首頁 >資料庫介紹
目錄
回上頁

冊名 增廣英台新歌全本
編者 未知
出版社 廈門會文堂書局
出版年 1914
篇名 第五集
顯示 的款式:
Lô-má-jī 是
漢字是
一日 越深 一日 重 ，
不知 何日 得 輕鬆 ？
安人 聽見 苦 傷悲 ，
尔 爹 早年 來 過世 ，
Tsi̍t-li̍t ua̍t-tshim tsi̍t-li̍t tāng ,
M̄-tsai hô-li̍t tit khin-sang ?
An-lîn thiann--kìnn khóo siong-pi ,
Lí tia tsá-nî lâi kè-sì ,
單養 我 子 一人 身 ，
尔 母 有 誰 通 可憐 ？
___. 三伯 思着 心 越 酸 ，
就叫 士久 吩咐 伊 ，
Tan-iúnn guá kiánn tsi̍t-lâng sin ,
Lí bú ū tsuî thang khó-lîn ?
. Sam-phik siūnn-tio̍h sim ua̍t sng ,
Tio̍h-kiò Sū-kiú huan-hù i ,
我 今 為 伊 病 一場 ，
去 問 英台 薄情娘 。
士久 趕到 祝家庄 ，
祝家庄上 鬧紛紛 ，
Guá tann uī i pīnn tsi̍t-tiûnn ,
Khì mn̄g Ing-tâi po̍k-tsîng-niû .
Sū-kiú kuánn-kàu Tsiok-ka-tsng ,
Tsiok-ka-tsng-tsiūnn nāu-hun-hun ,
堂上 結彩 共 張燈 ，
正是 馬 俊 來 納聘 。
士久 慌忙 上 廳堂 ，
遇着 仁心 相 動問 ：
Tn̂g-tsiūnn kiat-tshái kāng tiunn-ting ,
Tsiànn-sī Bé Tsùn lâi la̍p-phìng .
Sū-kiú hong-bông tsiūnn thiann-tn̂g ,
Gū-tio̍h Lîn-sim sann tāng-mn̄g :
為 我 稟上 小姐 知 ，
阮厝 官人 差 我 來 。
仁心 就 叫 士久哥 ，
阮厝 娘子 在 後落 ，
Uī guá pín-siōng sió-tsiá tsai ,
Gún-tshù kuann-lâng tshe guá lâi .
Lîn-sim tio̍h kiò Sū-kiú-ko ,
Gún-tshù niû-kiánn tī āu-lo̍h ,
卜見 英台 阮 小姐 ，
不免 通報 隨 阮 行 。
士久 即刻 到 後堂 ，
一 卜 親出 心頭 酸 。
Beh-kìnn Ing-tâi gún sió-tsiá ,
M̄-bián thong-pò suî gún kiânn .
Sū-kiú tsik-khik kàu āu-tn̂g ,
It beh tshin-tshut sim-thâu sng .
官人 為尔 病 一場 ，
未知 小姐 果 思量 ？
英台 聽見 苦 傷悲 ，
是 恁 官人 真 呆癡 ，
Kuann-lâng uī-lí pīnn tsi̍t-tiûnn ,
Bē-tsai sió-tsiá kó su-niû ?
Ing-tâi thiann--kìnn khóo siong-pi ,
Sī lín kuann-lâng tsin gâi-tshi ,
斷約 日期 伊 不聽 ，
我 爹 將阮 配人成 。
士久 掠話 就 應 伊 ，
十日 直直 不言起 ，
Tuān-iok li̍t-kî i m̄-thiann ,
Guá tia tsiong-gún phuè-lâng-tsiânn .
Sū-kiú lia̍h-uē tio̍h ìn i ,
Tsa̍p-li̍t ti̍t-ti̍t put-iân-khí ,
奇奇 怪怪 言 歸串 ，
害 阮 官人 總兮無 。
英台 思着 滴淚啼 ，
勸 阮 官人 莫 傷悲 ，
Kî-kî kuài-kuài iân kui-tshuàn ,
Hāi gún kuann-lâng tsóng-ê-bô .
Ing-tâi siūnn-tio̍h ti̍h-luī-thî ,
Khǹg gún kuann-lâng bo̍h siong-pi ,
阮 身 就卜 去 尋伊 ，
但恐 外人 說 便宜 。
士久 相辭 出 廳堂 ，
看見 禮物 真 奇全 ，
Gún sin tio̍h-beh khì tshē-i ,
Tān-khióng guā-lâng seh pān-gî .
Sū-kiú sann-sî tshut thiann-tn̂g ,
Khuànn-kìnn lé-bu̍t tsin kî-tsn̂g ,
二罐 老酒 排 頭前 ，
生豬 生羊 排 兩平 。
糖鼓 八角 並 洗口 ，
糖子 香餅 二千色 ，
Nn̄g-kuàn lāu-tsiú pâi thâu-tsîng ,
Tshinn-ti tshinn-iûnn pâi nn̄g-pîng .
Tn̂g-kóo pueh-kak pīng sué-kháu ,
Tn̂g-kiánn hiunn-piánn nn̄g-tshing-sik ,
蚋灼 禮香 排 一齊 ，
柿果 桔餅 滿盡多 。
鳳冠 金髻 珍珠 垂 ，
蟒襖 玉帶 四面 隨 。
La̍h-tsik lé-hiunn pâi it-tsuê ,
Khī-kó kiat-piánn buánn-tsīn-tuē .
Hōng-kuan kim-kè tsin-tsu suî ,
Báng-ó gio̍k-tuà sì-bīn suî .
二領 緞衫 四開滾 ，
二條 百景 五采裙 。
生花 一盛 真 清香 ，
一對 雙鳳 朝 牡丹 。
Nn̄g-niá tuān-sann sì-khui-kún ,
Nn̄g-tiâu pah-kíng ngóo-tshái-kûn .
Tshinn-hue tsi̍t-siānn tsin tshing-phang ,
Tsi̍t-tuì sang-hōng tiâu bóo-tan .
看見 禮物 真 齊全 ，
翻身 近前 看 嫁妝 ：
綢緞 衣裳 八 皮箱 ，
一對 綉枕 綉 鴛鴦 ，
Khuànn-kìnn lé-bu̍t tsin tsiâu-tsn̂g ,
Huan-sin kūn-tsîng khuànn kè-tsng :
Tiû-tuān i-tsiûnn pueh phê-siunn ,
Tsi̍t-tuì siù-tsím siù uan-iunn ,
金針 花片 結 珠絲 ，
手環 耳鈎 金蜘蛛 。
牙箸 酒盞 圈 金墘 ，
茶杯 八塊 帶 銀匙 ，
Kim-tsiam hue-phìnn kat tsu-si ,
Tshiú-khuân hī-kau kim-ti-tu .
Gê-tī tsiú-tsuánn khuan kim-kînn ,
Tê-pue pueh-tè tuà gûn-sî ,
玉磬 八卦 金 月斗練 ，
六串 綉 月斗 掛 銀墘 。
緞衣 緞裙 帶 鉛錢 ，
帳眉 鏡巾 挑 萬字 ，
Gio̍k-khìng pat-kuà kim tóo-liān ,
La̍k-tshuàn siù tóo kuà gûn-kînn .
Tuān-i tuān-kûn tuà iân-tsînn ,
Tiùnn-bâi kiànn-kun thio bān-lī ,
三寸 女鞋 六串 底 ，
色褲 挑花 落 盤鞋 。
腳桶 腰桶 打 花箍 ，
白銅 面盆 錫尿壺 。
Sann-tshùn lú-uê la̍k-tshuàn tué ,
Sik-khòo thio-hue lo̍h puânn-uê .
Kha-tháng io-tháng tánn hue-khoo ,
Pe̍h-tâng bīn-phûn siah-liō-ôo .
嫁粧 各件 俱 齊備 ，
挑工 轎下 卜食 員 。
士久 看見 暗 思量 ，
虧 阮 官人 病 一場 ，
Kè-tsng kok-kiānn kū tsuê-pī ,
Tann-kang kiō-ē beh-tsia̍h înn .
Sū-kiú khuànn--kìnn àm su-niû ,
Khui gún kuann-lâng pīnn tsi̍t-tiûnn ,
伊 今 看日 卜 去 ，
枉 我 官人 費 心机 。
仁心 就叫 士久哥 ，
共 恁 官人 說 下落 ，
I tann khuànn-li̍t beh tshuā-khì ,
Óng guá kuann-lâng huì sim-ki .
Lîn-sim tio̍h-kiò Sū-kiú-ko ,
Kāng lín kuann-lâng seh hē-lo̍h ,
阮厝 小姐 配 馬 俊 ，
今 日 無 恁 官人 分 。
士久 相辭 返 鄉里 ，
就共 官人 說 透机 ，
Gún-tshù sió-tsiá phuè Bé Tsùn ,
Kin li̍t bô lín kuann-lâng hun .
Sū-kiú sann-sî tńg hiunn-lí ,
Tio̍h-kāng kuann-lâng seh thàu-ki ,
英台 有話 來 勸 尔 ，
不可 切壞 金 身己 。
三伯 思着 苦 傷悲 ，
虧 我 割吊 費 心机 ，
Ing-tâi ū-uē lâi khǹg lí ,
M̄-thang tshueh-hāi kim sin-kí .
Sam-phik siūnn-tio̍h khóo siong-pi ,
Khui guá kuah-tiàu huì sim-ki ,
舉起 紙筆 心 越 悲 ，
句句 寫出 斷腸詩 。
三伯 暗寫 信 一封 ，
縛 在 鶯哥 翅 下縫 ：
Kia̍h-khí tsuá-pit sim ua̍t pi ,
Kù-kù siá-tshut tuān-tsiông-si .
Sam-phik àm-siá sìn tsi̍t-pang ,
Pa̍k tsāi ing-ko si̍t ē-phāng :
尔 去 越州 尋 英台 ，
不可 失落 放 東西 ，
叮嚀 几句 鶯哥 知 ，
尔 去 越州 尋 英台 。
Lí khì gua̍t-tsiu tshē Ing-tâi ,
M̄-thang sit-lo̍h pàng tang-sai ,
Ting-lîng kuí-kù ing-ko tsai ,
Lí khì Ua̍t-tsiu tshē Ing-tâi .
英台 厝 在 越州 府 ，
祝家 岩桂 對 石獅 ，
鶯哥 騰空 越州 來 ，
認着 岩桂 對 石獅 ，
Ing-tâi tshù tī Ua̍t-tsiu hú ,
Tsiok--ka giâm-kuì tuì tsio̍h-sai ,
Ing-ko thîng-khong Ua̍t-tsiu lâi ,
Līn-tio̍h am-kuì tuì tsio̍h-sai ,
一直 宿落 岩桂樹 ，
聲聲 叫出 祝 英台 。
英台 剌綉 在 大廳 ，
聽見 樹上 鳥 叫聲 ，
It-ti̍t hioh-lo̍h am-kuì-tshiū ,
Siann-siann kiò-tshut Tsiok Ing-tâi .
Ing-tâi tshiah-siù tī tuā-thiann ,
Thiann-kìnn tshiū-tsiūnn tsiáu kiò-siann ,
放落 針線 出來 看 ，
原來 鶯哥 識 我 名 。
鶯哥 見 娘 飛 落塗 ，
英台 雙手 就 來 摸 ，
Khǹg-lo̍h tsiam-suànn tshut-lâi khuànn ,
Guân-lâi ing-ko pat guá miâ .
Ing-ko kìnn niû pe lo̍h-thôo ,
Ing-tâi sang-tshiú tio̍h lâi moo ,
摸到 鶯哥 翅 下縫 ，
一封 書信 有 怪異 。
英台 見 書 着一驚 ，
誰人 回書 寄 梁兄 ？
Bong-kàu ing-ko si̍t ē-phāng ,
Tsi̍t-pang tsu-sìn ū kuài-ī .
Ing-tâi kìnn tsu tio̍h-tsi̍t-kiann ,
Tsuî-lâng huê-tsu kià Niû-hiann ?
在 通 一弓 卦 兩箭 ，
在 通 一馬 掛 兩鞍 。
書中 寫出 萬種愁 ，
誰心 僥心 一別 休 。
Tsāi thang tsi̍t-king kuà nn̄g-tsìnn ,
Tsāi thang it-bé kuà nn̄g-uann .
Tsu-tiong siá-tshut bān-tsióng-tshiû ,
Tsuí-lâng hiau-sim it-pia̍t hiu .
孤眠 深恨 薄情娘 ，
虧 我 相思 病一場 ，
今旦 為娘 苦 相思 ，
直卜 共 尔 討 藥詩 。
Koo-bîn tshim-hūn po̍k-tsîng-niû ,
Khui guá siunn-si pīnn-tsi̍t-tiûnn ,
Kin-tuànn uī-niû khóo siunn-si ,
Ti̍t-beh kāng lí thó io̍h-si .
卜討 六月 暑天霜 ，
卜討 正月 樹梅香 ，
卜討 金雞 頭上髓 ，
卜討 鳳肝 龍腹腸 。
Beh-thó la̍k--ge̍h sú-thinn-sng ,
Beh-thó tsiann--ge̍h tshiūnn-m̂-phang ,
Beh-thó kim-kue thâu-tsiūnn-tshé ,
Beh-thó hōng-kuann lîng-pak-tn̂g .
卜討 仙蛋 來 煎湯 ，
卜討 貓腱 水圭毛 ，
討 有 只 醫藥 通 治 ，
討無 這藥 總 會死 。
Beh-thó sian-nn̄g lâi tsuann-thng ,
Beh-thó niau-kiān tsuí-kue-mn̂g ,
Thó ū tsí i-io̍h thang tī ,
Thó-bô tsit-io̍h tsóng ē-sí .
想 我 十分 九分 死 ，
死了 葬墓 大路邊 ，
墓 卜 坐東 面 向西 ，
卜用 青石 打 墓碑 ，
Siūnn guá tsa̍p-hun káu-hun sí ,
Sí-liáu tsòng-bōng tuā-lōo-pinn ,
Bōng beh tsē-tang bīn ǹg-sai ,
Beh-īng tshinn-tsio̍h phah bōng-pi ,
墓碑 打出 梁 三伯 ，
小妹 尔着 墓前 來 。
英台 看書 多 完備 ，
就叫 瑞 香 捧 筆硯 ，
Bōng-pi phah-tshut Niû Sam-phik ,
Sió-bē lí-tio̍h bōng-tsîng lâi .
Ing-tâi khuànn-tsu to uân-pī ,
Tio̍h-kiò Suī hiunn phâng pit-hīnn ,
回 卜 几句 心內話 ，
寄度 梁哥 得 知机 。
英台 就 回 書 一封 ，
就纏 鶯哥 翅 下縫 ，
Huê beh kuí-kù sim-lāi-uē ,
Kà-thōo Niû-ko tit tsai-ki .
Ing-tâi tio̍h huê tsu tsi̍t-pang ,
Tio̍h-tînn ing-ko si̍t ē-phāng ,
尔 今 飛 去 杭州府 ，
不通 飛落 宿 東西 。
鶯哥 即時 武州 家 ，
放 落 書信 三伯 知 ，
Lí tann pe khì Hâng-tsiu-hú ,
M̄-thang pe-lo̍h hioh tang-sai .
Ing-ko tsik-sî Bú-tsiu ka ,
Pàng lo̍h tsu-sìn Sam-phik tsai ,
三伯 看書 淚紛紛 ，
一時 險險 見 閻君 ，
長冥 思想 割 肝腸 ，
頭眩目暗 面 青黃 。
Sam-phik khuànn-tsu luī-hun-hun ,
Tsi̍t-sî hiám-hiám kìnn giâm-kun ,
Tn̂g-mî su-siúnn kuah kuann-tn̂g ,
Thâu-hîn-ba̍k-àm bīn tshinn-n̂g .
早間 起來 天光 時 ，
媽親 入房 見 子兒 ，
我 子 金身 着 保惜 ，
不可 想 伊 苦苦切 。
Tsá-kan khí--lâi thinn-kng sî ,
Má-tshin li̍p-pâng kìnn kiánn-lî ,
Guá kiánn kim-sin tio̍h pó-sioh ,
M̄-thang siūnn i khóo-khóo-tshueh .
三伯 聽見 滴淚啼 ，
想 子 一命 無 久時 ，
叮嚀 言語 娘 着 記 ，
墓 葬 東西 大路邊 ，
Sam-phik thiann--kìnn ti̍h-luī-thî ,
Siūnn kiánn tsi̍t-miā bô kú-sî ,
Ting-lîng giân-gú niû tio̍h kì ,
Bōng tsòng tang-sai tuā-lōo-pinn ,
墓 卜 坐東 面 向西 ，
打 卜 青石 打 墓碑 ，
墓碑 打出 子 名字 ，
英台 近來 墓前 來 。
Bōng beh tsē-tang bīn ǹg-sai ,
Tánn beh tshinn-tsio̍h phah bōng-pi ,
Bōng-pâi phah-tshut kiánn miâ-lī ,
Ing-tâi kūn-lâi bōng-tsîng lâi .
叮嚀 言語 說 完備 ，
二目 吊起 暈暈 去 ，
喉內 起痰 滿 盡是 ，
一時 氣絕 歸 陰司 。
Ting-lîng giân-gú seh uân-pī ,
Nn̄g-ba̍k tiàu-khí hūn-hūn khì ,
Âu-lāi khí-thâm muá tsīn-sī ,
Tsi̍t-sî khuì-tsua̍t kui im-si .
爹媽 看見 苦 傷悲 ，
頭磕 床邊 恨落去 ，
一家 大小 來 看 伊 ，
看見 死屍 開聲 啼 。
Tia-má khuànn--kìnn khóo siong-pi ,
Thâu-kha̍p tshn̂g-pinn hūn--lo̍h--khì ,
Tsi̍t-ke tuā-suè lâi khuànn i ,
Khuànn-kìnn sí-si khui-siann thî .
父母 年老 子 耽當 ，
死着 三伯 割人腸 ，
可恨 英台 呆 賤婢 ，
我 子 一命 伊 害死 。
Hū-bió nî-lāu kiánn tam-tng ,
Sí-tio̍h Sam-phik kuah-lâng-tn̂g ,
khó-hūn Ing-tâi phái tsiān-pī ,
Guá kiánn tsi̍t-miā i hāi-sí .
厝邊 近前 看 得 見 ，
身長 命短 是 天意 ，
趕緊 上街 買 棺木 ，
收拾 三伯 一 身屍 。
Tshù-pinn kūn-tsîng khuànn tit kìnn ,
Sin-tn̂g miā-té sī thinn-ì ,
Kuánn-kín tsiūnn-kue bué kuan-bo̍k ,
Siu-si̍p Sam-phik tsi̍t sin-si .
士久 送主 滴淚啼 ，
安人 險險 來 磕死 ，
看 子 這 去 不 回頭 ，
親像 溪水 倒頭流 。
Sū-kiú sàng-tsú ti̍h-luī-thî ,
An-lîn hiám-hiám lâi kha̍p--sí ,
Khuànn kiánn tsit khì put huê-thâu ,
Tshin-tshiūnn khue-tsuí tò-thâu-lâu .
三伯 埋葬 都 完備 ，
風水 做好 碑 打字 ，
墓 在 東山 大路邊 ，
坐東 向西 青 石碑 。
Sam-phik bâi-tsòng too uân-pī ,
Hong-suí tsuè-hó pi phah-lī ,
Bōng tī Tang-suann tuā-lōo-pinn ,
Tsē-tang ǹg-sai tshinn tsio̍h-pi .
反主 返來 鬧紛紛 ，
魂亭 鼓吹 做 一群 ，
安人 思 着 苦 傷悲 ，
靈位 安置 大厝邊 。
Huán-tsú tńg--lâi nāu-hun-hun ,
Hûn-tân kóo-tshe tsuè tsi̍t-kûn ,
An-lîn siūnn tio̍h khóo siong-pi ,
Lîng-uī an-tì tuā-tshù-pinn .
早暗 不斷 香 共 灼 ，
敬奉 在生 一般 年 ，
冥日 割吊 哭啼啼 ，
聲聲 句句 叫 子兒 。
Tsá-àm put-tuān hiunn kāng tsik ,
Kìng-hōng tsāi-sinn it-puann nî ,
Mî-li̍t kuah-tiàu khàu-thî-hî ,
Siann-siann kù-kù kiò kiánn-lî .
安人 心內 有 主意 ，
就叫 士久 吩咐 伊 ，
咱 厝 官人 為 伊 死 ，
去 問 英台 乜 主意 ？
An-lîn sim-lāi ū tsú-ì ,
Tio̍h-kiò Sū-kiú huan-hù i ,
Lán tshù kuann-lâng uī i sí ,
Khì mn̄g Ing-tâi mi̍h tsú-ì ?
士久 奉命 越州 去 ，
去 報 英台 得 知机 ，
阮 厝 官人 為 尔死 ，
未知 小姐 乜 主意 ？
Sū-kiú hōng-bīng Ua̍t-tsiu khì ,
Khì pò Ing-tâi tit tsai-ki ,
Gún tshù kuann-lâng uī lí-sí ,
Bē-ti sió-tsiá mi̍h tsú-ì ?
英台 聽見 苦 傷悲 ，
搥胸 失落 大廳 邊 ，
瑞 香 近前 勸 小姐 ，
不通 切心 只路 行 。
Ing-tâi thiann--kìnn khóo siong-pi ,
Tuî-hing sit-lo̍h tuā-thiann pinn ,
Suī hiunn kūn-tsîng khǹg sió-tsiá ,
M̄-thang tshueh-sim tsí-lōo kiânn .
思着 三伯 淚 哀哀 ，
頭 上 紅花 拔落來 ，
梁哥 一命 為 阮 死 ，
卜見 梁兄 黃泉 去 。
Siunn-tio̍h Sam-phik luī ai-ai ,
Thâu tsiūnn âng-hue pue̍h--lo̍h--lâi ,
Niû-ko tsi̍t-miā uī gún sí ,
Beh-kìnn Niû-hiann hông-tsuân khì .
馬家 好日 卜 去 ，
阮 今 無心 去 拜 伊 ，
取去 白銀 二佰 兩 ，
去 做 功果 請 和尚 。
Bé--ka hó-li̍t beh-tshuā khì ,
Gún tann bô-sim khì pài i ,
Tshú-khì pe̍h-gûn nn̄g-pah niú ,
Khì tsuè kong-kó tshiánn hê-siūnn .
士久 返來 說 透枝 ，
去 請 和尚 來 相議 ，
看日 成服 做 頭巡 ，
安人 士久 哭紛紛 。
Sū-kiú tńg--lâi seh thàu-ki ,
Khì tshiánn hê-siūnn lâi siong-gī ,
Khuànn-li̍t sîng-ho̍k tsuè thâu-sûn ,
An-lîn Sū-kiú khàu-hun-hun .
佛壇 排設 清 兼 淨 ，
五個 和尚 來 誦經 ，
獻敬 改結 都 完備 ，
宣經 拜懺 燒 庫盆 。
Hu̍t-tuânn pâi-siat tshing kiam tsīng ,
Gōo-ê hê-siūnn lâi siōng-king ,
Hiàn-kìng kái-kiat too uân-pī ,
Suan-king pài-tshàm sio khòo-tsînn .
功德 做 到 第七旬 ，
和尚 靈前 讀 祭文 ，
道士 弄鶴 追 亡魂 ，
日間 弄樓 冥 戲盆 。
Kong-tik tsuè kàu tuē-tshit-sûn ,
Hê-siūnn lîng-tsîng tha̍k tsè-bûn ,
Tō-sū lāng-ho̍h tui bông-hûn ,
Li̍t-kan lāng-lâu mî hì-phûn .
七旬 功果 做 完備 ，
除靈 散飯 做 一冥 ，
燒 起 靈厝 滿天紅 ，
三伯 騎鶴 往 西方 。
Tshit-sûn kong-kóo tsuè uân-pī ,
Tî-lîng suànn-pn̄g tsuè tsi̍t-mî ,
Sio khí lîng-tshù buán-thian-hông ,
Sam-phik khiā-ho̍h óng se-hong .
第四集 第六集