| 冊名 | 新刊莫往臺灣歌 |
| 編者 | 未知 |
| 出版社 | 台灣總督府圖書館輯《台灣俗曲集》 |
| 出版年 | 1821 ~1850 |
| 篇名 | 全本 |
| 在厝 无路 ， 計較 東都 ， 欠缺 船 費 ， 典田 賣租 。 |
Tsāi-tshù bô-lōo , Kè-kàu Tang-too , Khiàm-khuat tsûn huì , Tián-tshân buē-tsoo . |
| 悻悻 而來 ， 威 如 猛虎 ， 妻子 眼淚 ， 不思 回顧 。 |
Hìng-hìng lī-lâi , Ui lû bíng-hóo , Tshe-tsú gán-luī , Put-su huê-kòo . |
| 直 至 海墘 ， 從省 偷渡 ， 不怕 船 小 ， 生死 大数 。 |
Ti̍t tsì hái-kînn , Tsiông-síng thau-tōo , Put-phànn tsûn sió , Sinn-sí thian-sòo . |
| 自 帶 乾粮 ， 番薯 菜補 ， 十人 上船 ， 九人 嘔吐 。 |
Tsū tuà ta-niû , Han-tsû tshài-póo , Tsa̍p-lâng tsiūnn-tsûn , Káu-lâng áu-thòo . |
| 乞水 扌先口 ， 舵公 發怒 ， 托 天 庇祐 ， 緊 到 東都 。 |
Khit-tsuí sué-khóo , Tāi-kong huat-nōo , Thok thian pí-iū , Kín kàu Tang-too . |
| 乘 夜 上山 ， 搜尋 无路 ， 遇 賊 相逢 ， 剝去 衫褲 。 |
Sīng iā tsiūnn-suann , Tshiau-tshē bô-lōo , Gū tsha̍t siong-hông , Pak-khì sann-khòo . |
| 不知 東北 ， 暫宿 山埔 ， 等待 天光 ， 行上 幾步 。 |
M̄-tsai tang-pak , Tshiam-hioh suann-poo , Tán-thāi thinn-kng , Kiânn-tsiūnn kuí-pōo . |
| 要 尋 親戚 ， 跋涉 路途 ， 无俴 通 寄 ， 心 酸 如 醋 。 |
Beh tshē tshin-tsiânn , Pua̍t-sia̍p lōo-tôo , Bô-tsînn thang kià , Sim sng lû tshòo . |
| 拋妻 離子 ， 乃是 何故 ， 欲求 財利 ， 以 此 來 都 。 |
Phau-tshe lī-tsú , Nái-sī hôo-kòo , Io̍k-kiû tsâi-lī , Í tshú lâi too . |
| 四目 无親 ， 飢寒 困苦 。 忽 見 親戚 ， 引 去 牽估 。 |
Sí-ba̍k bû-tshin , Ki-hân khún-khóo . Hut kiàn tshin-tsiânn , Ín khì khan-koo . |
| 一二 朋友 ， 相招 落廍 ， 食 現 工 賒 ， 欠 俴 剪布 。 |
It-lī pîng-iú , Sio-tsio lo̍h-phōo , Tsia̍h hiān kang sia , Khiàm tsînn tsián-pòo . |
| 田衫 穿 破 ， 无人 通 補 ， 年終 月滿 ， 領取 工顾 。 |
Kū-sann tshīng phuà , Bô-lâng thang póo , Nî-tsiong ge̍h-muá , Niá-tshú kang-kòo . |
| 工藝 不 做 ， 日夜 嫖賭 ， 不記 前情 ， 思量 巧路 。 |
Kang-gē m̄ tsuè , Li̍t-iā phiâu-tóo , Buē-kì tshiân-tshîng , Su-niû khiáu-lōo . |
| 食 鴉片烟 ， 穿 烏綢褲 ， 專 招 少友 ， 言語 糊塗 。 |
Tsia̍h a-phiàn-hun , Tshīng oo-tiû-khòo , Tsuan tsio siáu-iú , Giân-gú hôo-tôo . |
| 結交 表妹 ， 綾羅 絲布 ， 動頭 搖目 ， 朝欢 暮楽 。 |
Kiat-kau piáu-bē , Lîng-lô si-pòo , Tāng-thâu iô-ba̍k , Tiau-huan bōo-lo̍k . |
| 牽車 看戯 ， 伸手 相摸 ， 弄嘴 斟唇 ， 不顾 廉耻 。 |
Kan-tshia khuànn-hì , Tshun-tshiú sio-moo , Lāng-tshuì tsim-tûn , Put-kòo liâm-thí . |
| 工資 用 盡 ， 陪 罵 痴奴 ， 一時 忿氣 ， 交 為 賊路 。 |
Kang-tsu īng tsīn , Puê mā tshi-lôo , Tsi̍t-sî hùn-khì , Kau uî tsha̍t-lōo . |
| 鄉保 探知 ， 革出 門戶 ， 此時 困苦 ， 目滓 如 雨 。 |
Hiong-pó thàm-tsai , Kik-tshut mn̂g-hōo , Tshú-sî khùn-khóo , Ba̍k-tsái lû hōo . |
| 愁苦 致病 ， 酒色 所悞 ， 要 水 止 渇 ， 无人 照顾 。 |
Tshiû-khóo tì-pīnn , Tsiú-sik sóo-gōo , Beh tsuí tsí khat , Bô-lâng tsiàu-kòo . |
| 命 危 旦夕 ， 拖出 草埔 ， 雨 浸 日 曝 ， 二目 吐吐 。 |
Bīng guî tàn-si̍k , Thua-tshut tsháu-poo , Hōo tsìm li̍t pha̍k , Ln̄g-ba̍k thóo-thóo . |
| 舌 青 耳 烏 ， 哀声 叫 苦 ， 死 無 棺木 ， 骨骸 暴露 。 |
Tsi̍h tshinn hī oo , Ai-siann kiò khóo , Sí bô kuan-bo̍k , Kut-hâi po̍k-lōo . |
| 猪狗 爭 食 ， 並无 坟墓 ， 家後 妻小 ， 不知 其 故 。 |
Ti-káu tsinn tsia̍h , Pīng-bô hûn-bōo , Ke-āu tshē-sió , Put-ti kî kòo . |
| 望 夫 寄 信 ， 奉養 公姑 ， 非 是 天命 ， 自 入 邪路 。 |
Bōng hu kià sìn , Hōng-ióng kong-koo , Hui sī thian-bīng , Tsū li̍p siâ-lōo . |
| 信息 一至 ， 眼淚 如 雨 ， 身死 他鄉 ， 妻 思 別路 。 |
Sìn-sit it-tsì , Gán-luī lû hōo , Sin-sí thann-hiong , Tshe su pa̍t-lōo . |
| 劝 君 往 臺 ， 須 當 勤苦 ， 貪花 迷酒 ， 絕嗣 廢祖 。 |
Khuàn kun óng Tâi , Su tong khûn-kóo , Tham-hua bê-tsiú , Tsua̍t-sū huè-tsóo . |
| 羊 有 跪 乳 ， 鴉 有 反哺 ， 罔亟 深息 ， 安得 不顾 。 |
Iûnn ū kuī lú , A ū huán-pōo , Bóng-ki̍k tshim-un , An-tik put-kòo . |
| 若 有 婚娶 ， 楽 尒 妻帑 ， 君子 知 成 ， 終身 不 悞 。 |
Nā ū hun-tshuā , Lo̍k ní tshe-lôo , Kun-tsú ti sîng , Tsiong-sin put gōo . |
| 來 台 之 人 ， 勿 此 見惡 ， 劝觧 親朋 ， 東都 勿 渡 。 |
Lâi Tâi tsi lîn , Bu̍t tshú kiàn-ònn , Khuàn-kái tshin-pîng , Tang-too bu̍t tōo . |
| 何如 在 家 ， 晏眠 早起 ， 免 驚 波涛 ， 自如 行止 。 |
Hô-lû tsāi ka , Uànn-bîn tsá-khí , Bián kiann pho-tôo , Tsū-lû hîng-tsí . |
| 朝夕 趂俴 ， 夫妻 欢喜 ， 也 顾 坟墓 ， 也 育 子女 。 |
Tiau-si̍k thàn-tsînn , Hu-tshe huann-hí , Iā kòo hûn-bōo , Iā io̍k tsú-lí . |
