 真 荒花 ， 聽唱 一套 百花歌 ， 以 花 為 句 相褒欹 ， 人人 聽見 心 歡喜 。 |
Sè-kan tsuè-lâng tsin hong-hua , Thiann-tshiùnn tsi̍t-thò Pah-hue-kua , Í hue uî kù sio-po-khi , Lâng-lâng thiann-kìnn sim huann-hí . |
| 牡丹 開花 笑微微 ， 娘子 生來 真縹致 ， 害君 冥日 病相思 ， 想卜 共 娘 結連理 。 |
Bóo-tan khui-hue tshiò-bi-bi , Niû-kiánn sinn--lâi tsin-piau-tì , Hāi-kun mî-li̍t pīnn-siunn-si , Siūnn-beh kāng niû kiat-liân-lí . |
| 玉蘭 含蕋 正 當時 ， 親淺 郎君 人 歡喜 ， 恨 阮 親夫 不 早死 ， 乎 阮 無心 做 針仔 。 |
Gio̍k-lân hâm-luí tsiànn tong-sî , Tshin-tshínn lông-kun lâng huann-hí , Hūn gún tshin-hu m̄ tsá-sí , Hōo gún bô-sim tsuè tsiam-tsí . |
| 水仙 開花 好 排壇 ， 兄妹 二人 相對看 ， 那會 二人 同 心肝 ， 恰好 青山 冷水泉 。 |
Tsuí-sian khui-hue hó pâi-tuânn , Hiann-bē ln̄g-lâng sann-tuì-khuànn , Nā-ē ln̄g-lâng kâng sim-kuann , Khah-hó tshing-san líng-tsuí-tsuânn . |
| 芙蓉 開花 會 結子 ， 愿 共 兄哥 結 百年 。 誰人 僥心 雷 打死 ， 頭先 僥心 路傍尸 。 |
Phû-iông khui-hue ē kiat-tsí , Guān kāng hiann-ko kiat pah-nî . Tsuî-lâng hiau-sim luî phah-sí , Thâu-sing hiau-sim lōo-pông-si . |
| 金桔 開花 紅乳乳 ， 相好 那是 有 盡情 ， 會 生 會 死 着 做陣 ， 不通 放 乎 娘 單身 。 |
Kim-kiat khui-hue âng-lin-lin , Siong-hó nā-sī ū tsīn-tsîng , Ē sinn ē sí tio̍h tsuè-tīn , M̄-thang pàng hōo niû tuann-sin . |
| 連子 開花 一點紅 ， 全望 娘仔 相痛疼 ， 代念 兄哥 出外人 ， 相害 娘 爾 搃不通 。 |
Liân-tsí khui-hue tsi̍t-tiám-âng , Tsn̂g-bāng niû-kiánn sann-thiànn-thàng , Tài-liām hiann-ko tshut-guā-lâng , Siong-hāi niû lí tsóng-m̄-thang . |
| 櫻爪 開花 正 清香 ， 當今 出 有 僥倖人 ， 有 僥 無 僥 無塊看 ， 各人 双手 摸 心肝 。 |
Ing-liáu khui-hue tsiànn tshing-phang , Tong-kim tshut ū hiau-hīng-lâng , Ū hiau bô hiau bô-tè-khuànn , Kok-lâng sang-tshiú bong sim-kuann . |
| 日葵 開花 向 東平 ， 早日 那知 就 勿應 ， 費 了 心神 真 不明 。 |
Li̍t-kuî khui-hue ǹg tang-pîng , Tsá-li̍t nā-tsai tio̍h mài-ìng , Huì liáu sim-sîn tsin put-bîng . |
| 雨傘 開花 員乳乳 ， 攑高 攑低 顧 娘身 ， 一時 無見 娘子面 ， 骨頭 疼痛 袂翻身 。 |
Hōo-suànn khui-hue înn-lin-lin , Kia̍h-kuân kia̍h-kē kòo niû-sin , Tsi̍t-sî bô-kìnn niû-kiánn-bīn , Kut-thâu thàng-thiànn buē-huan-sin . |
| 風葱 開花 結 成球 ， 船車 那呆 着 抹油 ， 看見 娘仔 白 甲 幼 ， 親像 竹紙 包 紅綢 。 |
Hong-tshang khui-hue kiat tsiânn-kiû , Tsûn-tshia nā-phái tio̍h buah-iû , Khuànn-kìnn niû-kiánn pe̍h kah iù , Tshin-tshiūnn tik-tsuá pau âng-tiû . |
| 木棉 開花 有 一枝 ， 哥仔 生成 即 文理 ， 恰是 潘 安 再 出世 ， 害 阮 相思 十二時 。 |
Bo̍k-mî khui-hue ū tsi̍t-ki , Ko-á sinn-tsiânn tsiah bûn-lí , Khah-sī Phuann An tsài tshut-sì , Hāi gún siunn-si tsa̍p-lī-sî . |
| 柳烟 開花 天頂 香 ， 月 內 無 塗 也 無 沙 ， 仙桃 因何 也 會活 ？ 娘 尔 卜 嫁 着 嫁 我 ， 乎 尔 清閑 免 拖磨 。 |
Liú-ian khui-hue thinn-tíng phang , Ge̍h lāi bô thôo iā bô sua , Sian-thô in-hô mi̍h ē-ua̍h ? Niû lí beh kè tio̍h kè guá , Hōo lí tshing-îng bián thua-muâ . |
| 香楊 開花 成 佛手 ， 二人 當天 食 血酒 ， 水 撥 落地 難得收 ， 是 乜 重誓 咱 來 咒 ， 誰人 僥心 罪 着 收 。 |
Hiong-înn khui-hue sîng pu̍t-tshiú , Ln̄g-lâng tng-thinn tsia̍h hui̍h-tsiú , Tsuí phuah lo̍h-tē lân-tit-siu , Sī mi̍h tāng-tsuā lán lâi tsiù , Tsuî-lâng hiau-sim tsuē tio̍h siu . |
| 黃菊 開花 層匕 黃 ， 溪尾 過了 是 新庄 ， 卜去 娘厝 路 又 遠 ， 鉄打 脚骨 行 會酸 。 |
N̂g-kiok khui-hue tsân-tsân n̂g , Khue-bé kè-liáu sī Sin-tsng , Beh-khì niû-tshù lōo iū hn̄g , Thi̍h-phah kha-kut kiânn ē-sng . |
| 杭菊 開花 會 做 茶 ， 盡心 相好 無几個 。 咱 今 聖佛 着 來 係 ， 父母 不罵 咱二個 。 |
Hâng-kiok khui-hue ē tsuè tê , Tsīn-sim siong-hó bô-kuí-ê . Lán tann siànn-pu̍t tio̍h lâi hē , Pē-bú buē-mā lán-ln̄g-ê . |
| 五爪 開花 鴨脚 把 ， 娘仔 少年 不 去 嫁 ， 契兄 害死 午外個 ， 害人 脚瘋 崎 重枷 。 |
Ngóo-liáu khui-hue ah-kha pê , Niû-kiánn siàu-liân m̄ khì kè , Keh-hiann hāi-sí tshing-guā-ê , Hāi-lâng kha-hong kia̍h tāng-kê . |
| 蓬萊 開花 在 仙境 ， 當今 有錢 真 好用 ， 阮 今 恰 哥 拙 盡情 ， 望卜 兄哥 相牽成 。 |
Phông-lâi khui-ue tī sian-kíng , Tong-kim ū-tsînn tsin hó-īng , Gún tann kah ko tsuah tsīn-tsîng , Bāng-beh hiann-ko sann-khan-sîng . |
| 月桂 開花 是 中秋 ， 相好 不交 交 朋友 ， 朋友 落難 相解救 ， 相好 落難 結冤仇 。 |
Gua̍t-kuì khui-hue sī tiong-tshiu , Siong-hó m-kau kau pîng-iú , Pîng-iú lo̍h-lān sann-kái-kiù , Siong-hó lo̍h-lān kiat-uan-siû . |
| 黃茶 開花 在 西天 ， 前年 恰 哥 也 有緣 ， 今年 兄哥 乎 人 騙 ， 即會 恰 阮 彰 無緣 。 |
N̂g-tê khui-hue tī se-thian , Tsîng-nî kah ko iā ū-iân , Kin-nî hiann-ko hōo lâng phiàn , Tsiah-ē kah gún tsiúnn bô-iân . |
| 瑤桃 開花 仙山 有 ， 番船 過海 半沉浮 ， 未知 娘仔 在 值厝 ？ 恰慘 乎 娘 迷着符 。 |
Iâu-thô khui-hue sian-suann ū , Huan-tsûn kè-hái puànn-tîm-phû , Bē-tsai niû-kiánn tsāi tī-tshù ? Khah-tshám hōo niû bê-tio̍h-hû . |
| 赤鬚 開透 花何何 ， 哪吒 出世 提 金篐 ， 為 娘 刈吊 哀哀苦 ， 一時 烏暗 行無路 。 |
Tshiah-tshiu khui-thàu hue-hôo-hôo , Lô-tshia tshut-sì the̍h kim-khoo , Uī niû kuah-tiàu ai-ai-khóo , Tsi̍t-sî oo-àm kiânn-bô-lōo . |
| 月香 開花 香 透 天 ， 王 允 用計 献 貂蟬 ， 當初 真 戇 乎 娘 騙 ， 今日 那 想 那 了然 。 |
Gua̍t-hiong khui-hue phang thàu thinn , Ông Ún īng-kè hiàn Taiu-siân , Tong-tshe tsin gōng hōo niû phiàn , Kin-li̍t ná siūnn ná liáu-liân . |
| 禪朴 開花 在 庭前 ， 娘仔 生水 如 天仙 ， 看 有 食 無 干干唁 ， 親像 戇佛 鼻 香烟 。 |
Siân-phok khui-hue tī tîng-tsiân , Niû-kiánn sinn-suí ná thian-sian , Khuànn ū tsia̍h bô kan-kan-giàn , Tshin-tshiūnn gōng-pu̍t phīnn hiunn-ian . |
| 金鳳 開花 葉 下 黃 ， 恰 娘 相好 情 甜 糖 ， 呆人 拐唆 路 來 断 ， 咱 今 袂得 困仝床 。 |
Kim-hōng khui-hue hio̍h ē n̂g , Kah niû siong-hó tsîng tinn thn̂g , Phái-lâng kuáinn-sō lōo lâi tn̄g , Lán tann buē-tit khùn-kâng-tshn̂g . |
| 錦葵 開花 葉 會 枯 ， 頭家 亞灯 我 不 苦 ， 再 托 朋友 尋 頭路 ， 一月 無用 銀 陸篐 。 |
Gím-kuî khui-hue hio̍h ē koo , Thâu-ke a-ting guá m̄ khóo , Tsài thok pîng-iú tshē thâu-lōo , Tsi̍t-ge̍h bô-īng gûn la̍k-khoo . |
| 鹿蔥 開花 白白 波 ， 八仙 過海 藍 采和 ， 真名 正姓 共 兄 报 ， 也免 乎 哥 去 尋無 。 |
Lo̍k-tshang khui-hue pe̍h-pe̍h pho , Pat-sian kè-hái Nâ Tshái-hô , Tsin-miâ tsiànn-sìnn kā hiann pò , Iā-bián hōo ko khì tshē-bô . |
| 木香 開花 人人 愛 ， 小娘 住 在 馬柱 內 ， 兄哥 無嫌 即 卜 來 ， 門外 呌 聲 阮 就知 。 |
Bo̍k-hiunn khui-hue lâng-lâng ài , Sió-niû tuà tī bé-tiâu lāi , Hiann-ko bô-hiâm tsiah beh lâi , Bn̂g-guā kiò siann gún tio̍h-tsai . |
| 紂春 開花 布田天 ， 加霞 落水 會 廣璉 ， 娘仔 烘炉 茶古 便 ， 煎茶 請 哥 合 皆然 。 |
Tiû-tshun khui-hue pòo-tshân-thian , Ka-hâ lo̍h-tsuí ē kńg-liân , Niû-kiánn hang-lôo tê-kóo piān , Tsuann-tê tshiánn ko ha̍p kai-liân . |
| 雞冠 開花 頭 紅紅 ， 聞名 娘仔 有錢人 ， 全望 娘仔 相痛疼 ， 代念 哥 身 出外人 。 |
Kue-kè khui-hue thâu âng-âng , Bûn-miâ niû-kiánn ū-tsînn-lâng , Tsn̂g-bāng niû-kiánn sann-thiànn-thàng , Tài-liām ko sin tshut-guā-lâng . |
| 金盞 開花 何處 來 ， 娘仔 做 呆 即 靴擺 ， 那卜 相好 在 心內 ， 起脚動手 人 會 知 。 |
Kim-tsuánn khui-hue hô-tshù lâi , Niû-kiánn tsuè phái tsiah hia-pai , Nā-beh siong-hó tsāi sim-lāi , Khí-kha-tāng-tshiú lâng ē tsai . |
| 橄欖 開花 親像 桃 ， 武祥 殺嫂 手 攑 刀 ， 仙人 打鼓 有 時 錯 ， 脚步 行 差 誰人 無 。 |
Kan-ná khui-hue tshin-tshiūnn thô , Bú-siông sat-só tshiú kia̍h to , Sian-lîn phah-kóo ū sî tshò , Kha-pōo kiânn tsha tsui-lâng bô . |
| 枇杷 開花 子 是 黃 ， 烟盤 排 落 床 中央 ， 哥 那 卜 食 娘 來 裝 ， 恰 娘 蓮花 泡 冰糖 。 |
Khî-pê khui-hue tsí sī n̂g , Hun-puânn pâi lo̍h tshn̂g tiong-ng , Ko nā beh tsia̍h niû lâi tsng , Kà niû liân-hue phàu ping-thn̂g . |
| 菜豆 開花 長短條 ， 楊梅 開花 半冥 朝 ， 神魂 乎 娘 迷 去 了 ， 一時 烏暗 坐 袂 朝 。 |
Tshài-tāu khui-hue tn̂g-té-tiâu , Tshiûnn-m̂ khui-hue puànn-mî tiâu , Sîn-hûn hōo niû bê khì liáu , Tsi̍t-sî oo-àm tsē buē tiâu . |
| 夜香 開花 透冥 香 ， 牡丹 含 蕋 刈吊 人 ， 娘仔 迷 哥 着 緊 放 ， 父母 單生 哥 一人 。 |
Iā-hiong khui-hue thàu-mî phang , Bóo-tan hâm luí kuah-tiàu lâng , Niû-kiánn bê ko tio̍h kín pàng , Pē-bú tan-sinn ko tsi̍t-lâng . |
| 蜜蛇 開花 有 一欉 ， 盤古 開天 第一人 ， 早日 姻緣 對面 講 ， 父母 袂罵 哥 即 通 。 |
Bi̍t-siâ khui-hue ū tsi̍t-tsâng , Puân-kóo khai-thian tē-it-lâng , Tsá-li̍t in-iân tuì-bīn káng , Pē-bú buē-mā ko tsiah thang . |
| 朱蘭 開花 正 含蕋 ， 鴉片 食 朝 成 餓鬼 ， 二蕋 目周 烏蕋蕋 ， 一個 胸前 成 樓梯 。 |
Tsu-lân khui-hue tsiànn kâm-luí , A-phiàn tsia̍h tiâu sîng gō-kuí , Ln̄g-luí ba̍k-tsiu oo-luí-luí , Tsi̍t-gê hing-tsîng sîng lâu-thui . |
| 官蘭 開花 葉 灣匕 ， 目尾 恰 娘 長 交関 ， 看見 娘仔 生 好欵 ， 害 哥 心肝 不 着 亂 。 |
Kuann-lân khui-hue hio̍h uan-uan , Ba̍k-bé kah niû tn̂g kau-kuann , Khuànn-kìnn niû-kiánn sinn hó-khuán , Hāi ko sim-kuann m̄ tio̍h luān . |
| 桂花 開來 樹上 香 ， 少年 兄哥 不是人 ， 一年 僥 千 共 僥 萬 ， 採 了 花心 過 別欉 。 |
Kuì-hue khui--lâi tshiū-siōng phang , Siàu-liân hiann-ko m̄-sī-lâng , Tsi̍t-nî hiau tshing kāng hiau bān , Tshái liáu hue-sim kè pa̍t-tsâng . |
| 海棠 開花 蝶 愛 採 ， 娘 尔 未 大 卜 做呆 ， 胸前 二粒 也 未 亥 ， 起風 落雨 尔 就 知 。 |
Hái-tông khui-hue tia̍p ài tshái , Niû lí bē tuā beh tsuè-phái , Hing-tsîng ln̄g-lia̍p iá bē hai , Khí-hong lo̍h-hōo lí to̍h tsai . |
| 指甲 開花 在 園中 ， 壇微 開花 真正香 ， 小娘 做 呆 姑不將 ， 不是 娘仔 愛 卜 暢 。 |
Tsíng-kah khui-hue tī hn̂g-tiong , Tuânn-bî khui-hue tsin-tsiànn-hiong , Sió-niû tsuè phái koo-put-tsiong , M̄-sī niû-kiánn ài beh thiòng . |
| 紅花 開 透 紅乳乳 ， 娘仔 不通 障 僥倖 ， 一千 八百 提 去 用 ， 招 尔 錬仙 說 無榮 。 |
Âng-hue khui thàu âng-ling-ling , Niû-kiánn m̄-thang tsiùnn hiau-hīng , Tsi̍t-tshing pueh-pah the̍h khì īng , Tsio lí liān-sian seh bô-îng . |
| 芭蕉 開花 成 金錠 ， 我 有 共 哥 小 探聽 ， 交 有 娘仔 生 四正 ， 拙久 不敢 阮 厝 行 。 |
Pa-tsio khui-hue sîng kim-tiānn , Guá ū kāng ko sió thàm-thiann , Kau ū niû-kiánn sinn sì-tsiànn , Tsuah-kú m̄-kánn gún tshù kiânn . |
| 韮菜 開花 一枝香 ， 脚 踏 人影 午時中 。 是 哥 當時 不中用 ， 乎 娘 做表 姑不將 。 |
Kú-tshài khui-hue it-ki-hiong , Kha ta̍h lâng-iánn ngóo-sî-tiong . Sī ko tong-sî put-tiòng-iōng , Hōo niû tsuè-piáu koo-put-tsiong . |
| 開花 成 枣 是 苦令 ， 七粒 孤星 一粒 明 ， 勤趂 錢銀 乎 娘 用 ， 誰知 僥雄 拙 絕情 。 |
Khui-hue sîng tsó sī khóo-līng , Tshit-lia̍p koo-tshinn tsi̍t-lia̍p bîng , Khûn-thàn tsînn-gûn hōo niû īng , Tsuî-tsai hiau-hiông tsuah tsua̍t-tsîng . |
| 芍葯 開花 紅 又 黃 ， 溪口 過 了 是 袖園 ， 看見 娘仔 即 幼軟 ， 嘴邊 來 斟 恰 甜 糖 。 |
Tsiok-io̍k khui-hue âng iū n̂g , Khue-kháu kè liáu sī iū-hn̂g , Khuànn-kìnn niû-kiánn tsiah iù-lńg , Tshuì-pinn lâi tsim khah tinn thn̂g . |
| 梅花 開 透 嶺上 香 ， 阮 厝 也 有 是大人 ， 娘仔 暗靜 共 哥 講 ， 起脚動手 哥 不通 。 |
Muî-hue khui thàu niá-tsiūnn phang , Gún tshù iá ū sī-tuā-lâng , Niû-kiánn àm-tsīnn kā ko káng , Khí-kha-tāng-tshiú ko m̄-thang . |
| 赤足 開花 地下 希 ， 娘仔 看 哥 笑微微 ， 是尔 愛 哥 玉如意 ， 車航 起錠 不通 啼 。 |
Tshiah-tsiok khui-hue tē-hā hi , Niû-kiánn khuànn ko tshiò-bi-bi , Sī-lí ài ko gio̍k-lû-ì , Tshia-phâng khí-tiānn m̄-thang thî . |
| 含笑 開花 成 木筆 ， 恰 娘 相好 親密密 ， 哥 來 娘 去 不接一 ， 不如 來 嫁 恰 朝直 。 |
Hâm-tshiàu khui-hue sîng bo̍k-pit , Kah niû siong-hó tshin-bi̍t-bi̍t , Ko lâi niû khì put-tsiap-it , Put-lû lâi kè khah tiâu-ti̍t . |
| 水錦 開花 白系系 ， 少年 娘仔 生 親淺 ， 娘仔 生 水 中 阮 意 ， 可惜 中 我 不 中 伊 。 |
Tsuí-gím khui-hue pe̍h-si-si , Siàu-liân niû-kiánn sinn tshin-tshínn , Niû-kiánn sinn suí tìng gún ì , Khó-sioh tìng guá m̄ tìng i . |
| 娘仔 生成 十分 笑 ， 用心 計較 袂 得 着 ， 那想 困 娘 尔 袂 着 ， 死 到 陰間 不 過橋 。 |
Niû-kiánn sinn-tsiânn tsa̍p-hun tshiò , Īng-sim kè-kàu buē tit tio̍h , Nā-siūnn khùn niû lí buē tio̍h , Sí kàu im-kan m̄ kè-kiô . |
| 黃枝 開花 在 山腰 ， 日 暴 溪水 臘崙燒 ， 褲底 那 淡 乞人 笑 ， 那無 千苦 錢 袂着 。 |
N̂g-ki khui-hue tī suann-io , Li̍t pha̍k khue-tsuí la̍h-lun-sio , Khòo-té nā tiâm khit-lâng tshiò , Nā-bô kan-khóo tsînn buē-tio̍h . |
| 為 娘 刈吊 飯 食 少 ， 一病 相思 倒 在 席 ， 倒 在 床中 大聲呌 ， 也 無 湯茶 通 食燒 。 |
Uī niû kuah-tiàu pn̄g tsia̍h tsió , Tsi̍t-pīnn siunn-si tó tsāi tshio̍h , Tó tsāi tshn̂g-tiong tuā-siann-kiò , Iā bô thng-tê thang tsia̍h-sio . |
| 鳳仙 開花 真 大蕋 ， 少年 無某 真 克虧 ， 好魚 好肉 食袂把 ， 冥日 刈吊 喘大氣 。 |
Hōng-sian khui-hue tsin tuā-luí , Siàu-liân bô-bóo tsin khik-khui , Hó-hî hó-bah tsia̍h-buē-puî , Mî-li̍t kuah-tiàu tshuán-tuā-khuì . |
| 四英 開花 園 盡 有 ， 丁蘭 有孝 害死 母 ， 梨花 招夫 殺 生父 ， 阮 厝 呆某 也是 于 。 |
Sù-ing khui-hue hn̂g tsīn ū , Ting-lân iū-hàu hāi-sí bú , Lê-hua tsio-hu sat sinn-hū , Gún tshù phái-bóo iā-sī ū . |
| 石竹 開花 在 高山 ， 腹月斗 那 痛 透 心肝 ， 為 娘 刈吊 卜 按盞 ， 一陣 燒熱 一陣 寒 。 |
Tsio̍h-tik khui-hue tī kuân-suann , Pak-tió nā thiànn thàu sim-kuann , Uī niû kuah-tiàu beh àn-tsuánn , Tsi̍t-tsūn sio-lua̍h tsi̍t-tsūn kuânn . |
| 木槿 開來 花 濶濶 ， 娘仔 不 高 也 不 大 ， 是 咱 價數 嚝 未 呱 ， 竹篙 量 布 錢 走蜨 。 |
Bo̍k-kín khui--lâi hue khuah-khuah , Niû-kiánn m̄ kuân iā m̄ tuā , Sī lán kè-siàu kóng buē uá , Tik-ko niû pòo tsînn tsáu-tshua̍h . |
| 牽牛 開花 小牡丹 ， 做表 趂銀 真 千難 ， 一冥 不困 寮寮動 ， 双手 双脚 着 攬人 。 |
Khian-gû khui-hue sió-bóo-tan , Tsuè-piáu thàn-gûn tsin kan-lân , Tsi̍t-mî m̄-khùn liâu-liâu-tāng , Sang-tshiú sang-kha tio̍h lám-lâng . |
| 木筆 開花 色 笑笑 ， 兄哥 不是 林 方橋 ， 卜 提 銀項 免 按腰 ， 是 哥 今年 趂 恰少 ， 力長 補短 也 會 着 。 |
Bo̍k-pit khui-hue sik tshiò-tshiò , Hiann-ko m̄-sī Lîm Pang-kiô , Beh the̍h gûn-hāng bián àn-io , Sī ko kin-nî thàn khah-tsió , Lia̍h-tn̂g póo-té iā ē tio̍h . |
| 綉球 開花 結 歸排 ， 為 娘 刈吊 心肝 呆 ， 冥日 相思 無人知 。 偷來 暗去 一半擺 ， 那 行久長 人 會 知 。 |
Siù-kiû khui-hue kiat kui-pâi , Uī niû kuah-tiàu sim-kuann gâi , Mî-li̍t siunn-si bô-lâng-tsai . Thau-lâi àm-khì tsi̍t-puànn-pái , Nā kiânn-kú-tn̂g lâng ē tsai . |
| 長春 開花 赤如金 ， 相思 娘仔 千欵 心 ， 看 娘 生 水 嘴欣欣 ， 那 會 恰 娘 同床 枕 ， 並 無 風流 也 甘心 。 |
Tióng-tshun khui-hue tshiah-ná-kim , Siunn-si niû-kiánn tshing-khuán sim , Khuànn niû sinn suí tshuì-him-him , Nā ē kah niû kâng-tshn̂g tsím , Pīng bô hong-liû iā kam-sim . |
| 瑞香 開花 在 月宮 ， 少年 郎君 心 奸雄 ， 連 困 三暗 不足諒 ， 搃着 一月 即 會 暢 。 |
Suī-hiong khui-hue tī Gua̍t-kiong , Siàu-liân lông-kun sim kan-hiông , Liân khùn sann-àm put-tsiok-liōng , Tsóng-tio̍h tsi̍t-ge̍h tsiah ē thiòng . |
| 玉簪 開花 面 朝 北 ， 四四 不 買 買 十六 ， 當初 看 羊 無落腹 ， 今日 那 看 那 過目 。 |
Gio̍k-tsam khui-hue bīn tiâu pak , Sì-sì m̄ bé bé tsa̍p-la̍k , Tong-tshe khuànn niû bô-lo̍h-pak , Kin-li̍t ná khuànn ná kè-ba̍k . |
| 月記 開花 如 金魚 ， 水鷄 不 買 買 蟑螆 ， 臭表 即 戇 不 去 死 ， 乎人 困去 不 提錢 。 |
Gua̍t-kì khui-hue ná kim-hî , Tsuí-Kue m̄ bé bé tsiunn-tsî , Tshàu-piáu tsiah gōng m̄ khì sí , Hōo-lâng khùn--khì m̄ the̍h-tsînn . |
| 樹梅 開花 半冥 朝 ， 為 娘 刈吊 桃花 嬲 ， 倒 落 床中 直寮寮 ， 朋友 那 知 真 見誚 。 |
Tshiûnn-m̂ khui-hue puànn-mî taiû , Uī niû kuah-tiàu thô-hue hiâu , Tó lo̍h tshn̂g-tiong ti̍t-liâu-liâu , Pîng-iú nā tsai tsin kiàn-siàu . |
| 正月 桃仔 花 正 開 ， 娘仔 無 翁 真 克虧 ， 有 正 老参 食 袂 肥 ， 倒 落 床中 喘大氣 。 |
Tsiann--ge̍h thô-á hue tsiànn khui . Niû-kiánn bô ang tsin khik-khui , Ū tsiànn lāu-sim tsia̍h buē puî , Tó lo̍h tshn̂g-tiong tshuán-tuā-khuì . |
| 仙桃 開花 在 半天 ， 卜 看 此花 着 天仙 ， 是 娘 少年 無 轉便 ， 乎 娘 無 翁 合 皆然 。 |
Sian-thô khui-hue tī puàn-thian , Beh khuànn tshú-hue tio̍h thian-sian , Sī niû siàu-liân bô tsuán-piàn , Hōo niû bô ang ha̍p kai-liân . |
| 松樹 開花 結 成珠 ， 恰 娘 交倍 有 拙久 ， 田園 賣 去 四五 坵 ， 尚 伸 二間 小 破厝 。 |
Tshîng-tshiū khui-hue kiat sîng-tsu , Kah niû kau-puê ū tsuah-kú , Tshân-hn̂g buē khì sì-gōo khu , Iá tshun ln̄g-king sió phuà-tshù . |
| 松柏 開花 半 吐黃 ， 哥仔 色色 都 會 戇 ， 是 咱 一時 心 慌忙 ， 賣田 賣厝 不通 廣 。 |
Tshîng-phik khui-hue puànn thòo-hông , Ko-á sik-sik to ē gōng , Sī lán tsi̍t-sî sim hong-bông , Buē-tshân buē-tshù m̄-thang kóng . |
| 土豆 開花 釘 落 沙 ， 錢銀 開 去 二千外 ， 心肝 全 無 憶 着 我 。 |
Thôo-tāu khui-hue tìng lo̍h sua , Tsînn-gûn khai khì ln̄g-tshing-guā , Sim-kuann tsuân bô it tio̍h guá . |
| 檨花 開花 滿 樹 明 ， 無 風 無 雨 起 蛟龍 ， 娘仔 卜 僥 用心行 ， 鳥鼠 哭 貓 假 常情 。 |
Suāinn-hue khui-hue muá tshiū bîng , Bô hong bô hōo khí kau-lîng , Niû-kiánn beh hiau īng-sim-hīng , Niáu-tshú khàu niau ké siông-tsîng . |
| 古仔 開花 在 山頭 ， 哥 今 一年 一年 老 ， 卜 是 當初 十八九 ， 驚 无 水娘 困 仝頭 。 |
Kóo-á khui-hue tī suann-thâu , Ko tann tsi̍t-nî tsi̍t-nî lāu , Beh sī tong-tshe tsa̍p-pueh-káu , Kiann bô suí-niû khùn kâng-thâu . |
| 芥菜 開花 能 抽心 ， 菜藍 捧 水 乎 哥 斟 ， 都 是 恰 哥 盤嘴錦 ， 敢 無 恰 哥 好 入心 。 |
Kuà-tshài khui-hue lîng thiu-sim , Tshài-nâ phâng tsuí hōo ko tsim , To sī kah ko puânn-tshuì-gím , Kám bô kah ko hó li̍p-sim . |
| 紅竹 開花 樣樣 紅 ， 哥 尔 交關 有 別人 ， 新 娘 交來 舊 娘 放 ， 迎新 棄舊 不是 人 。 |
Âng-tik khui-hue iūnn-iūnn âng , Ko lí kau-kuann ū pa̍t-lâng , Sin niû kau--lâi kū niû pàng , Ngiâ-sin khì-kū m̄-sī lâng . |
| 龍眼 開花 何凄凄 ， 娘仔 意愛 少年家 ， 瞞翁 騙婿 杏 揀茶 ， 卜 去 茶樓 伴 大客 。 |
Lîng-gíng khui-hue hô-tshe-tshe , Niû-kiánn ì-ài siàu-liân-ke , Muâ-ang phiàn-sài hìng kíng-tê , Beh khì tê-lâu phuānn tuā-kheh . |
| 茉莉 開花 白波波 ， 恨 哥 家中 錢 恰 無 ， 阮 今 共 娘 說 系落 ， 此去 不敢 來 勅挑 。 |
Bā-lī khui-hue pe̍h-pho-pho , Hūn ko ka-tiong tsînn khah bô , Gún tann kā niû seh hē-lo̍h , Tshú-khì m̄-kánn lâi thit-thô . |
| 山茶 開花 滿山 紅 ， 聞名 娘仔 有錢人 ， 全望 娘仔 相痛疼 ， 痛疼 哥 身 出外人 。 |
Suann-tê khui-hue muá-suann âng , Bûn-miâ niû-kiánn ū-tsînn-lâng , Tsn̂g-bāng niû-kiánn sann-thiànn-thàng , Thiànn-thàng ko sin tshut-guā-lâng . |
| 水草 開花 深田 內 ， 阮 死 袂 活 我 真知 ， 是 娘 心肝 想 卜 呆 ， 哥 身 那 想 那 不來 。 |
Tsuí-tsháu khui-hue tshim-tshân lāi , Gún sí buē ua̍h guá tsin-tsai , Sī niû sim-kuann siūnn beh phái , Ko sin ná siūnn ná m̄-lâi . |
| 艮花 開來 恰如 烟 ， 想 趂 兄哥 一篐銀 ， 水粉 抹 去 四五斤 ， 算 來 算 去 無到本 ， 也 着 舊哥 恰 照云 。 |
Gûn-hue khui--lâi kah-ná hun , Siūnn thàn hiann-ko tsi̍t-khoo-gûn , Tsuí-hún buah khì sì-gōo-kun , Sǹg lâi sǹg khì bô-kàu-pún , Iā tio̍h kū-ko khah tsiâu-ûn . |
| 山葯 開花 在 山嶺 ， 文廣 困 在 柳州城 ， 一半 歡喜 一半 驚 ， 乎 娘 僥心 一擺 定 ， 今日 收下 卜 好子 。 |
Suann-io̍h khui-hue tī suann-niá , Bûn-kóng khùn tī Liú-tsiu-siânn , Tsi̍t-puànn huann-hí tsi̍t-puànn kiann , Hōo niû hiau-sim tsi̍t-pái tiānn , Kin-li̍t siu-sim beh hó-kiánn . |
| 金瓜 開花 成 酒精 ， 真 知 臭表 無人情 ， 十元 八元 提去 用 ， 招 尔 做戲 呌 無榮 。 |
Kim-kue khui-hue sîng tsiú-tsing , Tsin tsai tshàu-piáu bô-lîn-tsîng , Tsa̍p-khoo pueh-khoo the̍h-khì īng , Tsio lí tsuè-hì kiò bô-îng . |
| 鉄樹 開花 着 千載 ， 擺脚 行路 双乎 擺 ， 兄哥 那 嫌 阮 恰 呆 ， 因何 透雨 也 卜 來 ? |
Thi̍h-tshiū khu-hue tio̍h tshian-tsái , Pái-kha kiânn-lōo sang-tshiú pái , Hiann-ko nā hiâm gún khah phái , In-hô thàu-hōo iā beh lâi ? |
| 番薯 開花 成 茶甌 ， 娘仔 行經 血 那 流 ， 兄哥 不知 困 仝頭 ， 親相 魚矛 運 紅糟 。 |
Han-tsî khui-hue sîng tê-au , Niû-kiánn kiânn-king hui̍h ná lâu , Hiann-ko m̄-tsai khùn kâng-thâu , Tshin-tshiūnn hî-bâu ùn âng-tsau . |
| 旭孚 開花 有 一枝 ， 大行 頭家 我 就 是 ， 生理 那是 有 趂錢 ， 小妹 卜 用 都 用易 。 |
Hiok-hu khui-hue ū tsi̍t-ki , Tuā-hâng thâu-ke guá to̍h sī , Sing-lí nā-sī ū thàn-tsînn , Sió-bē beh īng to iông-ī . |
| 番樹 開花 是 老老 ， 騙 阮 恁 厝 開 行交 ， 值時 恁某 恰 人 閗 ， 算 來 呌 你 烏歸頭 。 |
Huan-tshiū khui-hue sī lāu-lāu , Phiàn gún lín tshù khui hâng-kau , Tī-sî lín-bóo kah lâng tàu , Sǹg lâi kiò lí oo-kui-thâu . |
| 甘蔗 開花 親像 干 ， 娘仔 祖家 是 唐山 ， 献 出 真情 乎 哥 看 ， 免 得 打呆 哥 心肝 。 |
Kam-tsià khui-hue tshin-tshiūnn kuann , Niû-kiánn tsóo-ke sī Tn̂g-suann , Hiàn tshut tsin-tsîng hōo ko khuànn , Bián tit phah-phái ko sim-kuann . |
| 蒜頭 開花 心 一枝 ， 中國 不 帶 去 四夷 ， 是 哥 今年 恰 無錢 ， 娘仔 一時 不 甲意 。 |
Suàn-thâu khui-hue sim tsi̍t-ki , Tiong-kok m̄ tuà khì sù-î , Sī ko kin-nî khah bô-tsînn , Niû-kiánn tsi̍t-sî m̄ kah-ì . |
| 樹蘭 開花 白微微 ， 探聽 哥仔 真 排只 ， 恨 阮 姿娘 無 八字 ， 欵待 兄哥 袂 歡喜 。 |
Tshiū-lân khui-hue pe̍h-bi-bi , Thàm-thiann ko-á tsin pâi-tsí , Hūn gún tsu-niû bô pueh-lī , Khuán-thāi hiann-ko buē huann-hí . |
| 馬靈 開花 天上 有 ， 娘仔 大厝 人 媳婦 ， 今日 親夫 不 值 厝 ， 無計 通 倚 娘 身軀 。 |
Má-lîng khui-hue thian-siōng ū , Niû-kiánn tuā-tshù lâng sin-pū , Kin-li̍t tshin-hu m̄ tī tshù , Bô-kè thang uá niû sin-khu . |
| 白瓊 開花 在 上天 ， 三國 一將 是 孫堅 ， 是 哥 少年 無 轉便 ， 看 有 食 無 干干唁 。 |
Pi̍k-khîng khui-hue tī siōng-thian , Sam-kok tsi̍t-tsiòng sī sun-kian , Sī ko siàu-liân bô tsuán-piàn , Khuànn ū tsia̍h bô kan-kan-giàn . |
| 紫藤 開花 川 過嶺 ， 想 卜 恰 娘 甲 長行 ， 娘 尔 父母 那 有声 ， 路頭 恰 遠 哥 敢 行 。 |
Tsí-tîn khui-hue suan kè-niá , Siūnn beh kah niû khah tn̂g-kiânn , Niû lí pē-bú nā ū-siann , Lōo-thâu khah hn̄g ko kánn kiânn . |
| 百合 開花 香 一冥 ， 半壁 吊 肉 猪 拔 死 ， 看 有 食 無 病 相思 ， 哥 今 敢會 為 娘 死 ？ |
Pik-ha̍p khui-hue phang tsi̍t-mî , Puànn-piah tiàu bah niau pua̍h sí , Khuànn ū tsia̍h bô pīnn siunn-si , Ko tann kánn-ē uī niû sí ? |
| 荔角 開花 池中 浮 ， 猪仔 飼 大 親像 牛 ， 阮 厝 某仔 也 是 有 ， 恰 娘 相好 搃 無久 。 |
Lîng-kak khui-hue tî-tiong phû , Ti-á tshī tuā tshin-tshiūnn gû , Gún tshù bóo-kiánn iā sī ū , Kah niû siong-hó tsóng bô-kú . |
| 榭榴 開花 成 櫻桃 ， 竹笋 離 土 成 竹篙 ， 人 個 相好 戴 碗帽 ， 虧 阮 相好 做 篐羅 。 |
Siā-liû khui-hue sîng ing-thô , Tik-sún lî thôo sîng tik-ko , Lâng gê siong-hó tì uánn-bō , Khui gún siong-hó tsuè khoo-lo̍h . |
| 祿香 開花 天頂 香 ， 橋頭 土地 假 老人 ， 狐狸 妖精 迷 入空 ， 招 伊 成親 做 好人 。 |
Lo̍k-hiong khui-hue thinn-tíng phang , Kiô-thâu thóo-tī ké lāu-lâng , Hôo-lî iau-tsiann bê li̍p-khang , Tsio i sîng-tshin tsuè hó-lâng . |
| 瓊林 開花 香 又 清 ， 愛 卜 水娘 賣 大灯 ， 父母 生 哥 無 人情 ， 乎 人 做 子 不使品 。 |
Khîng-nâ khui-hue phang iū tshing , Ài beh suí-niû buē tuā-ting , Pē-bú sinn ko bô lîn-tsîng , Hōo lâng tsuè kiánn m̄-sái-phín . |
| 桔祥 開花 葉 恰 少 ， 蔡 端 起造 洛陽橋 。 娘仔 僥 哥 僥 恰少 ， 阮 厝 公媽 有 紙 燒 。 |
Kiat-siông khui-hue hio̍h khah tsió , Tshuà tuann khí-tsō Lo̍k-iông-kiô . Niû-kiánn hiau ko hiau khah-tsió , Gún tshù kong-má ū tsuá sio . |
| 菜頭 開花 真正 苦 ， 結子 原來 在 田塗 ， 乎 娘 先 僥 哥 不 苦 ， 再 選 新妹 有 恰 蘇 。 |
Tshài-thâu khui-hue tsin-tsiànn khóo , Kiat-tsí guân-lâi tī tshân-thôo , Hōo niû sing hiau ko m̄ khóo , Tsài suán sin-bē ū khah soo . |
| 芝蘭 算來 香 甲 好 ， 娘仔 恁 屋 有 新 哥 ， 二人 相好 釣 魚糙 ， 不知 乜人 大先 無 。 |
Tsi-lân sǹg--lâi phang kah hó , Niû-kiánn lín tshù ū sin ko , Ln̄g-lâng siong-hó tiò hî-tsho , M̄-tsai mi̍h-lâng tāi-sing bô . |
| 薔蓼 開花 看 過 來 ， 双脚 行 入 娘 房內 ， 看 娘 生 水 都 袂呆 ， 未 知 娘仔 值 路 來 ？ |
Tshiûnn-liáu khui-hue khuànn kè lâi , Sang-kha kiânn li̍p niû pâng-lāi , Khuànn niû sinn suí to buē-phái , Bē tsai niû-kiánn tī lōo lâi ? |
| 芦李 結子 如 赤李 ， 恨 哥 今日 障 無錢 ， 為 娘 相思 儉儉 死 ， 該侢 命底 有 根基 。 |
Lôo-lí kiat-tsí ná tshiah-lí , Hūn ko kin-li̍t tsiùnn bô-tsînn , Uī niû siunn-si hiám-hiám sí , Kai-tsài miā-té ū kun-ki . |
| 櫻桃 開花 結 成 冉 ， 麪線 開花 免 煞 塩 ， 為 娘 刈吊 眠 又 減 ， 頭眩 目暗 病 就 染 。 |
Ing-thô khui-hue kiat tsiânn liám , Mī-suànn khui-hue bián suah iâm , Uī niû kuah-tiàu bîn iū kiám , Thâu-hîn ba̍k-àm pīnn tio̍h liám . |
| 夾竹 桃花 節節青 ， 妲妃 敗國 老 妖精 ， 是 阮 兄妹 相 甲意 ， 不敢 共 人 過 五更 。 |
Giap-tik thô-hue tsat-tsat-tshinn , Thán-kí pāi-kok lāu iau-tsinn , Sī gún hiann-bē sann kah-ì , M̄-kánn kāng lâng kè gōo-kinn . |
| 杜鵑 開花 兩 分枝 ， 看見 娘仔 路上 啼 ， 手 攑 雨傘 共 白扇 ， 送 卜 兄哥 返回期 。 |
Tōo-kuan khui-hue lióng hun-ki , Khuànn-kìnn niû-kiánn lōo-tsiūn thî , Tshiú kia̍h hōo-suànn kāng pe̍h-sìnn , Sàng beh hiann-ko tńg-huê-kî . |
| 杏花 開來 笑微微 ， 兄哥 親淺 年 今日 我 哥 卜 返 里 ， 害 阮 春心 病 相思 。 |
Hīng-hue khui--lâi tshiò-bi-bi , Hiann-ko tshin-tshínn nî lia̍p- lī , Kin-li̍t guá ko beh tńg lí , Hāi gún tshun-sim pīnn siunn-si . |
| 麗花 開花 清 又 香 ， 做 表 查某 真 害人 ， 眾人 个 某 不使 講 ， 驚 父 驚 母 是 不通 。 |
Lē-tshun khui-hue tshing iū phang , Tsuè piáu tsa-bóo tsin hāi-lâng , Tsìng-lâng gê bóo m̄-sái káng , Kiann pē kiann bú sī m̄-thang . |
| 箣棘 開花 成 弓箭 ， 想 趂 兄哥 烟盤錢 ， 鴉片 粧 到 三四更 ， 不 趂 一篐 銀 員員 。 |
Tshì-kik khui-hue sîng kiong-tsìnn , Siūnn thàn hiann-ko hun-puânn-tsînn , A-phiàn tsng kàu sann-sì-kinn , M̄ thàn tsi̍t-khoo gûn înn-înn . |
| 剪 春 開花 是 秋花 ， 是 哥 今年 真 卜 梳 ， 身 穿 白衣 成 紫花 ， 也 無 半衤領 通 換 洗 。 |
Tsián tshun khui-hue sī tshiu-hue , Sī ko kin-nî tsin beh sue , Sin tshīng pe̍h-i sîng tsí-hue , Iā bô puànn-niá thang uānn sué . |
| 荷蓮 開花 水 結 根 ， 開 了 錢銀 無掩恨 ， 盡 京 娘仔 謝 聖恩 ， 娘仔 不通 僥負 君 。 |
Hô-liân khui-hue tsuí kiat kun , Khai liáu tsînn-gûn bô-iám-hūn , Tsīn kiann niû-kiánn siā sìng-un , Niû-kánn m̄-thang hiau-hū kun . |
| 辣椒 開花 成 壺慮 ， 雉雞 大隻 尾 拖 塗 ， 可惜 一人 帶 一路 ， 袂得 二人 困 仝鋪 。 |
Lua̍h-tsio khui-hue sîng hôo-lôo , Thī-Kue tuā-tsiah bé thua thôo , Khó-sioh tsi̍t-lâng tuà tsi̍t-lōo , Buē-tit ln̄g-lâng khùn kâng-phoo . |
| 紫荊 開花 身 灣灣 ， 乎 哥 僥去 阮 不愿 ， 二目 金金 再 閣 選 ， 詮 卜 共 哥 恰 好欵 。 |
Tsí-king khui-hue sin uan-uan , Hōo ko hiau--khì gún m̄-guān , Ln̄g-ba̍k kim-kim tsài koh suán , Tshuân beh kāng ko khah hó-khuán . |
| 素馨 開花 陣陣 香 ， 一暗 不 困 寮寮 動 ， 心肝 想念 娘 一人 ， 娘仔 僥哥 干 不通 。 |
Sòo-hiong khui-hue tsūn-tsūn phang , Tsi̍t-àm m̄ khùn liâu-liâu tāng , Sim-kuann siàu-liām niû tsi̍t-lâng , Niû-kiánn hiau-ko tshian m̄-thang . |
| 七里 開花 葉 下 紅 ， 遇着 一個 過路人 ， 双手 攬 娘 不甘 放 ， 擋 脚 搖 手 嚝 不通 。 |
Tshit-lí khui-hue hio̍h ē âng , Gū-tio̍h tsi̍t-ê kè-lōo-lâng , Sang-tshiú lám niû m̄-kam pàng , Tòng kha iô tshiú kóng m̄-thang . |
| 桔仔 開花 成 紅柑 ， 旗干 立起 是 紅杉 ， 恰 娘 相好 一牛暗 ， 折散 姻緣 乜人 甘 ？ |
Kiat-á khui-hue sîng âng-kam , Kî-kuann khiā-khí sī âng-sam , Kah niû siong-hó tsi̍t-puànn-àm , Thiah-suànn in-iân mi̍h-lâng kam ? |
| 秋葵 開花 葉 又 紅 ， 兄哥 那 卜 尋 別人 ， 營 我 三分 不使 講 ， 營 我 十分 尔 即 通 。 |
Tshiu-kuî khui-hue hio̍h iū âng , Hiann-ko nā beh tshē pa̍t-lâng , Iânn guá sann-hun m̄-sái káng , Iânn guá tsa̍p-hun lí tsiah thang . |
| 虎耳 開花 色 更 新 ， 叮寕 娘仔 着 正經 ， 別人 恰 好 無路用 ， 不 比 尔 我 個 盡情 。 |
Hóo-ní khui-hue sik kīng sin , Ting-lîng niû-kiánn tio̍h tsìng-king , Pa̍t-lâng khah hó bô-lōo-īng , Put pí lí guá gê tsīn-tsîng . |
| 開花 有 莿 是 胡瓜 ， 現今 呆人 大 四繪 ， 勸 恁 外頭 勿 烟花 ， 不 比 尔 我 塊 交倍 。 |
Khui-hue ū tshì sī tshì-kue , Hiān-kim phái-lâng tuā sì-kuè , Khǹg lín guā-thâu mài ian-hue , Put pí lí guá teh kau-puê . |
| 白朮 開花 氣 温和 ， 哥仔 無 嫌 來 勅挑 ， 真 名 正 姓 共 哥 报 ， 表 名 叫做 風流婆 。 |
Pe̍h-tsu̍t khui-hue khì un-hô , Ko-á bô hiâm lâi thit-thô , Tsin miâ tsiànn sìnn kā ko pò , Piáu miâ kiò-tsuè hong-liû-pô . |
| 麥文冬花 苦 心 清 ， 強陰 瀉熱 共 益精 ； 鴉片 賭仔 那卜  ， 一尾 魲麻 敢 會 成 ？ |
Be̍h-bûn-tang-hue khóo sim tshing , Kiông-im sià-lua̍h kāng ik-tsing ; A-phiàn kiáu-á nā-beh hìng , Tsi̍t-bé lôo-muâ kánn ē sîng ? |
| 金針 開花 疊疊 針 ， 娘仔 大脚 哥 無嫌 ， 是 咱 當時 看過目 ， 無嫌 娘仔 脚 無 縛 。 |
Kim-tsiam khui-hue tia̍p-tia̍p tsiam , Niû-kiánn tuā-kha ko bô-hiâm , Sī lán tng-sî khuànn-kè-ba̍k , Bô-hiâm niû-kánn kha bô pa̍k . |
| 龍眼 開花 何凄凄 ， 阮 身 養 大 是 老父 ， 都是 自 小 失 乾家 ， 不通 嫌 阮 脚 大個 。 |
Lîng-gíng khui-hue hô-tshe-tshe , Gún sin iúnn tuā sī lāu-pē , To-sī tsū suè sit ta-ke , M̄-thang hiâm gún kha tuā-gê . |
| 冬瓜 開花 白 如 雲 ， 望卜 娘仔 牽成 君 ， 牽成 阮 身 那 出運 ， 不敢 船 過 水 無痕 。 |
Tang-kue khui-hue pe̍h lû hûn , Bāng-beh niû-kiánn khan-sîng kun , Khan-sîng gún sin nā tshut-ūn , M̄-kánn tsûn kè tsuí bô-hûn . |
| 頭 戴 一頂 破 碗帽 ， 身 穿 一領 破 羊羔 ， 來 到 娘兜 娘 看 無 ， 不念 早年 舊 交 哥 。 |
Thâu tì tsi̍t-tíng phuà uánn-bō , Sin tshīng tsi̍t-niá phuà iûnn-ko , Lâi kàu niû-tau niû khuànn bô , M̄-liām tsá-nî kū kau ko . |
| 身 穿 一領 破 青衫 ， 手 攑 一枝 呆 屏擔 ， 來 到 娘 兜 乎 娘 罵 ， 不念 早時 好 到 今 。 |
Sin tshīng tsi̍t-niá phuà tshinn-sann , Tshiú gia̍h tsi̍t-ki phái pín-tann , Lâi kàu niû tau hōo niû mā , M̄-liām tsá-sî hó kàu tann . |
| 楊枹 開花 成 欉柏 ， 遇着 狂風 吹 一個 ， 是 卜 是 不 照 直 說 ， 免得 乎 哥 恰 別個 。 |
Iûnn-pau khui-hue sîng tsâng-peh , Gū-tio̍h kông-hong tshue tsi̍t-gê , Sī beh sī m̄ tsiàu ti̍t seh , Bián-tit hōo ko kah pa̍t-gê . |
| 鼠尾 開花 成 麥瑞 ， 為 娘 刈吊 乜 受 虧 ， 求 娘 姻緣 不 相 定 ， 配 娘 不 過 重頭輕 。 |
Tshú-bé khui-hue sîng be̍h-suī , Uī niû kuah-tiàu mi̍h siū khui , Kiû niû in-iân m̄ sann tīng , Phuè niû m̄ kè tāng-thâu-khin . |
| 雀麥 開花 結 綉球 ， 車內 那 呆 着 抹油 ， 娶 着 呆某 死 無 救 ， 親像 死蛇 活 尾留 。 |
Tshiok-be̍h khui-hue kiat siù-kiû , Tshia-lāi nā phái tio̍h buah-iû , Tshuā tio̍h phái-bóo sí bô kiù , Tshin-tshiūnn sí-tsuâ ua̍h bé-liu . |
| 英萖 開花 欉 倭倭 ， 鴉片 食 朝 偷捉雞 ， 是 哥 今年 恰 狼狽 ， 不敢 恰 娘 尔 交倍 。 |
Ing-lî khui-hue tsâng ue-ue , A-phiàn tsia̍h tiâu thau-lia̍h-kue , Sī ko kin-nî khah liông-puē . M̄-kánn kah niû lí kau-puê . |
| 赤苗 開花 如 柳烟 ， 牛郎 織女 是 天仙 ， 等待 牙片 食 過唁 ， 即卜 招 娘 來 錬仙 。 |
Tshiah-biâu khui-hue ná liú-ian , Gû-ln̂g Tsit-lú sī thian-sian , Tán-thāi a-phiàn tsia̍h kè-giàn , Tsiah-beh tsio niû lâi liān-sian . |
| 白苗 開花 似 田紂 ， 肥力 面笑 腹內 憂 ， 恰 娘 提 糖 無 洗手 ， 有心 折散 乜 因由 ？ |
Pe̍h-biâu khui-hue sū tshân-tiū , Kiông-li̍k bīn-tshiò pak-lāi iu , Kah niû the̍h thn̂g bô sué-tshiú , Ū-sim thiah-suànn mi̍h in-iû ? |
| 桂荏 開花 有 一排 ， 娘仔 小漢 不通 呆 ， 小船 不敢 下 重侢 ， 那袂 返骨 尔 就 知 。 |
Kuì-lím khui-hue ū tsi̍t-pâi , Niû-kiánn sè-hàn m̄-thang phái , Sió-tsûn m̄-kánn hē tāng-tsài , Nā-buē tńg-kut lí to̍h tsai . |
| 荷蕖 開花 成 防風 ， 第一 猛勇 是 關公 ， 為 哥 相思 心 顛戇 ， 親像 西施 愛 吳王 。 |
Hô-kī khui-hue sîng hông-hong , Tē-it bíng-ióng sī Kuan-kong , Uī ko siunn-si sim tian-gōng , Tshin-tshiūnn Se-si ài Ngôo-ông . |
| 木桂 開花 真 好看 ， 為 娘 刈吊 受 妖寒 ， 愛卜 共 娘 相 對看 ， 即 袂 打呆 哥 心肝 。 |
Bo̍k-kuì khui-hue tsin hó-khuànn , Uī niû kuah-tiàu siū iau-kuânn , Ài-beh kāng niû sann tuì-khuànn , Tsiah buē phah-phái ko sim-kuann . |
| 白枣 開花 子 久 紅 ， 神魂 乎 娘 迷 落 港 ， 迷 落 港中 飼 魚翁 ， 好嘴 求 娘 着 緊 放 ， 父母 生 哥 孤單人 。 |
Pe̍h-tsó khui-hue tsí kú âng , Sîn-hûn hōo niû bê lo̍h káng , Bê lo̍h káng-tiong tshī hî-ang , Hó-tshuì kiû niû tio̍h kín pàng , Pē-bú sinn ko koo-tuann-lâng . |
| 大枣 開花 如 雞蛋 ， 為 娘 刈吊 面 青黃 ， 那 見 娘 面 就 照原 。 |
Tuā-tsó khui-hue ná kue-ln̄g , Uī niû kuah-tiàu bīn tshinn-n̂g , Tshiánn beh sian-sinn tio̍h lâi khuànn , Sian-sinn seh sī uī niû huān , Nā kìnn niû bīn tio̍h tsiàu-guân . |
| 芥菜 開花 成 旗干 ， 為 娘 相思 葯 常 煎 ， 不 信 脫衫 乎 娘 看 ， 消骨 落肉 成 人干 。 |
Kuà-tshài khui-hue sîng kî-kuann , Uī niû siunn-si io̍h siông tsuann , M̄ sìn thǹg-sann hōo niû khuànn , Siau-kut lo̍h-bah sîng lâng-kuann . |
| 酸枣 開花 身 光光 ， 食 入 嘴內 真正 酸 ， 哥 身 恰 娘 路 卜 断 ， 不久 要 回 自家 門 。 |
Sng-tsó khui-hue sin kng-kng , Tsia̍h li̍p tshuì-lāi tsin-tsiànn sng , Ko sin kah niû lōo beh tn̄g , Put-kiú beh huê tsū-ka bn̂g . |
| 蒲柳 開花 枝枝 長 ， 聽 哥 尔 說 心頭 酸 ， 聞 說 哥 厝 在 新庄 ， 阮 卜 恰 哥 相  返 。 |
Pôo-liú khui-hue ki-ki tn̂g . Thiann ko lí seh sim-thâu sng , Bûn seh ko tshù tī Sin-tsng , Gún beh kah ko sann tshuā tńg . |
| 英梅 開花 葉 青黃 ， 荷蒙 娘仔 恰 哥 返 ， 勿 嫌 水陸 路頭 遠 ， 即通 恰 哥 回 新庄 。 |
Ing-muî khui-hue hio̍h tshinn-n̂g , Hô-bông niû-kiánn kah ko tńg , Mài hiâm tsuí-lio̍k lōo-thâu hn̄g , Tsiah-thang kah ko huê Sin-tsng . |
| 地黃 開花 結 歸球 ， 兄妹 十 返 緊留留 ， 三暗 五日 到 泉州 ， 相好 結合 永 傳流 。 |
Tē-hông khui-hue kiat kui-kiû , Hiann-bē beh tńg kín-liu-liu , Sann-àm gōo-li̍t kàu Tsuân-tsiu , Siong-hó kiat-ha̍p íng thuân-liû . |
