| 冊名 | 增廣英台新歌全本 |
| 編者 | 未知 |
| 出版社 | 廈門會文堂書局 |
| 出版年 | 1914 |
| 篇名 | 第一集 |
| 唱出 英台 歌 恁 聽 ， 並 無 姊妹 共 弟兄 ， 爹媽 年老 苦 伊 子 ， 英台 連步 出 綉廳 。 |
Tshiùnn-tshut Ing-tâi kua lín thiann , Pīng bô tsí-bē kāng tī-hiann , Tia-má nî-lāu khóo i kiánn , Ing-tâi liân-pōo tshut siù-thiann . |
| 勸 公 勸 媽 莫 悲傷 ， 念 子 單身 是 女兒 ， 咱厝 田園 租業 多 ， 子 卜 杭州 去 讀書 。 |
Khǹg kong khǹg Bé bo̍h pi-siong , Liām kiánn tan-sin sī lú-lî , Lán-tshù tshân-hn̂g tsoo-ia̍p to , Kiánn beh Hâng-tsiu khì tha̍k-tsi . |
| 媽 今 勸 子 不通 去 ， 滿 學 盡是 男子兒 ， 牡丹 開透 人 愛 採 ， 採 了 花枝 亂 花欉 。 |
Bé tann khǹg kiánn m̄-thang khì , Buánn o̍h tsīn-sī lâm-tsú-lî , Bóo-tan khui-thàu lâng ài tshái , Tshái liáu hue-ki luān hue-tsâng . |
| 英台 心內 有 主意 ， 面上 洗落 花粉 去 ， 走入 綉房 換 男衣 ， 打扮 好像 男子兒 。 |
Ing-tâi sim-lāi ū tsú-ì , Bīn-tsiūnn sé-lo̍h hue-hún khì , Tsáu-li̍p siù-pâng uānn lâm-i , Tánn-pān hó-tshiūnn lâm-tsú-lî . |
| 英台 心內 有 主意 ， 就 共 兄嫂 說 透枝 ， 阮 要 杭州 去 讀書 ， 雙親 早晚 交代 尔 。 |
Ing-tâi sim-lāi ū tsú-ì , Tio̍h kāng hiann-só seh thàu-ki , Gún beh Hâng-tsiu khì tha̍k-tsi , Sang-tshin tsá-àm kau-tāi lí . |
| 嫂 今 聽見 笑微微 ， 姑娘 讀書 不通 去 ， 只 去 包袱 對 行李 ， 返來 雙手 抱 孩兒 。 |
Só tann thiann-kìnn tshiò-bi-bi , Koo-niû tha̍k-tsu m̄-thang khì , Tsí khì pau-ho̍k tuì hîng-lí , Tńg--lâi sang-tshiú phō hâi-lî . |
| 英台 聽見 愧 沖天 ， 嫂嫂 說話 恰 不是 ， 頭上 皇天 做 証見 ， 臭爛 羅綾 斷 節義 。 |
Ing-tâi thiann--kìnn khuì tshiong-thinn , Só-só seh-uē khah put-sī , Thâu-tsiūnn hông-thian tsuè tsìng-kìnn , Tshàu-nuā lô-lîng tuān tsiat-gī . |
| 提出 紅綾 七尺 來 ， 埋 在 牡丹 花盆 內 ， 英台 這 去 無 情節 ， 綾羅 臭爛 牡丹 開 。 |
The̍h-tshut âng-lîng tshit-tshioh lâi , Tâi tī bóo-tan hue-phûn lāi , Ing-tâi tsit khì bô tsing-tsiat , Lîng-lô tshàu-nuā bóo-tan khai . |
| 英台 心內 有 主意 ， 就 叫 仁心 隨 身邊 ， 包袱 雨傘 帶 齊備 ， 隨 阮 杭州 讀書 去 。 |
Ing-tâi sim-lāi ū tsú-ì , Tio̍h kiò Lîn-sim suî sin-pinn , Pau-ho̍k hōo-suànn tuà tsuê-pī , Suî gún Hâng-tsiu tha̍k-tsu khì . |
| 媽親 看 子 有 主意 ， 去 取 銀兩 做 盤纏 ， 提出 白銀 三百兩 ， 可 買 紙筆 做 衣裳 。 |
Má-tshin khuànn kiánn ū tsú-ì , Khì tshú gûn-niú tsuè puânn-tînn , The̍h-tshut pe̍h-gûn sann-pah-niú , Thang bué tsuá-pit tsuè i-tsiûnn . |
| 媽親 就 叫 我 子兒 ， 這 去 值時 返 鄉里 ， 早晚 保重 你 身己 ， 免 我 冥日 思 子兒 。 |
Má-tshin tio̍h kiò guá kiánn-lî , Tsit khì tī-sî tńg hiunn-lí , Tsá-àm pó-tiōng lí sin-kí , Bián guá mî-li̍t siūnn kiánn-lî . |
| 英台 掠話 就 應允 ， 不免 娘親 來 掛意 ， 子 去 杭州 讀 三年 ， 日期 完滿 返 鄉里 。 |
Ing-tâi lia̍h-uē tio̍h ìn-ún , M̄-bián niû-tshin lâi kuà-ì , Kiánn khì Hâng-tsiu tha̍k sann-nî , Li̍t-kî uân-buán tńg hiunn-lí . |
| 英台 相辭 卜 起程 ， 仁心 舉傘 做 頭前 ， 拜別 爹媽 出 大門 ， 一家 相看 心頭 酸 。 |
Ing-tâi sann-sî beh khí-thîng , Lîn-sim kia̍h-suànn tsuè thâu-tsîng , Pài-pia̍t tia-má tshut tuā-mn̂g , Tsi̍t-ke sann-khuànn sim-thâu sng . |
| 英台 騎馬 一路 來 ， 暗流 淚滓 無人 知 ， 愛 卜 杭州 去 讀書 ， 共 母 拜別 難 分離 。 |
Ing-tâi khiâ-bé tsi̍t-lōo lâi , Àm-lâu luī-tsái bô-lâng tsai , Ài beh Hâng-tsiu khì tha̍k-tsi , Kāng bú pài-pia̍t lân hun-lî . |
| 不覺 行 到 十餘里 ， 看見 路上 好 景致 ， 二人 相隨 到 重台 ， 看見 前面 一人 來 。 |
Pu̍t-kak kiânn kàu tsa̍p-î-lí , Khuànn-kìnn lōo-siōng hó kíng-tì , Nn̄g-lâng sann-suî kàu Tiông-tâi , Khuànn-kìnn tsîng-bīn tsi̍t-lâng lâi . |
| 英台 站馬 問 姓名 ， 未知 秀才 值路 去 ？ 三伯 看見 笑盈盈 ， 小生 武州 梁 三伯 ， |
Ing-tâi khiâ-bé mn̄g sìnn-miâ , Bē-ti siù-tsâi tī-lōo khì ? Sam-phik khuànn-kìnn tshiò-îng-îng , Sió-sing bú-tsiu Niû Sam-phik , |
| 愛卜 杭州 去 讀書 ， 未 知 兄弟 甚路 去 ？ 英台 掠話 就 應 伊 ， 我 是 越州 人 子兒 ， |
Ài-beh Hâng-tsiu khì tha̍k-tsi , Bē ti hiann-tī sīm-lōo khì ? Ing-tâi lia̍h-uē tio̍h ìn i , Guá sī Ua̍t-tsiu lâng kiánn-lî , |
| 小生 姓 祝 名 英台 ， 為着 讀書 這路 來 。 雙人 名姓 說 完備 ， 言語 說 了 相 投機 ， |
Sió-sing sìnn Tsiok miâ Ing-tâi , Uī-tio̍h tha̍k-tsu tsit-lōo lâi . Sang-lâng miâ-sìnn seh uân-pī , Giân-gú seh liáu sann tâu-ki , |
| 二人 心內 有 主意 ， 楊柳 樹下 結 兄弟 。 二人 結拜 都 完備 ， 三日 赴 到 杭州市 。 |
Nn̄g-lâng sim-lāi ū tsú-ì , Iông-liú tshiū-hā kiat hiann-tī . Nn̄g-lâng kiat-pài too uân-pī , Sann-li̍t hù kàu Hâng-tsiu-tshī . |
| 果然 杭州 好 景致 ， 未知 學堂 對 值 去 ？ 二人 問路 向南 行 ， 聽見 學堂 讀書聲 。 |
Kóo-liân Hâng-tsiu hó kíng-tì , Bē-ti o̍h-tn̂g tuì tī khì ? Nn̄g-lâng mn̄g-lōo ǹg-lâm kiânn , Thiann-kìnn o̍h-tn̂g tha̍k-tsu-siann . |
| 雙人 入學 拜 先生 ， 拜見 先生 來 讀書 ， 先生 看見 心 歡喜 ， 呵咾 二人 識 道理 ， |
Sang-lâng li̍p-o̍h pài sian-sinn , Pài-kiàn sian-sinn lâi tha̍k-tsi , Sian-sinn khuànn-kìnn sim huann-hí , O-ló nn̄g-lâng pat tō-lí , |
| 恁 今 堅心 着 讀書 ， 日後 金榜 有 名字 。 英台 看見 暗 驚疑 ， 滿 學 盡是 男子兒 ， |
Lín tann kian-sim tio̍h tha̍k-tsi , Li̍t-āu kim-póng ū miâ-lī . Ing-tâi khuànn--kìnn àm kiann-gî , Buán o̍h tsīn-sī lâm-tsú-lî , |
| 我 是 單身 一 女娘 ， 被 人 看見 不成樣 。 硯水 潑壁 烏紫紫 ， 將 只 粉壁 來 寫字 ， |
Guá sī tan-sin tsi̍t lú-niû , Pī lâng khuànn-kìnn m̄-tsiânn-iūnn . Hīnn-tsuí phuat-piah oo-tsí-tsí , Tsiōng tsí hún-piah lâi siá-lī , |
| 人人 放尿 濺 着 字 ， 着學 婦人 障 行宜 。 士久 看見 笑微微 ， 英台 放尿 真 巧奇 ， |
Lâng-lâng pàng-liō tsuānn tio̍h lī , Tio̍h-o̍h hū-lîn tsiùnn kiânn-gî . Sū-kiú khuànn--kìnn tshiò-bi-bi , Ing-tâi pàng-liō tsin khá-kî , |
| 人人 放尿 響 叮噹 ， 英台 放尿 褲 一空 。 三伯 聽見 愧 沖天 ， 就 罵 士久 恰 不是 ， |
Lâng-lâng pàng-liō hiúnn tin-tang , Ing-tâi pàng-liō khòo tsi̍t-khang . Sam-phik thiann--kìnn khuì tshiong-thinn , Tio̍h mā Sū-kiú khah put-sī , |
| 英台 共 我 結 兄弟 ， 不準 近前 去 戲 伊 。 英台 心內 用 計智 ， 就 共 先生 說 透枝 ， |
Ing-tâi kāng guá kiat hiann-tī , M̄-tsún kūn-tsîng khì hì i . Ing-tâi sim-lāi īng kè-tì , Tio̍h kāng sian-sinn seh thàu-ki , |
| 滿 學 學生 無 規矩 ， 不 學 聖賢 孔夫子 。 先生 聽見 笑微微 ， 呵咾 英台 識 禮儀 ， |
Buán o̍h ha̍k-sing bô kui-kí , M̄ o̍h sìng-hiân Khóng-hu-tsí . Sian-sinn thiann--kìnn tshiò-bî-bî , O-ló Ing-tâi pat lé-gî , |
| 誰人 不聽 英台 話 ， 即刻 提 來 打 手指 。 英台 心內 有 主意 ， 就 共 梁哥 說 透枝 ， |
Tsuî-lâng m̄-thiann Ing-tâi uē , Tsik-khik the̍h lâi tánn tshiú-tsuínn . Ing-tâi sim-lāi ū tsú-ì , Tio̍h kāng Niû-ko seh thàu-ki , |
| 咱 今 既然 結 兄弟 ， 事事 所 行 著 仁義 。 你 我 二人 同 一床 ， 一條 汗巾 隔 中央 ， |
Lán tann kì-liân kiat hiann-tī , Sū-Sū sóo kiânn tio̍h lîn-gī . Lí guá nn̄g-lâng kâng tsi̍t-tshn̂g , Tsi̍t-tiâu kuānn-kun keh tiong-ng , |
| 誰人 翻身 撻 過 界 ， 罰 伊 紙筆 分 學內 。 三伯 聽見 笑微微 ， 汗巾 為 界 做 侢年 ？ |
Tsuî-lâng huan-sin that kè kài , Hua̍t i tsuá-pit pun o̍h-lāi . Sam-phik thiann--kìnn tshiò-bi-bi , Kuānn-kun uî kài tsuè tsāi-nî ? |
| 倒 落 綉房 着 細利 ， 不通 翻身 踏 着 伊 。 英台 無 困 故意 翻 ， 一張 眠床 些 厘 寬 ， |
Tó lo̍h siù-pâng tio̍h suè-lī , M̄-thang huan-sin ta̍h tio̍h i . Ing-tâi bô khùn kòo-ì huan , Tsi̍t-tiunn bîn-tshn̂g sia lî khuan , |
| 翻身用 腳 踏過界 ， 試看 梁哥 三伯 醒來 就 罵 伊 ， 這 是 賢弟 恰 不是 ， |
Huan-sinīng kha ta̍h-kè-kài , Tshì-khuànn niû-ko àn- tsuánn tsāi ? Sam-phik tshínn--lâi tio̍h mā i , Tse sī hiân-tē khah put-sī , |
| 你 今 伸腳 撻 過界 ， 罰 你 紙筆 分 學內 。 英台 聽見 笑微微 ， 好笑 三伯 真 呆癡 ， |
Lí tann tshun-kha that kè-kài , Hua̍t lí tsuá-pit pun o̍h-lāi . Ing-tâi thiann--kìnn tshiò-bi-bi , Hó-tshiò Sam-phik tsin gâi-tshi , |
| 共 哥 同床 一月 期 ， 至 今 全然 不 知机 。 早間 起來 天光 時 ， 英台 提銀 有 五錢 ， |
Kāng ko kâng-tshn̂g tsi̍t-ge̍h kî , Kàu tann tsuân-liân m̄ tsai-ki . Tsá-kan khí--lâi thinn-kng sî , Ing-tâi the̍h-gûn ū gōo-tsînn , |
| 就 叫 仁心 吩咐 伊 ， 去 買 紙筆 莫 延遲 。 仁心 買 筆 入 學內 ， 滿 學 學生 盡 都 知 ， |
Tio̍h kiò Lîn-sim huan-hù i , Khì bé tsuá-pit bo̍h iân-tî . Lîn-sim bé pit li̍p o̍h-lāi , Buánn o̍h ha̍k-sing tsīn too tsai , |
| 昨 冥 英台 翻 過 界 ， 被 罰 紙筆 滿 學內 。 三伯 罰 了 心 驚疑 ， 今 冥 卜困 着 細利 ， |
Tsā mî Ing-tâi huan kè kài , Pī hua̍t tsuá-pit buánn o̍h-lāi . Sam-phik hua̍t liáu sim kiann-gî , Kin mî beh-khùn tio̍h suè-lī , |
| 罰着 英台 無 要緊 ， 恐罰 三伯 賠 不起 。 雙人 入學 未几時 ， 不覺 清明 又 到期 ， |
Hua̍t-tio̍h Ing-tâi bô iàu-kín , Khióng-hua̍t Sam-phik pê put-khí . Sang-lâng li̍p-o̍h bī-kí-sî , Put-kak tshuinn-miâ iū kàu-kî , |
| 先生 放學 去 的桃 ， 三日 過了 再 入學 。 風 吹 鐵馬 響 叮噹 ， 子規 啼出 悶殺人 ， |
Sian-sinn pàng-o̍h kì thit-thô , Sann-li̍t kè-liáu tsài li̍p-o̍h . Hong tshe thi̍h-bé hiúnn tin-tang , Tsú-kui thî-tshut būn-suah-lâng , |
| 鶯聲 啼叫 人 雜忙 ， 風送 花味 陣陣香 。 英台 一時 悶 無意 ， 無心 做文 共 吟詩 ， |
Ing-siann thî-kiò lâng tsa̍p-bâng , Hong-sàng hue-bī tsūn-tsūn-phang . Ing-tâi tsi̍t-sî būn bô-ì , Bô-sim tsuè-bûn kāng gîm-si , |
| 今旦 清明 好 日期 ， 招 卜 梁哥 看 景致 。 三伯 掠話 就 應 伊 ， 路途 遙遠 來 讀書 ， |
Kin-tuànn tshuinn-miâ hó li̍t-kî , Tsio beh Niû-ko khuànn kíng-tì . Sam-phik lia̍h-uē tio̍h ìn i , Lōo-tôo iâu-uán lâi tha̍k-tsi , |
| 讀書 乃 望 身 成器 ， 貪花 好酒 誤了時 。 英台 就叫 三伯哥 ， 何用 苦苦 不 的桃 ？ |
Tha̍k-tsu nái bāng sin sîng-khì , Tham-hua hónn-tsiú gōo-liáu-sî . Ing-tâi tio̍h-kiò Sam-phik-ko , Hôo-iōng khóo-khóo m̄ thit-thô ? |
| 人 說 青春 無 一世 ， 賞花 近前 看 景致 。 三伯 見說 心 歡喜 ， 一時 入學 書 收起 ， |
Lâng seh tshing-tshun bô tsi̍t-sì , Siúnn-hue kūn-tsîng khuànn kíng-tì . Sam-phik kìnn-seh sim huann-hí , Tsi̍t-sî li̍p-o̍h tsu siu-khí , |
| 二人 相伴 入園 去 ， 果然 園內 好 景致 ： 亦有 牡丹 對 金橘 ， 尚 有 茉莉 對 紫薇 ， |
Nn̄g-lâng sann-phuānn li̍p-hn̂g khì , Kóo-liân hn̂g-lāi hó kíng-tì : Iā-ū bóo-tan tuì kim-kiat , Siōng iú bā-nī tuì tsí-bî , |
| 茶花 杜鵑 白 如 霜 ， 英瓜 桂花 秋海棠 ， 四英 開花 滿山 香 ， 黃萸 水錦 滿 樹欉 。 |
Tê-hue tōo-kuan pe̍h lû song , Ing-liáu kuì-hue tshiu-hái-tông , Sì-ing khui-hue buán-suann phang , N̂g-î tsuí-gím buánn tshiū-tsâng . |
| 英台 看見 笑微微 ， 近前 伸手 折 一枝 ， 一樹 好花 開 正 透 ， 折 來 共哥 插 上 頭 。 |
Ing-tâi khuànn--kìnn tshiò-bi-bi , Kūn-tsîng tshun-tshiú tiah tsi̍t-ki , Tsi̍t-tshiū hó-hue khui tsiànn thàu , Tiah lâi kāng-ko tshah tsiūnn thâu . |
| 三伯 掠話 就 應 伊 ， 賢弟 所 行 恰 不是 ， 你 我 堂堂 男子漢 ， 不是 女人 障 行宜 。 |
Sam-phik lia̍h-uē tio̍h ìn i , Hiân-tē sóo kiânn khah put-sī , Lí guá tông-tông lâm-tsú-hàn , M̄-sī lú-lîn tsiùnn kiânn-gî . |
| 英台 被 罵 笑沉沉 ， 共 哥 插花 愛 青春 ， 共 哥 插花 哥 親淺 ， 哥 就 應話 覺 蠢笨 。 |
Ing-tâi pī mā tshiò-tîm-tîm , Kāng ko tshah-hue ài tshing-tshun , Kāng ko tshah-hue ko tshin-tshínn , Ko tio̍h ìn-uē kak tshún-pūn . |
| 花園 遊過 是 池邊 ， 鴛鴦 水鴨 做 一池 ， 鴛鴦 交頸 在 水面 ， 水鴨 行來 雙 對情 。 |
Hue-hn̂g iû--kè sī tî-pinn , Uan-iunn tsuí-ah tsuè tsi̍t-tî , Uan-iunn kau-kíng tī tsuí-bīn , Tsuí-ah kiânn--lâi sang tuì-tsîng . |
| 英台 就叫 三伯兄 ， 水面 禽鳥 障 所 行 ， 禽鳥 也 有 成雙對 ， 小弟 共 哥 恁 相隨 。 |
Ing-tâi tio̍h-kiò Sam-phik-hiann , Tsuí-bīn khîm-niáu tsiùnn sóo kiânn , Khîm-niáu iā ū tsiânn-sang-tuì , Sió-tī kāng ko lín sann-suî . |
| 三伯 聽見 氣 沖天 ， 這般 畜生 假 成意 ， 手 執 石頭 潑落去 ， 鴛鴦 水鴨 折 二邊 。 |
Sam-phik thiann--kìnn khì tshiong-thinn , Tsit-puann thik-sinn ké sîng-ì , Tshiú tsip tsio̍h-thâu phuah--lo̍h--khì , Uan-iunn tsuí-ah thiah nn̄g-pinn . |
| 英台 就叫 三伯兄 ， 勸 你 這事 不通 做 ， 古人 有 言 說 分明 ， 打破 姻緣 七代 貧 。 |
Ing-tâi tio̍h-kiò Sam-phik-hiann , Khǹg lí tsit-sū m̄-thang tsuè , Kóo-lîn iú giân seh hun-miâ , Tánn-phuà in-iân tshit-tāi pîn . |
| 三伯 掠話 就 應 伊 ， 賢弟 說話 恰 不是 ， 你 我 雙人 結 兄弟 ， 莫得 亂言 來 相欺 。 |
Sam-phik lia̍h-uē tio̍h ìn i , Hiân-tē seh-uē khah put-sī , Lí guá sang-lâng kiat hiann-tī , Bo̍h-tit luān-giân lâi sann-khi . |
