| 冊名 | 最新手巾歌 |
| 編者 | 麥田(國安)續著 |
| 出版社 | 玉珍漢書部 |
| 出版年 | 1932 |
| 篇名 | 全本 |
| 一條 手巾 四角箱 ， 陳 三 私通 拐 五娘 ， 林 大 探听 只號樣 ， 赶緊 狀詞 做 一張 。 |
Tsi̍t-taiû tshiú-kin sì-kak-siunn , Tân Sann su-thong kuái Gōo-niû , Lîm Tuā thàm-thiann tsí-hō-iūnn , Kuánn-kín tsn̄g-sû tsuè tsi̍t-tiunn . |
| 二條 手巾 箱 四吝 ， 御駕 親征 李 世民 ， 薛 禮 帶兵 赶 太謹 ， 回朝 卜 除 大奸臣 。 |
Ln̄g-taiû tshiú-kin siunn sì-lìn , Gū-kà tshin-tsing Lí Sè-bîn , Si̍h Lé tuà-ping kuánn thài-kín , Huê-tiâu beh tî tuā-kan-sîn . |
| 三條 手巾 綉 剪絨 ， 壽春 好漢 人 尽忠 ， 主僕 第一 有 度量 ， 當珠 自助 馬 昭陽 。 |
Sann-tiâu tshiú-kin siù tsiàn-liông , Siū-tshun hó-hàn lâng tsīn-tiong , Tsú-phok tē-it ū tōo-liōng , Tǹg-tsu tsū-tsōo Bé Tsiau-iông . |
| 四條 手巾 二尺 長 ， 姜女 尋君 出 外方 ， 不驚 長城 路頭 遠 ， 堅心 卜尋 范 杞郎 。 |
Sì-tiâu tshiú-kin ln̄g-tshioh tn̂g , Khiunn-lí tshē-kun tshut guā-hng , M̄-kiann Tn̂g-siânn lōo-thâu hn̄g , Kian-sim beh-tshē Huān Kí-ln̂g . |
| 五條 手巾 綉 海反 ， 迄求 三擺 進 中原 ， 王 佐 手骨 甘愿 斷 ， 卜 替 陸 登 伊 報冤 。 |
Gō-tiâu tshiú-kin siù hái-huán , Khit-kiû sann-pái tsìn Tiong-guân , Ông Tsó tshiú-kut kam-guān tuān , Beh thè Lio̍k Ting i pò-uan . |
| 六條 手巾 綉 八欵 ， 龐 統 用計 献 連環 ， 火 燒 赤壁 加治 乱 ， 敗甲 華雄 尽 尾番 。 |
La̍k-tiâu tshiú-kin siù peh-khuán , Pâng thóng iōng-kè hiàn liân-khuân , Hué sio Tshiah-phik ka-tī luān , Pī-kah Huâ-hiông tsīn bé-huan . |
| 七條 手巾 綉 百草 ， 王氏 寶川 結 彩樓 ， 平貴 某緣 一个 到 ， 小姐 綉球 親手 拋 。 |
Tshit-tiâu tshiú-kin siù pah-tsáu , Ông--sī Pó-tshuan kiat tshái-lâu , Pîng-kuì bóo-iân tsi̍t-ē kàu , Sió-tsiá siù-kiû tshin-tshiú phau . |
| 八條 手巾 綉 四色 ， 孔 明 七擺 力 孟 獲 ， 火 燒 藤兵 真 失得 ， 逆天 减歲 無 移易 。 |
Peh-tiâu tshiú-kin siù sì-sik , Khóng Bîng tshit-pái lia̍h Bīng Hi̍k , Hué sio tîn-ping tsin si̍t-tik , Gi̍k-thinn kiám-huè bô î-i̍k . |
| 九條 手巾 綉 仙桃 ， 刀羅 宮主 好 飛刀 ， 羅 仁 典 伊 武藝 好 ， 貪功 性命 即下 無 。 |
Káu-tiâu tshiú-kin siù sian-thô , To-lô kiong-tsú hó hui-to , Lô Lîn tián i bú-gē hó , Tham-kong sènn-miā tsiah-ē bô . |
| 十條 手巾 綉 龍蝦 ， 丁山 卦帥 卜 征 西 ， 失悞 射 死 因 老爸 ， 奉旨 帶孝 去 求 妻 。 |
Tsa̍p-tiâu tshiú-kin siù lîng-hê , Ting-san kuà-suè beh tsing se , Sit-gōo siā sí in lāu-pē , Hōng-tsí tuà-hà khì kiû tshe . |
| 十一 手巾 綉 百鳥 ， 邱 成 捉號 金眼彫 ， 硬軟 工夫 通 能曉 ， 無人 凍 伊 能得 條 。 |
Tsa̍p-it tshiú-kin siù pah-tsiáu , Khu Sîng tshiok-hō kim-gán-tiau , Ngē-lńg kang-hu thong ē-hiáu , Bô-lâng tòng i ē-tit tiâu . |
| 十二 手巾 綉 謝榴 ， 楊 任 下山 卜 扶 周 ， 目周 卜出 二技手 ， 張 奎 英皆 伊 來 收 。 |
Tsa̍p-lī tshiú-kin siù siā-liû , Iûnn līm hā-san beh hû Tiu , Ba̍k-tsiu beh-tshut ln̂g-ki-tshiú , Tiunn Kui ing-kai i lâi siu . |
| 十三 手巾 綉 草子 ， 狄 青 卜 取 真珠旗 ， 奸臣 龐 洪 用 計智 ， 成 伊 西寮 得 妻兒 。 |
Tsa̍p-sann tshiú-kin siù tsháu-tsí , Ti̍k tshing beh tshú tsin-tsu-kî , Kan-sîn Pâng Hông īng kè-tì , Tshiânn i Se-liâu tit tshe-lî . |
| 十四 手巾 綉 八景 ， 薛 剛 酒醉 鬧 花灯 ， 李 治 仆置 城樓頂 ， 被伊 驚死 真 不明 。 |
Tsa̍p-sì tshiú-kin siù pat-kíng , Si̍h Kong tsiú-tsuì nāu hue-ting , Li Tī phak-tì siânn-lâu-tíng , Hōo-i kiann--sí tsin put-bîng . |
| 十五 手巾 綉 鶯武 ， 尽忠 有孝 是 專諸 ， 五 員 半路 騙 伊 去 ， 卜 刺 王 寮 進 酷魚 。 |
Tsa̍p-gōo tshiú-kin siù ing-bú , Tsīn-tiong iú-hàu sī Tsuan-tsu , Ngóo Guân puànn-lōo phiàn i khì , Beh tshì Ông Liâu tsìn kho̍k-hî . |
| 十六 手巾 綉 八仙 ， 大舜 用 象 塊 耕田 ， 出身 通 坐 金鑾殿 ， 因為 有孝 感動 天 。 |
Tsa̍p-la̍k tshiú-kin siù pat-sian , Tāi-sūn iōng tshiūnn teh king-tiân , Tshut-sin thang tsē Kim-luân-tiān , In-uī iú-hàu kám-tōng thian . |
| 十七 手巾 綉 欄杆 ， 姜 惟 兵 敗 牛頭山 ， 大戰 一陣 驚甲 產 ， 打出 陣圍 心 隻 安 。 |
Tsa̍p-tshit tshiú-kin siù lân-kan , Khiunn Uî ping pāi Gû-thâu-san , Tāi-tsiàn tsi̍t-tīn kiann-kah sán , Phah-tshut tīn-uî sim tsiah an . |
| 十八 手巾 綉 鴛鴦 ， 查某 着 學 曾二娘 ， 希花 代志 伊 無想 ， 堅心 食菜 燒好香 。 |
Tsa̍p-peh tshiú-kin siù uan-iunn , Tsa-bóo tio̍h o̍h Tsan-lī-niû , Hi-hua tsāi-tsì i bô-siūnn , Kian-sim tsia̍h-tshài sio-hó-hiunn . |
| 十九 手巾 綉 牡丹 ， 看羊 反孝 是 丁 蘭 ， 悮 迫 娘 死 大 苦嘆 ， 刻木 為 母 傳 世間 。 |
Tsa̍p-káu tshiú-kin siù bóo-tan , Khuànn-iûnn huán-hàu sī Ting Lân , Gōo pik niû sí tuā khóo-thàn , Khik-bo̍k uī bú thuân sè-kan . |
| 二十 手巾 綉 双鳳 ， 范 禮 用計 上界 通 ， 格 用 美人 去 進貢 ， 即能 西施 敗 吳王 。 |
Lī-tsa̍p tshiú-kin siù siang-hōng , Huān Lé iōng-kè siōng-kài thong , Kik iōng bí-lîn khì tsìn-kòng , Tsiah-ē Se-si pāi Ngôo-ông . |
| 廿一 手巾 綉 含笑 ， 曹 操 童關 遇 馬 超 ， 刈 鬚 棄 袍 正 見少 ， 好得 許 楮 加 棟條 。 |
Lī-it tshiú-kin siù hâm-tshiàu , Tso Tshò Tông-kuan gū Bé Tshiau , Kuah tshiu khì phâu tsiànn kiàn-sisù , Hó-tit Khóo Thû ka tòng-tiâu . |
| 廿二 手巾 綉 月桂 ， 孫殯 打陣 入 五雷 ， 南極仙翁 緊 到位 ， 正仙 隻無 去 受開 。 |
Lī-lī tshiú-kin siù gua̍t-kuì , Sun-pīn phah-tīn li̍p ngóo-luî , Lâm-ki̍k-sian-ong kín kàu-uī , Tsìng-sian tsiah-bô khì siū-khui . |
| 廿三 手巾 綉 金棗 ， 八仙 過海 騎 白鶴 ， 仙姑 講是 洞殯嫂 ， 托拐 大仙 做 大哥 。 |
Lī-sann tshiú-kin siù kim-tsó , Pat-sian kuè-hái khiâ pe̍h-ho̍h , Sian-koo kóng-sī Tōng-pin-só , Thuh-kuáinn tāi-sian tsuè tuā-ko . |
| 廿四 手巾 綉 日癸 ， 採花 淫賊 燕子飛 ， 查某 那 乎 看 着 水 ， 今暝 因厝 受 大開 。 |
Lī-sì tshiú-kin siù ji̍t-kuî , Tshái-hue îm-tsha̍t Iàn-tsú-hui , Tsa-bóo nā hoo khuànn tio̍h suí , Kim-mî in-tshù siū tuā-khui . |
| 廿五 手巾 綉 鳳凰 ， 大鬧 天宮 孫 悟空 ， 手 擧 鐵捧 乱乱貢 ， 如來 佛法 治 猴王 。 |
Lī-gōo tshiú-kin siù hōng-hông , Tāi-nāu thian-kiong Sun Ngōo-kong , Tshiú gia̍h thi̍h-pāng luān-luān-kòng , Lû-lâi hu̍t-haut4 tī kâu-ông . |
| 廿六 手巾 綉 櫻爪 ， 李 旦 通州 配 鳳嬌 ， 乎人 做 奴 正 見少 ， 江山 復到  入朝 。 |
Lī-la̍k tshiú-kin siù ing-liáu , Lí tàn Thong-tsiu phuè Hōng-kiau , Hōo-lâng tsuè lôo tsiànn kiàn-siàu , Kan-san ho̍k-guân tshuā li̍p-taiû . |
| 廿七 手巾 綉 芙蓉 ， 藤公 為 國 有 尽忠 ， 保擧 韓 信 做 大將 ， 謹 共 蕭何 伊 參詳 。 |
Lī-tshit tshiú-kin siù phû-iông , Tîn-kong uī kok ū tsīn-tiong , Pó-kí Hân Sìn tsuè tāi-tsiòng , Kín kā Siau-hô i tsham-siông . |
| 廿八 手巾 綉 金蟬 ， 三藏 取 經 往 西天 ， 好得 猴王 太 賢 變 ， 亦是 三藏 有 佛緣 。 |
Lī-peh tshiú-kin siù kim-siân , Sma-tsōng tshú king óng se-thian , Hó-tit kâu-ông thài gâu piàn , Ia̍h-sī Sam-tsōng ū hu̍t-iân . |
| 廿九 手巾 綉 木筆 ， 子牙 用兵 上 机蜜 ， 楊 剪 探 無 好消息 ， 武王 入陣 困 百日 。 |
Lī-káu tshiú-kin siù bo̍k-pit , Tsú-gâ iōng-ping siōng ki-bi̍t , Iûnn Tsián thàm bô hó-siau-sit , Bú-ông li̍p-tīn khùn pah-ji̍t . |
| 三十 手巾 綉 海棠 ， 劉 邦 軍師 張 子房 ， 咸陽市 內 假 顛戇 ， 害 死 韓 生 敗 霸王 。 |
Sann-tsa̍p tshiú-kin siù hái-tông , Lâu Pang kun-su Tiunn Tsú-pông , Hâm-iông-tshī lāi ké tian-gōng , Hāi sí Hân Sing pāi Pà-ông . |
| 卅一 手巾 綉 綢春 ， 仁貴 出身 火頭軍 ， 征東 有 做 平 遼 論 ， 瞞天過海 造 城船 。 |
Sap-it tshiú-kin siù tiû-tshun , Lîn-kuì tshut-sin hué-thâu-kun , Tsing-tang ū tsuè pîng Liâu lūn , Muâ-thinn-kuè-hái tsō siânn-tsûn . |
| 卅二 手巾 綉 薔薇 ， 憂王 卜 敗 出 褒似 ， 戲 放 煙敦 隻 歡喜 ， 到時 亡國 反悔 遲 。 |
Sap-lī tshiú-kin siù tshiûnn-bî , Iu-ông beh pāi tshut Po-sī , Hì pàng ian-thûn tsiah huann-hí , Kàu-sî bông-kok huán-hué tî . |
| 卅三 手巾 綉 夜香 ， 重圍 救 主 趙 子龍 ， 三國 算來 是 福將 ， 一生 出戰 賣 受傷 。 |
Sap-sann tshiú-kin siù iā-hiong , Tiông-uî kiù tsú Tiō Tsú-liông , Sam-kok sǹg--lâi sī hok-tsiòng , It-sing tshut-tsiàn bē siū-siong . |
| 卅四 手巾 綉 八美 ， 項 托 七歲 神童兒 ， 孔子 恰 伊 論 道理 ， 智識 亦閣 不及 伊 。 |
Sap-sì tshiú-kin siù pat-bí , Hāng Thok tshit-huè sîn-tông-lî , Khóng-tsú kah i lūn tō-lí , Tì-sik ia̍h-koh put-kip i . |
| 卅五 手巾 綉 金獅 ， 子貢 第一 好 口才 ， 亦着 子路 性 介呆 ， 顏冋 早死 天 摧排 。 |
Sap-gōo tshiú-kin siù kim-sai , Tsú-kòng tē-it hò kháu-tsâi , Ia̍h-tio̍h Tsú-lōo sìng kài-pháinn , Gân-huê tsá-sí thinn tshui-pâi . |
| 卅六 手巾 綉 萬字 ， 三國 華陀 是 神醫 ， 希奇 什症 亦 能 治 ， 做人 慷慨 不仲 錢 。 |
Sap-la̍k tshiú-kin siù bān-lī , Sam-kok Huâ-tô sī sîn-i , Hi-kî tsa̍p-tsìng ia̍h ē tī , Tsuè-lâng khóng-khài m̄-tiōng tsînn . |
| 卅七 手巾 綉 英哥 ， 乾隆 本是 性 覺羅 ， 想着 蘇 杭 景致 好 ， 單身 江南 去  迌 。 |
Sap-tshit tshiú-kin siù ing-ko , Khiân-liông pún-sī sènn Kak-lô , Siūnn-tio̍h Soo Hâng kíng-tì hó , Tuann-sin Kang-lâm khì tshit-thô . |
| 卅八 手巾 綉 金鶯 ， 紅蓮寺 中 出 野僧 ， 柳 遲 卜 救 卜 文正 ， 無宜 先 救 陸 小青 。 |
Sap-peh tshiú-kin siù kim-ing , Âng-liân-sī tiong tshut iá-tsing , Liú Tî beh kiù Pok Bûn-tsìng , Bô-gî sing kiù Lio̍k Siáu-tshing . |
| 卅九 手巾 綉 山水 ， 刈 股 啖 君 介 子摧 ， 保 到 重耳 再 復位 ， 煞 無 封官 真 克虧 。 |
Sap-káu tshiú-kin siù san-suí , Kuah kóo tām kun Kài Tsi-tshui , Pó kàu Tiông-ní tsài ho̍k-uī , Suah bô hong-kuann tsin khik-khui . |
| 四十 手巾 綉 水錦 ， 唐朝 福將 程 咬金 ， 瓦岡 為 王 亦 稱 朕 ， 旨 宣 羅 成 退 楊 林 。 |
Sì-tsa̍p tshiú-kin siù tsuí-gím , Tông-tiâu hok-tsiòng Thiânn Kā-kim , Uá-kong uî ông ia̍h tshing tīm , Tsí suan Lô Sîng thè Iûnn Lîm . |
| 四一 手巾 綉 金聰 ， 教 人 種作 是 神農 ， 先輩 个 人 亦 賣 戇 ， 立 廟 宗拜 五谷王 。 |
Sì-it tshiú-kin siù kim-tshong , Kà lâng tsìng-tsoh sī Sîn-lông , Sian-puè ê lâng ia̍h bē gōng , Li̍p biō tsông-pài Ngóo-kok-ông . |
| 四二 手巾 綉 大鵬 ， 明朝 氣數 至 崇禎 ， 三貴 借兵 入 國境 ， 隻能 中土 屬 滿清 。 |
Sì-lī tshiú-kin siù tāi-phîng , Bîng-tiâu khì-sòo tsì Tsông-tsing , Sam-kuì tsioh-ping li̍p kok-kíng , Tsa̍i̍h-ē tiong-thóo sio̍k Buán-tshing . |
| 四三 手巾 綉 金蝶 ， 李 靖 大子 是 金叱 ， 第二 南海 做 尊者 ， 第三 哪叱 上 出名 。 |
Sì-sann tshiú-kin siù kim-ia̍h , Lí Tsīng tuā-kiánn sī Kim-tshia , Tē-lī Lâm-hái tsuè Tsun-tsiá , Tē-sann Lô-tshia siōng tshut-miâ . |
| 四四 手巾 綉 黃蜂 ， 吳 猛 有孝 是大人 ， 暗頭 自身 來 飼蚊 ， 那 咬 阮 母 先不通 。 |
Sì-sì tshiù-kun siù n̂g-phang , Ngôo Bíng iú-hàu sī-tuā-lâng , Àm-thâu tsū-sin lâi tshī-báng , Nā kā guán bó sian-m̄-thang . |
| 四五 手巾 綉 官蘭 ， 岳 飛 救駕 牛頭山 ， 刣 退 雄兵 數十 萬 ， 見着 康王 心 隻 安 。 |
Sì-gōo tshiú-kin siù kuann-lân , Ga̍k Hui kiù-kà Gû-thâu-san , Thâi thè hiông-ping sòo-tsa̍p bān , Kìnn-tionh8 Khong-ông sim tsiah an . |
| 四六 手巾 綉 茉莉 ， 費 仲 尤 渾 愛 食錢 ， 去 奏 紂王 選 妲己 ， 隻能 蘇 護 題 反詩 。 |
Sì-la̍k tshiú-kin siù bāng-lī , Pì Tiōng Iû Hûn ài tsia̍h-tsînn , Khì tsàu Tiū-ông suán Thán-kí , Tsiah-ē Soo hōo thê huán-si . |
| 四七 手巾 綉 仙鶴 ， 關公 降 漢 不 降 曹 ， 刣 出 五關 保 二嫂 ， 千里 路途 尋 大哥 。 |
Sì-tshit tshiú-kin siù sian-ho̍h , Kuan-kong hâng Hàn m̄ hâng Tsô , Thâi tshut ngóo-kuan pó lī-só , Tshian-lí lōo-tôo tshē tuā-ko . |
| 四八 手巾 綉 雙面 ， 公明 助 紂 害 本身 ， 三宵 來 排 黃河陣 ， 卜 力 十二个 門人 。 |
Sì-peh tshiú-kin siù siang-bīn , Kong-bîng tsōo Tiū hāi pún-sin , Sam-siau lâi pâi n̂g-hô-tīn , Beh lia̍h tsa̍p-jī-ê bûn-jîn . |
| 四九 手巾 綉 錢樹 ， 千金 小姐 拋 綉球 ， 卜 乎 蒙正 做 牽手 ， 爹媽 打 杆 不 收留 。 |
Sì-káu tshiú-kin siù tsînn-tshiū , Tshian-kim sió-tsiá phau siù-kiû , Beh hōo Bông-tsìng tsuè khan-tshiú , Tia-má phah kuánn m̄ siu-liû . |
| 五十 手巾 綉 水仙 ， 地獄 救母 是 目蓮 ， 伊 是 前世 有 修 便 ， 煞 成 正果 上 西天 。 |
Gōo-tsa̍p tshiú-kin siù tsuí-sian , Tē-ga̍k kiù-bú sī Bo̍k-liân , I sī tsîng-sì ū siu piān , Suah sîng tsìng-kó tsiūnn se-thian . |
| 五一 手巾 綉 龍虎 ， 留子 算是 大 強徒 ， 聯珠 桂武 尫仔某 ， 二人 娶 走 投 紅姑 。 |
Gōo-it tshiú-kin siù lîng-hóo , Liû-tsú sǹg-sī tuā kiông-tôo , Liân-tsu Kuì-bú ang-á-bóo , Ln̄g-lâng tshuā tsáu tâu Âng-koo . |
| 五二 手巾 綉 黃雁 ， 宋朝 邦昌 是 大奸 ， 害死 二帝 去 落難 ， 賣 伊 錦繡 个 江山 。 |
Gōo-lī tshiú-kin siù n̂g-gān , Sòng-tiâu Pang-tshiong sī tuā-kan , Hāi-sí lī-tè khì lo̍h-lān , Bē i kím-siù ê kang-san . |
| 五三 手巾 綉 毛蟹 ， 呂 布 英雄 棟 萬个 ， 王 允 献 出 美人計 ， 害死 董 卓 伊 全家 。 |
Gōo-sann tshiú-kin siù môo-hē , Lī Pòo ing-hiông tòng bān-ê , Ông ún hiàn tshut bí-lîn-kè , Hāi-sí Táng Toh i tsuân-ke . |
| 五四 手巾 綉 金狗 ， 古人 藩 安 上 緣投 ， 查某 看 伊 坐車 到 ， 菓子 擲 甲 鄭劉劉 。 |
Gōo-sì tshiù-kun siù kim-káu , Kóo-lâng Phuann An siōng iân-tâu , Tsa-bòo khuànn i tsē-tshia kàu , Ké-tsí tàn kah tīnn-lâu-lâu . |
| 五五 手巾 綉 燕鳥 ， 古早 仁君 是 帝 堯 ， 生 着 丹朱 真 不少 ， 聘請 舜帝 來 坐朝 。 |
Gōo-gōo tshiú-kin siù iàn-niáu , Kóo-tsá lîn-kun sī tè Giâu , Senn tio̍h tan-tsu tsin put-siàu , Phìng-thiánn Sùn-tè lâi tsē-tiâu . |
| 五六 手巾 滾 四邊 ， 奸臣 宰相 是 文希 ， 為着 雪梅 清節義 ， 挑 來 甲 伊 羔羔纏 。 |
Gōo-la̍k tshiú-kin kún sì-pinn , Kan-sîn tsái-siòng sī Bûn-hi , Uī-tio̍h Suat-muî tsing-tsiat-gī , Thiau lâi kah i ko-ko-tînn . |
| 五七 手巾 綉 屆回 ， 採花 淫賊 白菊花 ， 看着 查某 強強 卜 ， 不從 煞着 做 二瓜 。 |
Gōo-tshit tshiú-kin siù kài-huê , Tshái-hue îm-tsha̍t Pe̍h-kiok-hue , Khuànn-tio̍h tsa-bóo kiông-kiông beh , Put-tsiông suah-tio̍h tsuè ln̄g-kue̍h . |
| 五八 手巾 綉 金蓮 ， 宋朝 時代 出 齊顛 ， 犬肉 伊 亦 食賣善 ， 格 像 乞食 个 身田 。 |
Gōo-peh tshiú-kin siù kim-liân , Sòng-tiâu sî-tāi tshut Tsè-tian , Káu-bah i ia̍h tsia̍h-bē-siān , Kik tsiūnn khit-tsia̍h ê sin-tiân . |
| 五九 手巾 綉 香員 ， 女媧 娘娘 能 補天 ， 紂王 題 詩 乎 看見 ， 隻 吊 三 妖 甲 伊 纏 。 |
Gōo-káu tshiú-kin siù hiunn-înn , Lí-ua niû-niû ē póo-thinn , Tiū-ông tê si hoo khuànn-kìnn , Tsiah tiuà sann iau kah i tînn . |
| 六十 手巾 綉 水鴨 ， 買臣 大先 塊 却柴 ， 做 官 伊 某 閣 來 炒 ， 買臣 將 水 潑 馬脚 。 |
La̍k-tsa̍p tshiú-kin siù tsuí-ah , Mái-sîn tāi-sing teh khioh-tshâ , Tsuè kuann i bóo koh lâi tshá , Mái-sîn tsiong tsuí phuah bé-kha . |
| 水 潑 落地 收 能 起 ， 我 着 收 汝 做 妻兒 ， 伊 某 無面 通 返去 ， 即時 自盡 歸 陰司 。 |
Tsuí phuah lo̍h-tē siu ē khí , Guá tio̍h siu lí tsuè tshe-lî , I bóo bô-bīn thang tńg--khì , Tsik-sî tsū-tsīn kui im-si . |
| 前日 着 有 九條 在 ， 即 對 十條 接落來 。 朋友 恁 那 無 嫌呆 ， 即 將 此歌 報 防 知 。 |
Tsîng-ji̍t tio̍h ū káu-tiâu tsāi , Tsiah tuì tsa̍p-tiâu tsiap--lo̍h--lâi . Pîng-iú lín nā bô hiâm-bái , Tsiah tsiong tshú-kua pò hông tsai . |
| 等 日 玉珍 提 來 托 我 編 ， 我 个 漢文 亦 淺淺 ， 不敢 甲人 箱 假仙 。 |
Tán ji̍t tú- hó ū lī-piān , Gio̍k-tin the̍h lâi thok guá pian , Guá ë hàn-bûn ia̍h tshián-tshián , M̄-kánn kah-lâng siunn ké-sian . |
| 我 帶 北部 个 地界 ， 昭和 四年 落南 來 ， 早前 講古 西市 內 ， 我 那 無講 省人 知 。 |
Guá tuà pak-pōo ê tē-kài , Tsiau-hô sì-nî lo̍h-lâm lâi , Tsá-tsîng kóng-kóo Sai-tshī lāi , Guá nā bô-kóng siánn-lâng tsai . |
| 錢 那 是 無 着 打拚 ， 現時 賣冊 四計行 ， サ ョ ナ ラ 大家 請 ， 后日 好歌 再來 听 。 |
Tsînn nā sī bô tio̍h phah-piànn , Hiān-sî bē-tsheh sì-kè-kiânn , Sā io na lah ta̍k-ke tshiánn , Āu-ji̍t hó-kua tsài-lâi thiann . |
